តំណាងពលរដ្ឋមានជម្លោះដីធ្លីនៅក្នុងស្រុកជាំក្សាន្ត បានឲ្យដឹងថា ពលរដ្ឋ ៧នាក់ទៀត ត្រូវបានអាជ្ញាធរខេត្តព្រះវិហារ ចាប់ខ្លួន ហើយផ្ទះសម្បែង ៣ខ្នងរបស់អ្នកភូមិ និងម៉ូតូ ១គ្រឿង ត្រូវបានដុតបំផ្លាញកាលពីថ្ងៃម្សិលមិញនេះ នៅក្នុងជម្លោះដីធ្លីមួយ ដែលនាំឲ្យអ្នកភូមិ ១០នាក់ត្រូវបានសមត្ថកិច្ចខេត្តនេះចាប់ខ្លួនគិតត្រឹមថ្ងៃនេះ។
លោក ឡយ លីហួរ ដែលអះអាងថា ជាតំណាងប្រជាជននៅភូមិអន្ទិល ស្ថិតនៅក្នុងឃុំយាង បានប្រាប់ វីអូឌី នៅថ្ងៃនេះថា មន្ត្រីយោធា មន្ត្រីតុលាការ និងអាជ្ញាធរពាក់ព័ន្ធផ្សេងទៀត បានចុះទៅភូមិរបស់លោកកាលពីថ្ងៃអាទិត្យកន្លងមកនេះ ហើយបានចាប់ខ្លួនពលរដ្ឋ ៧នាក់ទៀត ព្រមទាំងដុតផ្ទះអ្នកភូមិអស់ ៣ខ្នង ម៉ូតូ ១គ្រឿង និងដកហូតម៉ូតូ ៤គ្រឿងផ្សេងទៀត។
លោក ឡយ លីហួរ បានឲ្យដឹងទៀតថា ប្រជាជន ១០នាក់ហើយ ត្រូវបានសមត្ថកិច្ចខេត្តនេះចាប់ខ្លួនចាប់តាំងពីថ្ងៃទី១៩ ខែមករាកន្លងមកនេះ នៅក្នុងជម្លោះដីធ្លីមួយរវាងអ្នកភូមិ និងក្រុមហ៊ុនមេត្រីភាព។
តំណាងអ្នកភូមិរូបនេះ បានហៅវិធានការរបស់អាជ្ញាធរថា ធ្វើបាបប្រជាពលរដ្ឋស្លូតត្រង់ និងធ្វើឲ្យពួកគេរងភាពអយុត្តិធម៌មួយកម្រិតទៀត នៅក្នុងជម្លោះដីធ្លីជាមួយក្រុមហ៊ុន ដែលមិនទាន់ត្រូវបានដោះស្រាយជូនពួកគេនៅឡើយ។
លោកមានប្រសាសន៍ថា៖ «គាត់មិនរកដំណោះស្រាយឲ្យ គាត់ចេះតែចាប់ប្រជាពលរដ្ឋដាក់គុក។ វាអយុត្តិធម៌។ ពួកខ្ញុំមិនចេះច្បាប់ ក៏គួរគាត់ជួយពន្យល់ថា វាខុសច្បាប់យ៉ាងម៉េច មានសំណង ឬមិនមានសំណង ឬក៏ទៅដោះស្រាយយ៉ាងម៉េច ក៏គួរតែគាត់ជូនដំណឹងប្រាប់យើងដែរ មិនត្រូវឲ្យមកចាប់ប្រជាជនវាយដំ ដុតផ្ទះឆេះអស់ទេ»។
អ្នកភូមិម្នាក់ទៀត គឺអ្នកស្រី ភឹម ម៉ៅ ដែលស្វាមី និងកូនប្រុសរបស់គាត់ត្រូវបានសមត្ថកិច្ចចាប់ខ្លួនក្នុងចំណោមអ្នកភូមិ ៧នាក់នោះ បានរៀបរាប់សំឡេងខ្សឹបខ្សួលថា បានអំពាវនាវទៅរដ្ឋាភិបាល ឲ្យដោះលែងស្វាមី និងកូនប្រុសរបស់គាត់ ឲ្យមានសេរីភាពឡើងវិញ និងផ្តល់ដីជូនពួកគេវិញផង។
អ្នកស្រីនិយាយថា៖ «សុំឲ្យសម្តេចជួយខ្ញុំ ធ្វើម៉េចឲ្យខ្ញុំបានដីនៅវិញផង ផ្ទះក៏អស់ ប្តីក៏គេចាប់ ម៉ូតូក៏គេយកហើយអស់។ ខ្ញុំមានតែសំបកខ្លួនទទេ»។
អភិបាលស្រុកជំាក្សាន្ត លោក ជា គឹមសេង បានទទួលស្គាល់ថា មន្ត្រីសមត្ថកិច្ចចម្រុះមកពីមន្ទីរបរិស្ថាន និងតុលាការខេត្ត ពិតជាបានចាប់ខ្លួនពលរដ្ឋពិតប្រាកដមែនកាលពីថ្ងៃម្សិលមិញនេះ ហើយលោកបង្វែរឲ្យទៅសួរមន្ត្រីតុលាការវិញជុំវិញការឃុំខ្លួនអ្នកភូមិទាំងនោះ។
លោកមានប្រសាសន៍ថា៖ «ពិជាមានការចាប់ខ្លួនមែន…ខ្ញុំអត់ដឹងដែរ ដូចខ្ញុំបានលើកឡើងខាងដើម គឺ រដ្ឋបាលស្រុកពុំបានជាអ្នកបញ្ជាឲ្យចាប់ខ្លួនទេ គឺមន្ត្រីជំនាញ បរិស្ថាន ហើយព្រះរាជអាជ្ញាតែម្តង»។
ព្រះរាជអាជ្ញាសាលាដំបូងខេត្តព្រះវិហារ លោក ទី សុវិនថាល់ ឲ្យដឹងថា សមត្ថកិច្ចឃាត់ខ្លួនមនុស្ស ៧នាក់បន្ថែមទៀត ដើម្បីសួរនាំ ហើយលោកថា បើរកឃើញបទល្មើស ពលរដ្ឋទាំងនោះនឹងត្រូវបញ្ជូនទៅចៅក្រមបន្តតាមនីតិវិធីច្បាប់។
លោក ទី សុវិនថាល់ មានប្រសាសន៍ថា៖ «កាលណាគេបញ្ជូនមក បញ្ជូនទៅហើយ ចោទប្រកាន់ទៅតុលាការ។ ចៅក្រមទទួលបន្ទុកស៊ើបសួរ ចោទប្រកាន់…គេមានសិទ្ធិឃុំ ឬមិនឃុំ បើគេមិនឃុំ មនុស្សទៅវិញ»។
មន្រ្តីសម្របសម្រួលសមាគមការពារសិទ្ធិមនុស្សអាហុកប្រចាំខេត្តព្រះវិហារ លោក ឡោ ចាន់ បានហៅទង្វើសមត្ថកិច្ចចាប់ខ្លួនពលរដ្ឋនេះថា ជាការរំលោភសិទ្ធិមនុស្សធ្ងន់ធ្ងរ ខណៈដែលលោកថា ករណីនេះ មិនមែនជាបទល្មើសជាក់ស្ដែង ឬបទល្មើសព្រហ្មទណ្ឌនោះឡើយ។
មន្ត្រីឃ្លាំមើលសិទ្ធិមនុស្សរូបនេះ៖ «បើសិនជាអាជ្ញាធរ គាត់នៅតែមិនមានដំណោះស្រាយជូនប្រជាពលរដ្ឋ ដែលកំពុងមានជម្លោះជាមួយក្រុមហ៊ុនមេត្រីភាពនេះទេ រឿងនេះកាន់តែធ្ងន់ធ្ងរទៅៗ។ វាអាចឈានដល់អំពើហិង្សាផ្សេងៗទៀត។ ដូច្នេះ អាជ្ញាធរគួរណាធ្វើការដោះស្រាយក្រៅប្រព័ន្ធតុលាការវិញ ល្អជាងយកតុលាការ យកមកធ្វើជាការដោះស្រាយ»។
អ្នកភូមិចំនួន ១០រូបហើយ ត្រូវបានសមត្ថកិច្ចខេត្តព្រះវិហារចាប់ខ្លួន បន្ទាប់ពីពលរដ្ឋប្រហែល ៣០០គ្រួសារ នៅឃុំយាង មានជម្លោះដីធ្លីជាមួយក្រុមហ៊ុនមេត្រីភាពចាប់តាំងពីឆ្នាំ២០១៨មក ហើយអ្នកភូមិបានចោទក្រុមទាហាននៅកងវរៈសេនាតូចលេខ២៦១ថា បានការពារដីឲ្យក្រុមហ៊ុនមួយនេះ។
របាយការណ៍សង្ខេបមួយរបស់ក្រសួងរៀបចំដែនដី នគររូបនីយកម្ម និងសំណង់ ចេញផ្សាយចុងឆ្នាំមុន បានឲ្យដឹងថា វិវាទដីធ្លីទូទាំងប្រទេសជិត ១៥០០ករណីទៀត មិនទាន់បានដោះស្រាយចប់នៅឡើយ៕