អតីតមេដឹកនាំបក្សប្រឆាំង លោក សម រង្ស៊ី បានព្រមានទៅក្រុមវិនិយោគិន និងជនជាតិចិននៅកម្ពុជា ឲ្យពិនិត្យ និងពិចារណាឡើងវិញអំពីសកម្មភាពរបស់ពួកគេនៅកម្ពុជា ដោយថា ពួកគេអាចប្រឈមមុខនឹងកំហឹងពីពលរដ្ឋកម្ពុជា។
លោក សម រង្ស៊ី ដែលប្រកាសខ្លួនឯងជាប្រធានស្ដីទីគណបក្សសង្គ្រោះជាតិនោះ បានព្រមានបែបនេះនៅលើទំព័រហ្វេសប៊ុកផ្លូវការរបស់លោកនៅថ្ងៃនេះ។
អតីតមេដឹកនាំបក្សប្រឆាំងដែលកំពុងរស់នៅនិរទេសខ្លួននៅក្រៅប្រទេសរូបនេះ បានប្រាប់ទៅវិនិយោគិនចិន ឲ្យពិចារណាឡើងវិញអំពីបញ្ហាផលប្រយោជន៍ និងគម្រោងវិនិយោគទាំងឡាយរបស់ខ្លួននៅកម្ពុជា ដោយលោកថា វត្ដមានរបស់ពួកគេបានធ្វើឲ្យប្រជាពលរដ្ឋខ្មែរក្ដៅក្រហាយ ហើយថា ពួកគេនឹងធ្វើការផ្លាស់ប្ដូរមេដឹកនាំសព្វថ្ងៃនេះ។
លោក សម រង្ស៊ី ក៏ប្រាប់ឲ្យក្រុមអ្នកវិនិយោគចិននៅកម្ពុជាសងដីធ្លីជូនទៅប្រជាពលរដ្ឋខ្មែរវិញ ទាមទារឲ្យពួកគេបិទបនល្បែងកាស៊ីណូ និងចាប់ក្រុមម៉ាហ្វីយ៉ាជាជនជាតិចិន ដែលប្រព្រឹត្ដខុសច្បាប់នៅកម្ពុជា។
លោក សម រង្ស៊ី សរសេរលើទំព័រហ្វេសប៊ុកថា៖ «ពួកគេបានធ្វើឲ្យប្រជាពលរដ្ឋខ្មែរទាំងមូល មានការក្តៅក្រហាយចំពោះពួកគេ។ ដូច្នេះ ជាការប្រុងប្រយ័ត្នដ៏ត្រឹមត្រូវ បើពួកគេឈប់បំពានមកលើជនជាតិខ្មែរ ឈប់ព្រហើន ហើយចេះសម្តែងការគោរពខ្លះចំពោះជនជាតិខ្មែរដែលជាម្ចាស់ស្រុក។ បើមិនយ៉ាងដូច្នោះទេ ពួកជនជាតិចិនទាំងនោះ អាចប្រឈមមុខពីការផ្ទុះកំហឹង ពីសំណាក់ជនជាតិខ្មែរជាម្ចាស់ស្រុក នៅពេលដែលព្រឹត្តិការណ៍នយោបាយថ្មីនឹងកើតមានឡើងក្នុងឆ្នាំ ២០១៩ នេះ»។
១១ កុម្ភៈ ២០១៩ / 11 February 2019សេចក្តីព្រមានដល់អ្នកវិនិយោគចិន នៅកម្ពុជា Warning to Chinese investors in Cambodia…
Posted by Sam Rainsy on Sunday, February 10, 2019
VOD មិនអាចស្វែងរកការបកស្រាយពីមន្ត្រីស្ថានទូតចិនប្រចាំនៅកម្ពុជាបានទេ ជុំវិញសារព្រមានពីលោក សម រង្ស៊ី នេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកសារព្រមានរបស់អតីតមេដឹកនាំបក្សប្រឆាំងរូបនេះថា មានលក្ខណៈនយោបាយ និងបំផ្លាញផលប្រយោជន៍ជាតិ។
លោកបន្ដថា៖ «គេហៅថា ចិត្តប្រទូស្ដរាយចំពោះផលប្រយោជន៍របស់ប្រទេស និងប្រជាជនកម្ពុជារបស់ទណ្ឌិត សម រង្ស៊ី។ ខ្លួនឯងអស់សង្ឃឹមខ្លួនឯង ធ្វើនយោបាយបរាជ័យសល់តែគូថខោហើយ នៅតែចង់មកឈ្នានីសញុះញង់ទៅដល់ផលប្រយោជន៍ជាតិ។ ខ្ញុំយល់ថា ការដែលទណ្ឌិត សម រង្ស៊ី ប្រកាសពីក្រៅប្រទេសមក វាគ្មានប្រសិទ្ធិភាពអីទេ»។
ទំហំពាណិជ្ជកម្មទ្វេភាគីកម្ពុជា-ចិន ត្រូវបានលោកនាយករដ្ឋមន្ត្រី ហ៊ុន សែន ប្រកាសឲ្យដឹងអំឡុងដំណើរទស្សនកិច្ចនៅចិនកាលពីខែមករាកន្លងមកថា មានតម្លៃដល់ទៅ ៥.៦ពាន់លានដុល្លារ កាលពីឆ្នាំ២០១៨កន្លងមកនេះ ហើយមេដឹកនាំប្រទេសទាំងពីរក៏បានប្ដេជ្ញាជំរុញទំហំពាណិជ្ជកម្មទ្វេភាគី ឲ្យកើនឡើងដល់ចំនួន ១០ពាន់លានដុល្លារ នៅត្រឹមឆ្នាំ២០២៣ខាងមុខនេះផងដែរ។
របាយការណ៍ក្រុមប្រឹក្សាអភិវឌ្ឍន៍កម្ពុជាកាលពីឆ្នាំមុន បានឲ្យដឹងថា ទំហំវិនិយោគប្រទេសចិនចូលមកកម្ពុជា បានកើនឡើងពីចំនួន ៣.៦ពាន់លានដុល្លារនៅឆ្នាំ២០១៦ មកដល់ទំហំ ៦.៣ពាន់លានដុល្លារនៅឆ្នាំ២០១៧ ឬកើនឡើងទ្វេដង។
អ្នកវិភាគនយោបាយ លោក ឯម សុវណ្ណារ៉ា ហៅសារនយោបាយរបស់លោក សម រង្ស៊ី នេះថា ដើម្បីស្វែងរកប្រជាប្រិយភាព និងការគាំទ្រពីប្រជាពលរដ្ឋ ស្របពេលដែលលោក សម រង្ស៊ី និងមេដឹកនាំបក្សប្រឆាំងផ្សេងទៀត ដែលកំពុងរស់នៅក្រៅប្រទេសនោះ គ្រោងវិលត្រឡប់មកកាន់ប្រទេសកម្ពុជាវិញនោះ។
លោក ឯម សុវណ្ណារ៉ា មានប្រសាសន៍ថា៖ «ខ្ញុំគិតថា គាត់ចង់ឲ្យអ្នកដែលរងគ្រោះនេះឯង មកគាំទ្រគាត់ ដើម្បីជាកម្លាំងមួយដើម្បីផ្លាស់ប្ដូររបបរដ្ឋាភិបាលបច្ចុប្បន្ន។ អាហ្នឹង គឺជាគោលដៅរបស់គាត់ ហើយអ្នកដែលគាត់អាចកៀងគរបានច្រើនជាងគេ គឺអ្នកដែលរងគ្រោះពីសំណាក់អាជ្ញាធរមានសមត្ថកិច្ច»។
លោក សម រង្ស៊ី បានប្រកាសពីគម្រោងធ្វើមាតុភូមិនិវត្តន៍មកប្រទេសកម្ពុជាវិញ ប៉ុន្ដែ គម្រោងនេះ ត្រូវបានរដ្ឋាភិបាលស្វាគមន៍ដោយការព្រមានបង្ក្រាប និងការចាប់ដាក់ពន្ធនារ ក្រោមហេតុផលថា អាចនឹងបង្កអសន្ដិសុខ និងអស្ថិរភាពសង្គម។
ក្រៅពីប្រកាសអំពីគម្រោងធ្វើមាតុភូមិនិវត្តន៍នេះ ប្រធានស្ដីទីគណបក្សសង្គ្រោះជាតិ លោក សម រង្ស៊ី បានអំពាវនាវដល់ប្រជាពលរដ្ឋនៅក្នុងស្រុក និងកងកម្លាំងប្រដាប់អាវុធទាំងអស់ ឲ្យក្រោកឡើងប្រឆាំងនឹងរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន ដោយថា រដ្ឋាភិបាលបច្ចុប្បន្នបានកើតចេញពីការបោះឆ្នោតមិនត្រឹមត្រូវ និងមិនយុត្តិធម៌នោះទេ៕