សហភាពអឺរ៉ុបនិងថៃនៅតែជាដៃគូពាណិជ្ជកម្មសំខាន់ បើទោះជាស្ថានភាពនយោបាយនៅក្នុងប្រទេសថៃមានការប្រែប្រួលមួយរយៈកាលចុងក្រោយញឹកញាប់ រហូតដល់បច្ចុប្បន្នស្ថិតនៅក្នុងការគ្រប់គ្រងក្រោមរបបយោធាក៏ដោយ។
កាលពីថ្ងៃទី២២ ខែឧសភា ឆ្នាំ២០១៤ ពួកយោធាធ្វើរដ្ឋប្រហារទម្លាក់រដ្ឋាភិបាលស៊ីវិលដឹកនាំដោយលោកស្រី យីង ឡាក់ ហើយក្រុមយោធាដឹកនាំដោយលោកប្រាយុទ្ធ ចាន់អូចា បន្តកាន់អំណាចរហូតដល់បច្ចុប្បន្ន។
ការដឹកនាំរបស់ពួកយោធា
ពួកយោធាបានរឹតត្បិតសិទ្ធិសេរីភាពនៃការបញ្ចេញមតិរបស់អ្នកយោបាយ សង្គមស៊ីវិល បណ្តាញសារព័ត៌មាន និងប្រជាពលរដ្ឋទូទៅ។
កាលនោះបណ្តាប្រទេសលោកសេរី រួមមានទាំងសហភាពអឺរ៉ុប និងអាមេរិក ផងនោះបានថ្កោលទោស និងចាត់វិធានការមួយចំនួនលើរដ្ឋាភិបាលយោធាថៃ។
នៅក្នុងខែតុលាឆ្នាំ២០១៤ សមាជិកសភាអឺរ៉ុបច្រើនលើសលប់បានបោះឆ្នោតថ្កោលទោលរដ្ឋាភិបាលយោធាថៃហើយបានដាក់ប្រទេសនេះ ក្នុងគោលដៅនៃការដាក់ទណ្ឌកម្ម ហើយបានរឹតបន្តឹងទំនាក់ទំនងសេដ្ឋកិច្ច និងទំនាក់ទំនងការទូត។
រហូតដល់ខែមេសា ឆ្នាំ២០១៥ សហភាពអឺរ៉ុបបានឈានទៅមុខមួយជំហានទៀត គឺការផ្តល់កាតលឿងដល់ប្រទេសថៃ បន្ទាប់ពីអង្គការអន្តរជាតិមួយនេះរកឃើញថា ថៃគឺជាប្រទេសដែលមានការជួញដូរមនុស្សដើម្បីប្រើប្រាស់កម្លាំងពលកម្មក្នុងវិស័យនេសាទសមុទ្រ។
ថៃជាប្រទេសធំលំដាប់ទីបីក្នុងការនាំចេញអាហារសមុទ្រលក់លើពិភពលោក ហើយអឺរ៉ុបជាទីផ្សារធំរបស់ថៃ។
នយោបាយការបរទេសរបស់ថៃ
ទាក់ទងការចោទថា មានការជួញដូរមនុស្សក្នុងឧស្សាហកម្មនេសាទគឺរដ្ឋាភិបាលថៃបានប្តេជ្ញាជាមួយអឺរ៉ុបថា នឹងដោះស្រាយរឿងនេះ។ អាជ្ញាធរថៃបានចុះត្រួតពិនិត្យកប៉ាល់នេសាទជាង៥០០គ្រឿង ហើយរកឃើញថា មានកប៉ាល់៩០គ្រឿង ដែលបានរំលោភច្បាប់បំពានសិទ្ធិពលករមកពីប្រទេសជិតខាង។ វិធានការមានបន្តបន្ទាប់ទៀតដែលបង្ហាញពីការសហការជាមួយសហភាពអឺរ៉ុប។
ចំណែកស្ថានភាពលទ្ធិប្រជាធិបតេយ្យវិញ របបយោធាបានសន្យា និងបង្ហាញពីការប្រឹងប្រែងរបស់ខ្លួនដើម្បីរៀបចំការបោះឆ្នោតឡើងវិញតាមរយៈការរៀបចំរដ្ឋធម្មនុញ្ញថ្មី និងដាក់ឲ្យពលរដ្ឋថៃបោះឆ្នោតធ្វើប្រជាមតិកាលពីខែសីហាឆ្នាំ២០១៧។
បើទោះជារបបយោធាពន្យារពេលបោះឆ្នោតម្តងហើយម្តងទៀតគឺរហូតដល់ពេលនេះ៥លើករួចមកហើយក៏ដោយ ក៏មិនមានការប៉ះទង្គិចជាមួយសហភាពអឺរ៉ុបដែរព្រោះថា ក្រុមនេះនៅតែមានឆន្ទៈស្តារប្រជាធិបតេយ្យប៉ុន្តែស្ថានភាពមិនទាន់អំណោយផល។
រហូតដល់ថ្ងៃទី១១ ខែធ្នូ ឆ្នាំ២០១៧ សហភាពអឺរ៉ុបបានប្រកាសបើកការទំនាក់ទំនងជាមួយថៃគ្រប់ផ្នែកជាធម្មតាវិញ៕