អគ្គស្នងការនគរបាលជាតិបានសម្រេចដកហូតឋានន្តរសក្តិមន្ត្រីនគរបាលពីររូប នៅនាយកដ្ឋានប្រឆាំងបទល្មើសសេដ្ឋកិច្ច និង មន្ទីរប្រឆាំងគ្រឿងញៀន។
សេចក្តីសម្រេចស្តីពីការអនុវត្តវិន័យមន្ត្រីនគរបាលជាតិដែលចុះហត្ថលេខាដោយលោក នេត សាវឿន កាលពីថ្ងៃទី២ខែមករា សម្រេចដកសក្តិអនុសេនីយ៍ឯក ពិន សុភ័ក្រ នៅនាយក ដ្ឋាននគរបាលប្រឆាំងបទល្មើសសេដ្ឋកិច្ច ឲ្យមកត្រឹមថ្នាក់អនុសេនីយ៍ទោ ចំណែក អនុសេនីយ៍ ឯក ស្រី វាសនា នៅមន្ទីរប្រឆាំងគ្រឿងញៀនដកឲ្យមកត្រឹមថ្នាក់អនុសេនីយ៍ទោវិញដែរ។
លោក នេត សាវឿន បញ្ជាក់ថា មូលហេតុនៃការដកសក្តិនេះគឺដោយសារល្មើសវិន័យរបស់ កងកម្លាំងនគរបាលជាតិ ប៉ុន្តែមិនបញ្ជាក់ថា ល្មើសយ៉ាងម៉េចនោះទេ។
កាលពីថ្ងៃទី១០ខែមករាតម្រួតក្រសួងមហាផ្ទៃបានឃាត់ខ្លួនមន្ត្រីនគរបាល៦រូបក្នុងនោះរួមមានទាំងឧត្តមសេនីយ៍មួយរូបផង។ ករណីនេះកើតឡើងបន្ទាប់ពីមន្ត្រីទាំង៦រូប ទៅពិនិត្យឃ្លាំង ទំនិញមួយដែលសង្ស័យថា មានបារីក្លែងក្លាយ ហើយម្ចាស់ឃ្លាំងមិនព្រមសហការ ជាមួយ នគរបាល ហើយបានរាយការណ៍ ទៅសមត្ថកិច្ចថ្នាក់លើទើបមានការចាប់ខ្លួននោះ កើត ឡើង។