មន្ត្រីរដ្ឋាករទឹកខេត្តព្រះសីហនុ បានឲ្យដឹងថា ក្រុងព្រះសីហនុ កំពុងប្រឈមមុខនឹងកង្វះខាតទឹកប្រើប្រាស់ហើយនាពេលសព្វថ្ងៃនេះ ហើយអាជ្ញាធរបានបន្ទោសបញ្ហានេះទៅលើកំណើននៃលំហូរចូលជនជាតិចិន និងកំណើនយ៉ាងលឿននៃគម្រោងសាងសង់នៅខេត្តជាប់ឆ្នេរសមុទ្រមួយនេះ។
ប្រធានអង្គភាពរដ្ឋាករទឹកខេត្តព្រះសីហនុ លោក ផន រតនៈ ប្រាប់ វីអូឌី នៅថ្ងៃនេះថា ការផ្គត់ផ្គង់ទឹកសម្រាប់ការប្រើប្រាស់នៅក្នុងទីក្រុងព្រះសីហនុ នៅខ្វះជាង១ម៉ឺនម៉ែត្រគូបទៀតក្នុងមួយថ្ងៃៗ ខណៈដែលទំហំនៃការប្រើប្រាស់ទឹកនៅក្នុងក្រុងមួយនេះ បានកើនឡើងដល់ជិត៤ម៉ឺនម៉ែត្រគូបក្នុងមួយថ្ងៃ។
មន្ត្រីរដ្ឋាករទឹករូបនេះ បានឲ្យដឹងថា កង្វះខាតមធ្យោបាយបញ្ជូនទឹកទៅស្តុកទុកនៅស្ថានីយ៍ស្តុកទឹក កំណើននៃការហូរចូលរបស់ជនជាតិចិន និងកំណើននៃគម្រោងសាងសង់ គឺជាដើមចមនៃកង្វះខាតទឹកប្រើប្រាស់នៅទីក្រុងមួយនេះ។
លោក ផន រតនៈ ប្រាប់ថា៖ «តម្រូវការឡើងដល់ ៣៨០០០ម៉ែត្រគូបហើយ។ វាអាចខ្វះ ១៣៥០០ម៉ែត្រគូប ទៅ ១៤០០០ម៉ែត្រគូបទៀត។ ការកើនឡើងដោយសារការមកវិនិយោគរបស់ជនជាតិចិន មកធ្វើសំណង់សណ្ឋាគារ ការតាំងទីលំនៅថ្មី ប្រកបអាជីវកម្មថ្មីធ្វើឲ្យកំណើនឡើងកាន់តែខ្ពស់ ហក់ឡើង ១ គុណ ២ គុណនឹង ៣»។
របាយការណ៍របស់ក្រសួងទេសចរណ៍ បានឲ្យដឹងថា ភ្ញៀវទេសចរចិនបានមកទស្សនាប្រទេសកម្ពុជាមានចំនួនជិត ២លាននាក់ នៅក្នុងរយៈពេល ១០ខែ ឆ្នាំ២០១៨កន្លងមកនេះ ដោយបានកើនឡើងជាង ៧០ភាគរយ បើធៀបនឹងតួលេខរយៈពេល ១០ឆ្នាំក្នុងឆ្នាំ២០១៧កន្លងមក។
របាយការណ៍របស់ក្រសួងមហាផ្ទៃចេញផ្សាយកាលពីខែកញ្ញា ឆ្នាំ២០១៨ បង្ហាញថា ជនជាតិដល់ទៅ ៧៨,០០០នាក់ បានចូលមកស្នាក់នៅ និងធ្វើការងារនៅក្នុងខេត្តព្រះសីហនុ ខណៈដែលខេត្តមួយនេះមានប្រជាជនខ្មែរខ្ទង់ ១៣,០០០គ្រួសារ។
មន្ត្រីសម្របសម្រួលសមាគមអាដហុកប្រចំាខេត្តសីហនុ អ្នកស្រី ជាប សុធារី បានទទួលស្គាល់ថា កំណើននៃជនជាតិនៅក្នុងខេត្តនេះ គឺជាដើមចមនៃកង្វះខាតទឹកប្រើប្រាស់ ប៉ុន្តែ អ្នកស្រីក៏បានបន្ទោសបញ្ហានេះទៅលើការបាត់បង់បឹងព្រែកទប់ដែលមានទំហំ ១៦ហិកតានោះ ត្រូវបានក្រុមហ៊ុន អានកូ បានចាក់ដីលុបអស់ទំហំ ៨ហិកតាទៅហើយ។
លោកស្រី ជាប សុធារី ប្រាបថា៖ «មានវិធានការស្តារបឹង [បឹងព្រែកទប់] ឡើងវិញ ថែរក្សាធ្វើម៉េចឲ្យទឹកបឹង វាអាចមានគុណភាពក្នុងការប្រើប្រាស់ ក៏វាជាការរួមចំណែកមួយតូច ហើយមួយទៀត ប្រភពទឹកនៅតំបន់ក្បាលឆាយ ក៏គួរតែក្រុមហ៊ុន ខាងធនធានទឹក គួរតែជជែកពិភាក្សាគ្នាដែរ ធ្វើយ៉ាងណាដើម្បីជំរុញឲ្យខាងបច្ចេកទេសក្នុងការផ្គត់ផ្គង់ទឹករបស់ក្រុមហ៊ុន អានកូ គាត់ធ្វើម៉េចឲ្យទឹកបានទៅដល់ប្រជាពលរដ្ឋតាមតម្រូវការ»។
រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន បានជូនដំណឹងទៅដល់ប្រជាពលរដ្ឋ និងអាជ្ញាធរកាលពីសប្ដាហ៍មុន ឲ្យប្រើប្រាស់ទឹកដោយសន្សំសំចៃ ខណៈដែលក្រសួងធនធានទឹក និងឧតុនិយម បានព្យាករថា ប្រទេសកម្ពុជានឹងប្រឈមមុខនឹងអាកាសធាតុក្ដៅហួតហែងជាងឆ្នាំមុនចន្លោះពី ៤០ ទៅ ៤២អង្សានៅក្នុងរដូវប្រាំងនៅឆ្នាំនេះ៕