អ្នកនាំពាក្យរដ្ឋាភិបាលប្រកាសផ្តល់រង្វាន់ចំពោះអ្នកណាដែលរកឃើញឱពុកម្តាយ ឬ កន្លែងស្នាក់នៅរបស់អ្នកប្រើប្រាស់ហ្វេសប៊ុកម្នាក់ដោយចោទថា ប្រមាថជីវិតលោកនាយករដ្ឋមន្ត្រី ហ៊ុន សែន។
សរសេរនៅលើហ្វេសប៊ុករបស់លោកកាលពីម្សិលមិញ លោក ផៃ ស៊ីផាន បានចោទប្រកាន់អ្នកប្រើប្រាស់ហ្វេសប៊ុកឈ្មោះ ថារិទ្ធិ ប៊ុន (Tharith Bun) ថា បានប្រមាថជីវិតលោកនាយករដ្ឋមន្ត្រីជាសាធារណៈ។
លោក ផៃ ស៊ីផាន៖ «សូមជួយ ផ្សព្វផ្សាយ និង ស្វែងរកឪពុកម្តាយបុរសរូបនេះ និង កន្លែងស្នាក់នៅរបស់វា ជូនរង្វាន់! ជាពិសេស អាជ្ញាធរ មេមុត ។ វាប្រមាថជិវិតសម្តេចតេជោជាសាធារណៈ។»
លោក ផៃ ស៊ីផាន មិនបានបញ្ជាក់ថា ការប្រមាថនោះធ្វើឡើងដោយរបៀបណា និងបានប្រើប្រាស់ពាក្យពេចន៍អ្វីខ្លះនោះទេ។
នៅលើហ្វេសប៊ុកឈ្មោះថា រិទ្ធិ ប៊ុន នេះ បង្ហាញថា អ្នកប្រើប្រាស់កំពុងតែរស់នៅក្នុងទីក្រុងបាងកកប្រទេសថៃ។ នៅក្នុងខ្លឹមសារភាគច្រើនដែលហ្វេសប៊ុកនេះបានចែករំលែកគឺអំពើហិង្សាទាក់ទងជាមួយជម្លោះដីធ្លី និង សាររិះគន់លើការដឹកនាំរបស់លោកនាយករដ្ឋមន្ត្រីហ៊ុន សែន។
វីអូឌី ព្យាយាមទំនាក់ទំនងទៅម្ចាស់គណនីហ្វេសប៊ុកនេះ ប៉ុន្តែមិនទាន់មានការឆ្លើយតបទេ។ ទោះយ៉ាងណាម្ចាស់ហ្វេសប៊ុកនេះ ក៏បានចូលផ្តល់មតិយោបល់ក្នុងហ្វេសប៊ុករបស់លោក ផៃ ស៊ីផាន របៀបចំអកដូចជាសួរថា តើរង្វាន់បានប៉ុន្មាន?។
