សង្គមស៊ីវិលទទូចឱ្យនគរបាលជាតិអនុវត្តច្បាប់ទៅលើមន្ត្រីរបស់ខ្លួន ក្រោយពីពលរដ្ឋម្នាក់ចោទថា បានចាប់ខ្លួនរូបគាត់វាយខ្នោះ និងប្រើអំពើហិង្សារំលោភបំពានលើរូបរាងកាយខុសនីតិវិធីច្បាប់។
មន្ត្រីនៅក្រសួងធនធានទឹក និងឧតុនិយម លោក ឡាយ ប៊ុនថូ បានឱ្យដឹងតាមរយៈការផ្សាយវីដេអូផ្ទាល់ជាមួយសារព័ត៌មានអនឡាញថា រូបលោកត្រូវបានមន្ត្រីនគរបាលប្រឆាំងការជួញដូរគ្រឿងញៀនចាប់ខ្លួនកាលពីយប់ថ្ងៃទី៨ ខែកុម្ភៈនេះ នៅក្បែរស្ថានីយ៍ប្រេងសាំងសូគីម៉ិច តាមបណ្ដោយមហាវិថីព្រះមុនីវង្ស ដោយត្រូវបានសង្ស័យថា ជាមេខ្លោងជួញដូរគ្រឿងញៀន។
លោក ឡាយ ប៊ុនថូ បានរៀបរាប់បន្តថា មន្ត្រីនគរបាលប្រហែល ១០នាក់ បានចាប់លោកវាយខ្នោះដៃ និងវាយជាច្រើនដៃ ហើយរុញបញ្ចូលឡានទាំងគ្មានដីកាពីតុលាការនោះឡើយ។
លោក ឡាយ ប៊ុនថូ បានរៀបរាប់ក្នុងវីដេអូនោះថា រូបលោកត្រូវបានដោះលែងមកវិញ ក្រោយពីមន្ត្រីនគរបាលរកមិនឃើញកំហុស ហើយមន្ត្រីនគរបាលដែលចាប់ខ្លួនលោកទាំងគ្មានដីកាពីតុលាការនោះ បានសុំទោសលោក និងស្នើសុំឱ្យបញ្ចប់រឿងនេះ ប៉ុន្តែលោកបញ្ជាក់ថា នឹងដាក់ពាក្យប្តឹងមន្ត្រីទាំងនោះពីបទប្រើប្រាស់អំពើហិង្សា និងការអនុវត្តច្បាប់ធ្វេសប្រហែសមកលើរូបលោក។
លោកបន្ថែមថា៖ «និយាយទៅ ខ្ញុំថា ខុសច្បាប់ទៅចុះ ព្រោះការអនុវត្តនេះអត់ត្រូវទេ គ្រាន់តែមានការចង្អុលបង្ហាញរបស់ជនសង្ស័យមួយចង្អុលបង្ហាញដាក់ខ្ញុំ គាត់ទៅចាប់ខ្ញុំប្រផាប់ប្រភីង នៅប្រើប្រាស់អំពើហិង្សាដាក់ខ្ញុំទៀត។ អីចឹង ខ្ញុំសុំឱ្យគាត់បកស្រាយមកខាងនាយកដ្ឋានហ្នឹងថា តើនីតិវិធីហ្នឹងមានដីកាម៉េច? ហើយមានចំណាត់ការម៉េចបានជាគេអនុវត្តនីតិវិធីអីចឹង? បើគ្រាន់តែសង្ស័យអីចឹង ចាប់គ្នាវ៉ៃ ហើយដល់ពេលខុស អាងសុំទោស វាអត់ត្រូវទៀតទេ»។
មន្ត្រីផ្នែកស៊ើបអង្កេតជាន់ខ្ពស់នៃសមាគមការពារសិទ្ធិមនុស្សអាដហុក លោក ស៊ឹង សែនករុណា បានជំរុញទៅនគរបាលជាតិ ឲ្យអនុវត្តច្បាប់ទៅលើមន្ត្រីរបស់ខ្លួន ដោយថា ការចាប់ខ្លួនពលរដ្ឋខុសនីតិវិធី និងប្រើប្រាស់អំពើហិង្សាលើពលរដ្ឋ គឺជាការបំពានសិទ្ធិមនុស្ស ។
លោក ស៊ឹង សែនករុណា មានប្រសាសន៍ថា៖ «គឺយើងត្រូវដោះស្រាយទៅតាមផ្លូវច្បាប់ឡើងវិញ ព្រោះអត់មានថា យើងមានរឿងហ្នឹងហើយ យើងធ្វើការសុំទោស យើងរួចខ្លួន មិនមែនទេ ព្រោះការអនុវត្តច្បាប់ អត់មានការលើកលែងទៅលើការសុំទោសអីចឹងយកមកបញ្ចប់ទេ។ បើមិនអីចឹង នៅពេលអ្នកមានលុយ ឬមានឥទ្ធិពលណាមួយ គាត់ទៅប្រព្រឹត្តទៅអំពើខុសហើយ ចេះតែធ្វើការសុំទោស ដើម្បីរួចខ្លួនអីចឹងទៅ អាហ្នឹងអត់អាចធ្វើបានទេ»។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ឱ្យ វីអូឌី ដឹងនៅថ្ងៃនេះថា មន្ត្រីនគរបាលជាតិពិតជាបានអនុវត្តខុសនីតិវិធី ហើយលោកអះអាងថា នគរបាលជាតិក៏បានដាក់ពិន័យក្រុមមន្ត្រីនគរបាលទាំងនោះទៅតាមវិធានការច្បាប់ផងដែរ បន្ថែមពីលើការសុំទោស។
លោកបន្ថែមថា៖ «សម្រាប់បុគ្គលដែលអនុវត្តខុសឆ្គង នឹងសម្រេចពិនិត្យមើលជាមួយលក្ខខណ្ឌប្រតិបត្តិការហ្នឹង ហើយនឹងវិន័យរបស់កងកម្លាំងថា តើគាត់ត្រូវទទួលពិន័យរបៀបណា? យើងមិនមែនទុកចោលទេ យើងត្រូវអប់រំណែនាំ និងដកពិសោធន៍ កុំឱ្យថ្ងៃក្រោយទៅមានបញ្ហាហ្នឹងទៀត»។
អ្នកជំនាញផ្នែកច្បាប់ លោកមេធាវី សុក សំអឿន បានហៅការសុំទោសពីមន្ត្រីនគរបាលនោះថា ជារឿងល្អ ប៉ុន្តែ លោកចាត់ទុកអំពើហិង្សាលើពលរដ្ឋ ជាបទល្មើសព្រហ្មទណ្ឌដែលត្រូវប្រឈមទោសទៅតាមច្បាប់។
លោកបន្តថា៖ «ព្រោះថា ទោះបីមែនក៏ដោយ ក៏មិនត្រូវប្រើហិង្សាដែរ ប៉ុន្តែ វាអាចដែរ អាចប្រើហិង្សានៅពេលចាប់ ប្រសិនបើជាមនុស្ស ជនសង្ស័យហ្នឹង គាត់តដៃតអីហ្នឹងណា។ ធម្មតាបើមិននេះ[វៃ] វាមិនកើតទេ»។
មន្ត្រីនគរបាល បានចាប់ខ្លួនលោក ប៊ន សំណាង និងលោក សុក សំអឿន នៅក្នុងសំណុំរឿងឃាតកម្មលើមេដឹកនាំសហជីពលោក ជា វិជ្ជា កាលពីឆ្នាំ២០០៤កន្លងមក ប៉ុន្តែ ពលរដ្ឋទាំង ២រូបនេះ ត្រូវបានដោះលែងវិញបន្ទាប់ពីរកពុំឃើញថា ពួកគេប្រព្រឹត្តបទល្មើសនោះឡើយ។
ទោះជាយ៉ាងណា លោក ប៊ន សំណាង និងលោក សុក សំអឿន ត្រូវបានសមត្ថកិច្ចចាប់ឃុំខ្លួនអស់រយៈពេល ៦ឆ្នាំ ប៉ុន្តែ គ្មានសំណងណាមួយត្រូវបានរដ្ឋាភិបាលផ្ដល់ទៅដល់ពលរដ្ឋទាំង ២រូបនេះឡើយ ហើយក៏គ្មានមន្ត្រីនគរបាលណាម្នាក់ ត្រូវបានដាក់ឲ្យទទួលខុសត្រូវចំពោះការអនុវត្តខុសនីតិវិធីនេះផងដែរ៕
