គណបក្សនយោបាយមួយ បានចេញមុខថ្កោលទោសចំណាត់ការរបស់អឺរ៉ុប ដែលសម្រេចយកពន្ធគយលើស្រូវអង្ករកម្ពុជា ដោយចោទថា ប្លុកទីផ្សាររួមមួយនេះជឿតាមការញុះញង់របស់អតីតបក្សប្រឆាំង។
ក្នុងសេចក្ដីថ្លែងការណ៍កាលពីម្សិលមិញ គណបក្សខ្មែរអភិវឌ្ឍន៍សេដ្ឋកិច្ចបានហៅសេចក្ដីសម្រេចរបស់អឺរ៉ុបដែលយកពន្ធគយលើស្រូវអង្ករកម្ពុជាថា កំពុងសម្លាប់សិទ្ធិការងារ និងសិទ្ធិលំនៅឋានរបស់ពលរដ្ឋកម្ពុជា ដោយថា វិធានការនេះធ្វើឲ្យវិនិយោគិនបរទេសមិនចូលមកទិញអង្ករពីកម្ពុជា។
គណបក្សមួយនេះ បានលើកលើងថា សហគមន៍អឺរ៉ុបកំពុងធ្វើតាមការចង់បាន និងការញុះញង់របស់អតីតគណបក្សសង្គ្រោះជាតិ ជុំវិញការចោទថា រដ្ឋាភិបាលដឹកនាំដោយគណបក្សប្រជាជន បានរំលោភសិទ្ធិមនុស្ស និងសម្លាប់លទ្ធិប្រជាធិបតេយ្យនៅកម្ពុជា។
សហភាពអឺរ៉ុបបានសម្រេចយកពន្ធគយលើអង្ករនាំចូលពីប្រទេសកម្ពុជា និងប្រទេសភូមា សម្រាប់រយៈពេល៣ឆ្នាំជាប់គ្នា កាលពីថ្ងៃទី១៦មករាកន្លងមក ទៅតាមសំណើបណ្ដាសមាជិកដែលជាប្រទេសផលិតអង្ករនៅក្នុងសហគមន៍មួយនេះ។
ប៉ុន្ដែ រដ្ឋាភិបាលក៏បានចេញសេចក្ដីការណ៍មួយឆ្លើយតបផងដែរ ដោយចាត់ទុកវិធានការរបស់សហភាពអឺរ៉ុប (EU) យកពន្ធអង្ករនាំចូលពីកម្ពុជាថា ជាអាវុធសម្លាប់ប្រជាកសិករដែលបច្ចុប្បន្នកំពុងមានជីវភាពក្រីក្រ និងមានជាប់បំណុលនៅធនាគារ។
គណបក្សខ្មែរអភិវឌ្ឍន៍សេដ្ឋកិច្ច ស្ថិតក្នុងចំណោមគណបក្សនយោបាយ ១៦ទៀត ដែលត្រូវបានបញ្ចូលទៅក្នុងឧត្ដមក្រុមប្រឹក្សាពិគ្រោះ និងផ្ដល់យោបល់ ក្រោយគណបក្សនេះចូលរួមក្នុងការបោះឆ្នោតជាតិកាលពីចុងខែកក្កដាឆ្នាំមុន។
ឧត្ដមក្រុមប្រឹក្សានេះ បង្កើតឡើងដោយលោកនាយករដ្ឋមន្ត្រី ហ៊ុន សែន កាលពីពាក់កណ្ដាលខែសីហាឆ្នាំមុន បន្ទាប់ពីការបោះឆ្នោតជ្រើសរើសតំណាងរាស្ត្រកាលពីចុងខែកក្កដាកន្លងមក ដែលបានផ្ដល់ជ័យជម្នះទាំងស្រុងដល់គណបក្សប្រជាជនកម្ពុជា។
ក្រោយការបោះឆ្នោត លោក ហួន រាជចំរើន និងមេដឹកនាំគណបក្សនយោបាយ ៣០រូបទៀត ត្រូវបានលោកនាយករដ្ឋមន្ត្រី ហ៊ុន សែន ស្នើតែងតាំងជាសមាសភាពមួយរូបនៃឧត្ដមក្រុមប្រឹក្សាមួយនេះ ជាមួយឋានៈស្មើនឹងទេសរដ្ឋមន្ត្រី៕