អាជ្ញាធរគ្រប់គ្រងគ្រោះមហន្តរាយរបស់កម្ពុជា លើកឡើងថា ការហាមធ្វើស្រែប្រាំងលើកទី២ក្នុងឆ្នាំ២០១៩នេះ នឹងមិនប៉ះពាល់ដល់សន្តិសុខស្បៀង និងការនាំចេញរបស់កម្ពុជានោះឡើយ ប៉ុន្តែថា ជាវិធានការបង្ការការខាតបង់របស់ប្រជាកសិករ។
សារាចរណែនាំចុះថ្ងៃទី១៧ មករា ដើម្បីរក្សាទឹកទុកប្រើប្រាស់សម្រាប់រដូវប្រាំងឆ្នាំនេះ លោកនាយករដ្ឋមន្ត្រីហ៊ុន សែន បានណែនាំឲ្យធ្វើស្រែប្រាំងតែមួយលើកប៉ុណ្ណោះនៅរដូវប្រាំងនេះ។
អ្នកនាំពាក្យអាជ្ញាធរគ្រប់គ្រងគ្រោះមហន្តរាយ លោក កែវ វី បានប្រាប់ VOD ថា រដ្ឋាភិបាលបានសម្រេចបែបនេះ គឺដើម្បីរក្សាទឹកទុកប្រើប្រាស់លើដំណាំផ្សេង និងកុំឲ្យជួបបញ្ហាដូចកាលពីឆ្នាំ២០១៦ ហើយលោកថា បញ្ហាអាកាសធាតុនៅរដូវប្រាំងនេះ នឹងមិនប៉ះពាល់ដល់សន្តិសុខស្បៀង និងការនាំចេញអង្កររបស់កម្ពុជានៅឆ្នាំ២០១៩នោះទេ។
លោក កែវ វី ប្រាប់ថា៖ «ការធ្វើលើសផែនការ គឺលើសហើយ ១២៦ភាគរយនៃផែនការក្នុងឆ្នាំហ្នឹង។ ដូច្នេះ មានន័យថា យើងខិតខំប្រឹងជួយសង្គ្រោះអ្វីដែលលើសហ្នឹង! ដូច្នេះ បើទោះបីជាមានការប៉ះពាល់ក៏នៅក្នុងចំណែកដែលលើសហ្នឹងដែរ មិនប៉ះពាល់ដល់សន្តិសុខស្បៀងរបស់ប្រទេសយើងទេ»។
របាយការណ៍បិទបញ្ចប់ការងារបង្កបង្កើនផលស្រូវវស្សារបស់ក្រសួងកសិកម្មនៅឆ្នាំ២០១៨ ឲ្យដឹងថា ការងារបង្កបង្កើនផលស្រូវវស្សាឆ្នាំ ២០១៨ សម្រេចបានជាង ២.៧៣លានហិតា ស្មើនឹង ១០៨.៨៣ភាគរយ នៃផែនការដាំដុះ។
អគ្គលេខាធិការរងនៃក្រុមប្រឹក្សាស្ដារ និងអភិវឌ្ឍន៍វិស័យកសិកម្ម និងជនបទ និងជាប្រធានអង្គភាពសន្តិសុខស្បៀង និងអាហារូបត្ថម្ភកម្ពុជាលោក សុខ ស៊ីឡូ មានប្រសាសន៍ប្រាប់ VOD ថា បើតាមចំនួនដែលកម្ពុជាផលិតបាននាឆ្នាំកន្លងទៅ គឺកម្ពុជាមិនមានបញ្ហាប្រឈមនឹងសន្តិសុខស្បៀងក្នុងឆ្នាំ២០១៩នេះនោះទេ។
លោកថា៖ «ជាធម្មតា ស្បៀងយើងប្រើសម្រាប់ប្រជាជនជាង ១៦លាននាក់ គឺត្រូវការតែ ៤លានតោនទេ! ហើយស្រូវយើងផលិតបានជាធម្មតាដល់ទៅ ១០លានតោនច្រើនណាស់! អញ្ចឹង ប្រសិនជាថយចុះយ៉ាងណា គឺមិនអាចថយចុះដល់ក្រោម ៥លានតោនទេ»។
អនុប្រធានសហព័ន្ធស្រូវអង្ករកម្ពុជា លោក ហ៊ុន ឡាក់ មានប្រសាសន៍ថា ក្នុងមួយឆ្នាំកម្ពុជាអាចនាំអង្ករទៅក្រៅប្រទេសបានប្រមាណ ៦២ម៉ឺនតោន ហើយបើធៀបទៅនឹងទិន្នផលដែលកម្ពុជាធ្វើបានកាលពីឆ្នាំ២០១៨ មកដល់ពេលនេះ គឺកម្ពុជានៅតែមានលទ្ធភាពស្តុកទុក និងនាំអង្ករចេញតាមធម្មតានារដូវប្រាំងខាងមុខ។
លោកថា៖ «ជាទូទៅ ទិន្នផលស្រូវក្នុងរដូវប្រាំងដែលកម្ពុជាជួបប្រទះនៅឆ្នាំហ្នឹង នឹងធ្វើឲ្យផលស្រូវសម្រាប់ឆ្នាំ២០១៩ វានឹងថយបរិមាណនៃការដាំដុះ និងបរិមាណស្រូវ។ តែយើងប្រយ័ត្នជៀសវាងនូវការខាតបង់នៅពេលដាំហើយខ្វះទឹកភ្លៀង។ រឿងហ្នឹងជាធម្មតាទេ ការបង្កបង្កើនផលមានឆ្នាំណាល្អទៅ ហើយឆ្នាំខ្លះមិនសូវជាល្អ ដោយសារបម្រែបម្រួលអាកាសធាតុ»។
ប្រធានអង្គការកសិកម្មសេដាក លោកស្រី តុង ចាន់ធាង មានប្រសាសន៍ថា បើទោះបីការផ្អាកការធ្វើស្រែប្រាំងលើកទីពីរមិនប៉ះពាល់ដល់សន្តិសុខស្បៀង និងការនាំចេញរបស់កម្ពុជាពិតមែន តែអ្នកស្រីយល់ថា វាអាចធ្វើឲ្យប៉ះពាល់ដល់ចំណូលរបស់កសិករមួយផ្នែកដែរ។
លោកស្រីថា៖ «ពាក់ព័ន្ធនឹងរឿងច្រើនជាសន្តិសុខស្បៀង ព្រោះយើងសង្កេតឃើញអ្នកដែលធ្វើស្រូវប្រាំងហ្នឹងភាគច្រើនមិនមែនសម្រាប់ហូបទេ គឺធ្វើសម្រាប់លក់»។
កម្ពុជានៅមិនទាន់ចេញរបាយការណ៍ពីការងារកសិកម្មក្នុងឆ្នាំ២០១៨នៅឡើយទេ តែរដ្ឋមន្ត្រីក្រសួងកសិកម្ម លោក វេង សាខុន ធ្លាប់បានលើកឡើងកាលពីពាក់កណ្តាលឆ្នាំ២០១៨ថា ផលិតកម្មស្រូវអង្ករនាឆ្នាំ២០១៨ អាចមានកំណើនកើនជាងឆ្នាំ២០១៧ ដែលផលិតបានជាង ១០លានតោន។
របាយការណ៍នៃការនាំចេញអង្ករកម្ពុជាក្នុងឆ្នាំ២០១៨ បានបង្ហាញថា កម្ពុជានាំចេញបានជាង ៦២ម៉ឺនតោន ប៉ុន្តែ បានថយចុះ ១.៥ភាគរយ បើធៀបនឹងឆ្នាំ២០១៧កន្លងមក៕
