លោកនាយករដ្ឋមន្ត្រីហ៊ុន សែន នឹងទៅបំពេញទស្សនកិច្ចនៅចិនចំនួន៤ថ្ងៃចាប់ពីថ្ងៃអាទិត្យស្អែកនេះ ហើយគ្រោងចុះហត្ថលេខាលើកិច្ចព្រមព្រៀងមួយចំនួន។
តាមហ្វេសប៊ុករបស់លោកនាយករដ្ឋមន្ត្រីគឺលោកចាប់ផ្តើមចាកចេញពីកម្ពុជានៅថ្ងៃទី២០ស្អែកនេះ និងបញ្ចប់ទស្សនកិច្ចនៅថ្ងៃទី២៣ខែមករា។ លោកបញ្ជាក់ថា មានកិច្ចព្រមព្រៀងមួយចំនួនបានត្រៀមរួចហើយ សម្រាប់ចុះពេលទៅដល់ចិន។
លោកនាយករដ្ឋមន្ត្រីក៏បានលើកឡើងពីការទំនាក់ទំនងល្អ និងការជួយជ្រោមជ្រែងពីចិនដល់កម្ពុជា។
លោក ហ៊ុន សែន៖ «មិត្តចិនមានទំនាក់ទំនងល្អដូចជាបងប្អូន និងបានជួយកម្ពុជាយើងយ៉ាងច្រើនចាប់តាំងពីជំនាន់សម្តេចតាមកទល់សព្វថ្ងៃនេះ។ កម្ពុជា សូមអរគុណមិត្តចិន ចំពោះការជួយជ្រោមជ្រែងទាំងឡាយ ដែលបានធ្វើអោយកម្ពុជារីកចម្រើនមកទល់សព្វថ្ងៃ។»
ក្រោយការបោះឆ្នោតឆ្នាំ២០១៨ ចិនជាប្រទេសមួយដែលចេញមុខក្នុងការទទួលស្គាល់លទ្ធផលនៃការបោះឆ្នោត ខណៈសហរដ្ឋអាមេរិក និងអឺរ៉ុបចេញមុខមិនទទួលស្គាល់លទ្ធផលនៃការបោះឆ្នោតនេះ។
