អាជ្ញាធរខេត្តបន្ទាយមានជ័យ បានឱ្យដឹងថា ស្រូវប្រាំងលើកទី២ទំហំជាង ១ម៉ឺនហិកតារបស់ពលរដ្ឋនៅតំបន់អាងត្រពាំងថ្ម ស្ថិតក្នុងខេត្តបន្ទាយមានជ័យ កំពុងប្រឈមនឹងការខូចខាត បន្ទាប់ពីគ្មានទឹកសម្រាប់ស្រោចស្រពគ្រប់គ្រាន់។ នេះបើតាមការផ្សព្វផ្សាយរបស់ទំព័រហ្វេសប៊ុករបស់ក្រសួងធនធានទឹក និងឧតុនិយម នៅថ្ងៃនេះ។
យោងតាមទំព័រហ្វេសដដែលនេះ ប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ លោក យឹម ប៊ុនរ៉ុម បានលើកឡើងថា ស្រូវប្រាំងលើកទី២ទំហំដល់ទៅ ១៣,០០០ហិកតានៅ ប្រឈមនឹងការខូចខាតច្រើន បន្ទាប់ពីស្រូវទាំងនោះ ត្រូវបានដាំដុះអស់រយៈពេល ១ខែមកហើយនោះ។
មន្ត្រីធនធានទឹករូបនេះ បានឲ្យដឹងផងដែរថា អាងទឹកត្រពាំងថ្ម ពុំអាចផ្គត់ផ្គង់ទឹកសម្រាប់ស្រូវប្រាំងលើកទី២នេះឡើយ ដោយសារអាងស្តុកទឹកមួយនេះ ទទួលបានទឹកភ្លៀងកម្ពស់ប្រហែល ៨០០មីលីម៉ែត្រប៉ុណ្ណោះនៅក្នុងរដូវវស្សាកន្លងមកនេះ។
បើតាមការផ្សាយនៃទំព័រហ្វេសប៊ុកដដែលនេះ មន្ត្រីខេត្តបន្ទាយមានជ័យ ក៏បានណែនាំពលរដ្ឋមិនឲ្យដាំដុះស្រូវប្រាំងលើកទី២នេះតាំងពីខែតុលាឆ្នាំមុនមកម៉្លេះ ប៉ុន្តែ ពុំមានប្រសិទ្ធភាពនោះឡើយ។
លោក យឹម ប៊ុនរ៉ុម ត្រូវបានដកស្រង់សម្ដីដែលនិយាយថា ទឹកអាងត្រពាំងថ្ម នៅសល់ត្រឹមតែ ១៥លានម៉ែត្រគូបប៉ុណ្ណោះគិតត្រឹមថ្ងៃទី២១ ខែមករានេះ។
កាលពីសប្តាហ៍មុន រដ្ឋាភិបាលបានចេញសារាចរណែនាំមួយ ឱ្យមន្ត្រីពាក់ព័ន្ធ និងពលរដ្ឋ មានវិធានការ ព្រមទាំងចូលរួមប្រើប្រាស់ទឹកដោយស្មារតីសន្សំសំចៃ ចំពេលដែលប្រទេសកម្ពុជានឹងប្រឈមមុខនឹងអាកាសធាតុកាន់តែក្ដៅខ្លាំងនៅរដូវប្រាំងនេះ និងហាមមិនឱ្យពលរដ្ឋធ្វើស្រែប្រាំង ពីរដងទេនៅឆ្នាំនេះ៕
