របាយការណ៍ការសិក្សារបស់សាកលវិទ្យាល័យមួយក្នុងទីក្រុងប៉េកាំងបង្ហាញកាលពីថ្ងៃសុក្រម្សិលមិញថា ចំនួនអ្នកស្វែងរកការងារធ្វើនៅក្នុងប្រទេសចិនកើនឡើងដល់៤០ភាគរយ ដោយសារតែឥទ្ធិពលនៃសង្គ្រាមពាណិជ្ជកម្មជាមួយអាមេរិក។
របាយការណ៍សិក្សារបស់សាកលវិទ្យាល័យ Renmin ជាសាកលវិទ្យាល័យនៅក្នុងទីក្រុងប៉េកាំងល្បីខាងការស្រាវជ្រាវឲ្យដឹងថា ចាប់ពីថ្ងៃទី១ខែធ្នូឆ្នាំ២០១៨ ដល់ថ្ងៃទី១៩ខែមករា ឆ្នាំ២០១៩ ចិននាំចេញធ្លាក់ចុះ៤,៤ ភាគរយ ចំណែកការនាំចូលធ្លាក់ចុះ៧,៦ភាគរយ បើប្រៀបធៀបពេលដូចគ្នានៅឆ្នាំមុន។
ការសិក្សាក៏បានលើកឡើងពីឧបសគ្គរបស់ចិនកើនឡើងក្នុងការឆ្ពោះទៅរកការសម្រចគោលដៅដោយសារពាណិជ្ជកម្មនៅក្រៅប្រទេសកំពុងក្លាយជាក្តីកង្វល់។ ក្រុមហ៊ុន Foxconn ជាក្រុមហ៊ុនទទួលបានសិទ្ធិផលិតសម្ភារឲ្យiPhones ជាក្រុមហ៊ុនផលិតដែលត្រូវការកម្លាំងពលកម្មធំមួយនៅចិន បានសម្រេចកាត់បន្ថយកម្លាំងពលកម្មដោយសារការលក់ចេញថយចុះ។
អ្នកវិភាគនៅក្រុមហ៊ុនស្រាវជ្រាវ Gavekal លោក Ernan Cui បានសរសេរការវិភាគមួយថា ចិនកាន់តែប្រឈមបញ្ហាទីផ្សារការងារកាន់តែខ្លាំងបើសិនជាមិនមានការសម្របសម្រួលណាមួយជាមួយរដ្ឋអំណាចទីក្រុងវ៉ាស៊ីនតោន។
ចិនបានបង្កើតគោលនយោបាយអាទិភាពសម្រាប់ឆ្នាំ២០១៩គឺការបង្កើតការងារឲ្យបានគ្រប់គ្រាន់ ដោយបារម្ភបញ្ហានេះក្លាយជាវិបត្តិសង្គម។
នៅឆ្នាំ២០១៨ ចិនបានបង្កើតការងារចំនួន១៣លាន ដើម្បីឆ្លើយតបតម្រូវការការងារនៅក្នុងទី ក្រុង។
សហរដ្ឋអាមេរិក និងចិនចាប់ផ្តើមផ្ទុះសង្គ្រាមពាណិជ្ជកម្មតាំងពីខែកក្កដា ឆ្នាំ២០១៨ ហើយដំឡើងពន្ធលើទំនិញគ្នាទៅវិញទៅមក។ បច្ចុប្បន្នតំណាងរដ្ឋាភិបាលនៃប្រទេសទាំងពីរកំពុងតែចរចាស្វែងរកដំណោះស្រាយ ដែលតាមគម្រោងការចរចានឹងចប់នៅចុងខែមករានេះ។