ក្រសួងការងារ និងបណ្តុះបណ្តាលវិជ្ជាជីវៈ ព្រមានចាត់វិធានការចំពោះក្រុមហ៊ុនមិនព្រមទូទាត់ប្រាក់ឈ្នួល ២ដងក្នុង១ខែ ឲ្យទៅកម្មករនិយោជិតតាមច្បាប់កំណត់ ខណៈខ្លួនរកឃើញថា គិតត្រឹមពាក់កណ្តាលខែនេះមានក្រុមហ៊ុនមួយចំនួនមិនទាន់អនុវត្តនៅឡើយ។
ច្បាប់ការងារ ដែលតម្រូវឲ្យម្ចាស់រោងចក្រសហគ្រាស ត្រូវបើកប្រាក់ឈ្នួលឲ្យកម្មករនិយោជិត២ដងក្នុង១ខែនោះ ត្រូវបានដាក់ឲ្យអនុវត្តចាប់ពីខែមករា ឆ្នាំ២០១៩នេះទៅ។
ប៉ុន្តែ ក្រសួងការងារ និងបណ្តុះបណ្តាលវិជ្ជាជីវៈ ឲ្យដឹងតាមសេចក្តីប្រកាសព័ត៌មានថា គិតត្រឹមថ្ងៃទី១៦ ខែមករានេះ មានរោងចក្រសហគាស ៨១ភាគរយប៉ុណ្ណោះ បានអនុវត្តតាមបទប្បញ្ញត្តិថ្មីនេះ។
ក្រសួងថា ចំពោះរោងចក្រសហគ្រាសដែលកំពុងអនុវត្ត ខ្លួននឹងតាមដានត្រួតពិនិត្យ ដើម្បីជំរុញឲ្យអនុវត្ត ហើយថា ក្នុងករណីមិនអនុវត្ត នឹងត្រូវផាកពិន័យតាមច្បាប់ស្តីពីការងារ។
ក្រសួងបានឲ្យដឹងទៀតថា ក្នុងចំណោមរោចក្រសហគ្រាស ៨១ភាគរយ ដែលកំពុងអនុវត្តច្បាប់នេះ មាន ៥០ភាគរយបើកប្រាក់ឈ្នួលលើកទី១ ចន្លោះថ្ងៃទី១៦ ដល់ថ្ងៃទី១៩ ខែមករា និងបើកលើកទី២ នៅចន្លោះថ្ងៃទី១ ដល់ថ្ងៃទី៧ នៃខែបន្ទាប់។
ក្រសួងឲ្យដឹងទៀតថា រោងចក្រសហគ្រាស ២៥% បានបើកប្រាក់ឈ្នួលដល់កម្មករលើកទី១ នៅថ្ងៃទី១៦ ខែមករា និងលើកទី២ នៅថ្ងៃទី១ នៃខែបន្ទាប់ រោងចក្រសហគ្រាស ២៥ភាគរយទៀត បើកប្រាក់ឈ្នួលដល់កម្មករលើកទី១ នៅថ្ងៃទី២៥ ខែមករា និងលើកទី២ នៅចន្លោះថ្ងៃ១០ នៃខែបន្ទាប់។
ប្រកាសដដែល ឲ្យដឹងដែរថា កន្លងទៅរោចក្រសហគ្រាសតែងតែបើកប្រាក់ឈ្នួលប្រចាំខែជូនកម្មករនិយោជិតរបស់ខ្លួននៅចន្លោះថ្ងៃទី១ ដល់ថ្ងៃទី៧ នៃខែបន្ទាប់ ដោយសាររោងចក្រសហគ្រាស ត្រូវគណនាចំនួនថែមម៉ោង ចំនួនផលិតផលដែលសម្រេចបាន និងប្រាក់លើកទឹកចិត្តផ្សេងៗក្នុងខែនីមួយៗ។
ក្រសួងថា ដោយឡែកចាប់ពីខែមករា ឆ្នាំ២០១៩នេះតទៅ រោចក្រសហគ្រាស នឹងបើកផ្តល់ប្រាក់ឈ្នួលសុទ្ធសាធចំនួន ៥០ភាគរយ ដល់កម្មករនិយោជិតនៅចន្លោះពីថ្ងៃទី១៦ ដល់ថ្ងៃទី១៩ នៃខែនីមួយៗ និងបើកផ្តល់ប្រាក់ឈ្នួលសរុបដែលនៅសល់ឲ្យដល់កម្មករនិយោជិតចន្លោះពីថ្ងៃទី១ ដល់ថ្ងៃទី៧ នៃខែបន្ទាប់៕
