នាយកប្រតិបត្តិអង្គការតម្លាភាពកម្ពុជា និងជាអ្នកដែលសកម្មក្នុងការស្វែងរកដំណោះស្រាយបញ្ហាប្រព័ន្ធអនុគ្រោះពន្ធ EBA បានជំរុញឲ្យប្រជាពលរដ្ឋទាំងអស់ចូលរួម ដោយថា នេះជារឿងទាំងអស់គ្នា មិនមែនពាក់ព័ន្ធតែជាមួយក្រុមអ្នកនយោបាយនោះទេ។
លោក ព្រាប កុល សរសេរនៅលើហ្វេសប៊ុករបស់លោកកាលពីម្សិលមិញថា បញ្ហា EBA ពាក់ព័ន្ធពលរដ្ឋខ្មែររាប់លាននាក់ ហើយថា អ្នកទាំងអស់គ្នាមានសិទ្ធិ និងកាតព្វកិច្ចចូលរួមស្វែងរកដំណោះស្រាយ។
លោក ព្រាប កុល៖ «បញ្ហា EBA មិនមែនជាបញ្ហាពាក់ព័ន្ធតែជាមួយអ្នកនយោបាយប៉ុណ្ណោះទេ។ វាជាបញ្ហាដែលជះឥទ្ធពលដល់ពលរដ្ឋខ្មែររាប់លាននាក់ និងប៉ះពាល់ដល់អ្នកជំនួញ ពាណិជ្ជករ ដែលវិនិយោគនៅកម្ពុជាជាច្រើននាក់។ ដូច្នេះ យើងទាំងអស់មានសិទ្ធិ និងមានកាតព្វកិច្ចដឹងឮ ឈឺឆ្អាល និងចូលរួមស្វែងរកដំណោះស្រាយ។ យើងមិនគួរនៅស្ងៀម ហើយរង់ចាំក្លាយជាជនរងគ្រោះនោះទេ។ »
លោក ព្រាប កុល បញ្ជាក់ថា លោកផ្ទាល់បានត្រៀមខ្លួនរួចហើយសម្រាប់ការចូលរួមក្នុងនាមជាពលរដ្ឋដែលអាចក្លាយជាជនរងគ្រោះ និងក្នុងនាមជាបុគ្គលដែលមានមុខងារលើឆាកអន្តរជាតិ។
កាលពីថ្ងៃទី១១ ខែកុម្ភៈ សហភាពអឺរ៉ុបបានសម្រេចចាប់ផ្តើមនីតិវិធីនៃដំណើរការព្យួរប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ (EBA)។ នីតិវិធីនេះត្រូវការពេល១៨ខែ ហើយក្នុងចន្លោះពេលនេះ អាចលុបចោលគម្រោងព្យួរប្រព័ន្ធអនុគ្រោះពន្ធនេះវិញ បើសិនជាភាគីកម្ពុជា និងអឺរ៉ុបរកឃើញចំណុចឯកភាពគ្នា។
