សហព័ន្ធស្រូវអង្ករកម្ពុជា បានបង្ហាញក្តីបារម្ភពីផលប៉ះពាល់លើវិស័យស្រូវអង្ករកម្ពុជា បន្ទាប់ពីសហភាពអឺរ៉ុបបានសម្រេចដកហូតពន្ធគយលើការនាំចូលអង្ករពីកម្ពុជា។
សហភាពអឺរ៉ុបបានសម្រេចយកពន្ធគយលើអង្ករនាំចូលពីប្រទេសកម្ពុជា និងប្រទេសភូមា នៅរយៈពេល ៣ឆ្នាំជាប់គ្នា ទៅតាមសំណើបណ្ដាសមាជិកដែលជាប្រទេសផលិតអង្ករនៅក្នុងសហគមន៍មួយនេះ ដោយចាប់ផ្ដើមអនុវត្តចាប់ពីថ្ងៃស្អែកនេះតទៅ។
អនុប្រធានសហព័ន្ធស្រូវអង្ករកម្ពុជា លោក ហ៊ុន ឡាក់ មានប្រសាសន៍ថា ស្ថាប័នរបស់លោកបានស្នើទៅសហភាពអឺរ៉ុបឲ្យបកស្រាយឲ្យបានច្បាស់លាស់ពីបញ្ហានេះរួចហើយ ហើយសហព័ន្ធរបស់លោកក៏នឹងជួបប្រជុំជាមួយភាគីពាក់ព័ន្ធទាក់ទងនឹងបញ្ហានេះផងដែរ។
លោកបន្ថែមថា៖ «យើងដឹងហើយថា អង្ករកម្ពុជាយើងផលិតមានតម្លៃលើសអង្ករប្រទេសជិតខាងតម្លៃ៤០ ទៅ ៥០ដុល្លារក្នុងមួយតោន។ កាលណាយើងរកយន្តការមួយជាក់លាក់ថា យើងអាចកាត់ផ្នែកណាបាន ពេលហ្នឹងបានជាយើងអាចដោះបញ្ហាដែលគេកំណត់ឲ្យបង់ពន្ធ។ ជាទូទៅ គឺនៅលើពិភពលោក គឺតែងតែអញ្ចឹងហើយ មិនអាចថា យើងអាចរស់បានស្រួលរហូតទេ! គឺតែងតែមានរបត់មួយដែលប្រែប្រួលអញ្ចឹងហើយ។ អ្វីដែលយើងត្រូវធ្វើ គឺផ្ទៃក្នុងត្រូវរៀបចំដោះ[ស្រាយ]នូវបញ្ហាដែលយើងជួបឧបសគ្គហ្នឹងឯង»។
អគ្គនាយកក្រុមហ៊ុនបៃតង លោក ភូ ពុយ បានទទួលស្គាល់អំពីផលប៉ះពាល់មកលើឧស្សាហកម្មនាំចេញអង្ករកម្ពុជា ប៉ុន្តែ លោកថា ការនាំចេញអង្ករក្រអូបរបស់កម្ពុជា មានតម្រូវការកើនឡើងខ្ពស់នៅតាមបណ្ដាប្រទេសក្នុងតំបន់អាស៊ី។
លោកថា៖ «ប្រភេទអង្ករដែលយើងនាំទៅអាស៊ីហ្នឹង មានអង្ករក្រអូបច្រើនមែនទែនដែលយើងកំពុងខ្វះបរិមាណឲ្យគេផង មានទៅចិន ទៅម៉ាឡេ ទៅប្រ៊ុយណេ ទៅប្រទេសមួយចំនួនទៀតដែលទទួលការនាំចូលអង្ករពីកម្ពុជាទៅហ្នឹង។ ដោយឡែកពីរបីឆ្នាំនេះផងដែរ យើងខ្វះអង្ករឲ្យគេផង។ អញ្ចឹង យើងអាចជំរុញអ្នកដាំអង្ករប្រភេទធម្មតាឲ្យគេកែប្រែ ហើយរវាងការជំរុញនេះ មានតែក្រុមហ៊ុនជាមួយនឹងក្រសួង និងភាគីពាក់ព័ន្ធដើម្បីជំរុញការដាំដុះហ្នឹង»។
សហគមន៍អឺរ៉ុប បានលើកឡើងនៅក្នុងសេចក្ដីប្រកាសព័ត៌មានកាលពីថ្ងៃម្សិលមិញថា ខ្លួនបានសម្រេចដកហូតពន្ធតម្លៃ ១៧៥អឺរ៉ូ ឬប្រហែល១៩៩.៥០ដុល្លារអាមេរិក ក្នុងអង្ករ ១តោននៅឆ្នាំដំបូង បន្ទាប់មកអត្រាដកហូតពន្ធគយនឹងធ្លាក់ចុះដល់ចំនួន ១៥០អឺរ៉ូនៅឆ្នាំទីពីរ ហើយនៅឆ្នាំទី៣ អត្រាពន្ធគយលើអង្ករនាំចូលពីកម្ពុជា និងភូមា នឹងធ្លាក់ចុះមកនៅត្រឹម ១២៥អឺរ៉ូ។
ទីប្រឹក្សាអង្គការកសិកម្មសេដាក លោក សម វិទូ បានលើកឡើងថា វិធានការនេះអាចនឹងធ្វើឲ្យប៉ះពាល់ដល់តម្លៃស្រូវរបស់ប្រជាកសិករ និងធ្វើឲ្យកម្ពុជាកាន់តែពិបាកថែមទៀតក្នុងការប្រកួតប្រជែងទីផ្សារអង្ករជាមួយប្រទេសជិតខាង។
លោក សម វិទូ បានជំរុញទៅរដ្ឋាភិបាលឲ្យមានវិធានការទម្លាក់ថ្លៃដើមនៃការផលិត ផ្ដល់បច្ចេកទេសកសិកម្មដល់ពលរដ្ឋ រួមទាំងការពង្រឹងហេដ្ឋារចនាសម្ព័ន្ធធារាសាស្ត្រ តម្លៃប្រេងសាំង និងតម្លៃដឹកជញ្ជូន ដើម្បីជំរុញពង្រឹងជំហរប្រកួតប្រជែងនៃឧស្សាហកម្មនេះ។
លោកថា៖ «ខ្ញុំជឿថា វិធានការរបស់រដ្ឋាភិបាល គឺមានខ្លះហើយ ក៏ឃើញខ្លះដែរ តែហាក់ដូចជាមិនស៊ីសង្វាក់គ្នារវាងក្រសួងនានាដែលធ្វើការពាក់ព័ន្ធជាមួយគ្នា។ អញ្ចឹង ត្រូវធ្វើយ៉ាងណាឲ្យក្រសួងទាំងអស់ហ្នឹង ធ្វើការរលូនជាមួយគ្នា ហើយធ្វើការរុញឲ្យវិធានការដែលបានដាក់ចេញទាំងអស់ហ្នឹង ឲ្យក្លាយទៅជាវិធានការមួយដែលមានប្រសិទ្ធភាព។ អញ្ចឹង បានយើងអាចទៅរួច ប្រកួតជាមួយគេរួច បើមិនអញ្ចឹងទេ! ប្រហែលជាយើងមានការពិបាកហើយក្នុងការប្រកួតប្រជែងជាមួយគេ»។
អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ស្រី វុឌ្ឍី មានប្រសាសន៍ថា កម្ពុជាបានតៀមរួចហើយដើម្បីទប់ទល់នឹងការគិតពន្ធអង្កររបស់សហភាពអឺរ៉ុបនេះ ដែលរួមមាន ការសម្លឹងរកទីផ្សារបន្ថែម ការពង្រឹងប្រព័ន្ធធារាសាស្ត្រ បញ្ចុះតម្លៃអគ្គិសនី និងរៀបចំហេដ្ឋារចនាសម្ព័ន្ធផ្លូវថ្នល់ជាដើម។
លោកថា៖ «កន្លងមកអាមេរិកធ្លាប់កាត់ GSP កាត់អីអស់ ហើយគេប៉ាន់ថា កម្ពុជាហ្នឹងដួលហើយ ការពិតមិនមែនដួលឯណា។ មកដល់ថ្ងៃនេះនៅឈររឹងតើ! ហើយខ្ញុំគិតថា កាលណាយើងទោរទន់ទៅលើអ្វីដែលគេជួយហ្នឹង យើងអត់រឹងមាំទេ។ យើងឃើញហើយ កាលអាមេរិកអត់ឲ្យប្រព័ន្ធអនុគ្រោះពន្ធ គេគិតថា សេដ្ឋកិច្ចយើងចុះមកនៅ ៦ភាគរយ តែមិនអញ្ចឹងឯណា ពេលនោះសេដ្ឋកិច្ចយើង ៧.៥ភាគរយ។ នេះជាឧទាហរណ៍»។
ក្នុងរបាយការណ៍នាំចេញអង្ករទៅលក់នៅទីផ្សារអន្តរជាតិឆ្នាំ២០១៨នេះ កម្ពុជានាំចេញទៅលក់បានជាង ៦២ម៉ឺនតោន ថយចុះ១,៥ភាគរយ បើធៀបនឹងការនាំចេញ ៦៣ម៉ឺនតោនកាលពីឆ្នាំ២០១៧។
របាយការណ៍ដដែលបានឲ្យដឹងថា អង្ករកម្ពុជាដល់ទៅជិត ២៧ម៉ឺនតោន ត្រូវបាននាំចូលទៅកាន់ទីផ្សារសហគមន៍អឺរ៉ុប ដែលធ្វើឲ្យអឺរ៉ុបក្លាយជាទីផ្សារធំបំផុតសម្រាប់អង្ករកម្ពុជាមានចំណែកដល់ទៅជាង ៤៣ភាគរយនៃតួលេខអង្ករកម្ពុជានាំចេញទៅទីផ្សារអន្តរជាតិ៕
