អ្នកកាសែតម្នាក់នៅខេត្តសៀមរាប គ្រោងប្ដឹងទៅតុលាការដោយចោទប្រធានសហគមន៍មួយនៅខេត្តមួយនេះថា បានប្រើអំពើហិង្សាទៅលើរូបលោក អំឡុងពេលលោកចុះទៅយកព័ត៌មាន ក្រោយប៉ុស្តិ៍នគរបាលមូលដ្ឋានមិនចាត់ការ ហើយបានដោះលែងអ្នកប្រព្រឹត្តឲ្យមានសេរីភាពវិញ។
អ្នកយកព័ត៌មាននៅសមាគមអ្នកសារព័ត៌មានកម្ពុជាដើម្បីសេរីភាព លោក ស៊ីម ឈីវឈានពិសិដ្ឋ ប្រាប់ VOD តាមទូរសព្ទថា លោកនឹងដាក់ពាក្យបណ្តឹងទៅតុលាការ ក្រោយលោកចុះទៅយកព័ត៌មានពីការឈូសបំផ្លាញព្រៃលិចទឹកជុំវិញបឹងពារាំង ហើយទទួលរងហិង្សាពីសមាជិកសហគមបឹងពារាំង និងមិនមានដំណោះស្រាយពីនរគរបាលមូលដ្ឋាន។
លោក ស៊ីម ឈីវឈានពិសិដ្ឋ បានចោទប្រធានសហគមន៍ទេសចរណ៍វប្បធម៌ធម្មជាតិបឹងពារាំង លោក គង់ មង្គល ថា ជាអ្នកបញ្ជាឲ្យប្រព្រឹត្តហិង្សាលើរូបលោក។
លោក ស៊ីម ឈីវឈានពិសិដ្ឋ មានប្រសាសន៍ថា៖ «លោក គង់ មង្គល គាត់ចុះពីផឹកនៅអាកន្លែងហ្នឹង កន្លែងបឹងពារាំងដែលបោះជំរុំហ្នឹង គាត់ចុះមក គាត់ស្រែកប្រាប់កូនចៅគាត់ឲ្យចាប់ឲ្យវ៉ៃឲ្យងាប់។ បាទ! បញ្ជាផ្ទាល់ ខ្ញុំមានសាក្សីប្រាំនាក់ទៀត។ ហេតុការណ៍ហ្នឹងកើតឡើងប្រហែលជាម៉ោងជិត ៧យប់ ថ្ងៃទី២៦ ខែមករា ឆ្នាំ២០១៩ នៅតំបន់បឹងពារាំង សង្កាត់ចុងឃ្នាសហ្នឹងឯង!»។
ប្រធានសមាគមសហគមន៍ទេសចរណ៍វប្បធម៌ធម្មជាតិបឹងពារាំង លោក គង់ មង្គល បានបដិសេធចំពោះការចោទប្រកាន់នេះ ដោយថា លោកជាអ្នកចូលទៅអន្តរាគមន៍ជួយជនរងគ្រោះទៅវិញទេ។
លោក គង់ មង្គល មានប្រសាសន៍ថា៖ «អត់ទេបង វាមិនមែនការពិត! ការពិត ខ្ញុំនៅក្បែរកន្លែងកើតហេតុហ្នឹងដែរទេ ហើយខ្ញុំគ្រាន់ជាអ្នកទៅជួយបញ្ឈប់នូវសកម្មភាពដើម្បីកុំឲ្យវាកាន់តែធ្ងន់ ហើយរង់ចាំប៉ូលិសគេទៅដល់។ បាទ! ហើយចុងក្រោយចោទថា ខ្ញុំអ្នកបញ្ជា!»។
ទោះយ៉ាងណា លោក មង្គល ទទួលស្គាល់ថា ក្រុមការងារលោកជាអ្នកបង្កហិង្សា ដោយថា ពួកគេធ្លាប់គុំគួនពីរឿងលើលោក ពិសិដ្ឋ បង្ហោះព័ត៌មានទាក់ទងនឹងសហគមបឹងពារាំង រួមទាំងពួកគេស្រវឹងស្រាផង។
នាយប៉ុស្តិ៍នគរបាលរដ្ឋាបាលសង្កាត់ជ្រាវ លោក ស៊ត់ សៃ បដិសេធបកស្រាយករណីនេះ ហើយអធិការនគរបាលក្រុងសៀមរាប លោក ទេព ចាន់ណា ប្រាប់ថា លោកមិនទាន់អាចឆ្លើយតបបានដែរ ដោយលោកថា កំពុងជាប់ប្រជុំ។
សម្រាប់មន្ត្រីសិទ្ធិមនុស្សអង្គការអាដហុកប្រចាំខេត្តសៀមរាបដែលបានតាមឃ្លាំមើលរឿងនេះ លោក សួស ណារិន មានប្រសាសន៍ថា លោកសំណូមពរឲ្យតុលាការចាត់ការសំណុំរឿងនេះតាមនីតិវិធី ទោះជាមានសំណងក៏ដោយ ព្រោះនេះជាករណីព្រហ្មទណ្ឌ។
លោក សួស ណារិន មានប្រសាសន៍ថា៖ «ក្នុងនាមសង្គមស៊ីវិលយើងសុំឲ្យអនុវត្តនីតិវិធីទៅតាមផ្លូវតុលាការឲ្យមានស្តង់ដារតែមួយ កុំឲ្យមានស្តង់ដារពីរ។ ធ្វើម៉េចអ្នកណាដែលប្រព្រឹត្តទោសត្រូវទទួលទោសតាមច្បាប់ គឺទោះបីមានសំណងក៏ដោយ ក៏យើងមិនអាចបញ្ចប់បានដែរព្រោះនេះជារឿងព្រហ្មទណ្ឌ។ ហើយបណ្តឹងគាត់ដាក់ទៅបណ្តឹងទៅតុលការថ្ងៃ២៨នេះហើយ បន្ទាប់ពីគាត់ដាក់នៅប៉ុស្តិ៍ម្សិលមិញរួចហើយ ថ្ងៃនេះគាត់នឹងដាក់បញ្ជូនសំណុំរឿងទៅតុលាការទៀត»។
លោក ស៊ីម ឈីវឈានពិសិដ្ឋ បានប្រាប់ឲ្យដឹងថា លោកបានចុះទៅយកព័ត៌មានពីបទល្មើសនេសាទកាលពីល្ងាចថ្ងៃទី២៦ ខែមករា បន្ទាប់ពីទទួលបានសេចក្ដីរាយការណ៍ពីពលរដ្ឋពីបទល្មើសនេសាទ ហើយបានជួបហេតុការណ៍ហិង្សាដូច្នេះ។
ចំណែក លោក គង់ មង្គល ឲ្យដឹងថា ពួកលោកទាំងពីរធ្លាប់មានរឿងក្តីជាមួយគ្នាកន្លងមក ដោយសារលោក ពិសិដ្ឋ ផ្សាយព័ត៌មានមិនពិតពីសហគមន៍របស់លោក។
ចាប់តាំងពីឆ្នាំ១៩៩៤មក អ្នកសារព័ត៌មាននៅកម្ពុជាយ៉ាងតិចចំនួន ១៣នាក់ ត្រូវបានគេសម្លាប់ ប៉ុន្តែ រហូតមកដល់បច្ចុប្បន្ននេះ អាជ្ញាធរមិនទាន់ចាប់ជនល្មើសមកផ្ដន្ទាទោសនោះឡើយ។
ក្នុងចំណោមអ្នកសារព័ត៌មានចំនួន ១៣នាក់ មាន ៥នាក់ជាអ្នកកាសែតដែលសសេររិះគន់បក្សកាន់អំណាច ចំណែក ៧នាក់ទៀត ធ្វើការស៊ើបអង្កេត និងរាយការណ៍អំពីអំពើពុករលួយពាក់ព័ន្ធនឹងបុគ្គលជាន់ខ្ពស់ក្នុងជួររដ្ឋាភិបាល និងស្ថាប័នយោធា៕