កម្មករជាង១០០នាក់ដែលបម្រើការងារនៅរោងចក្រ W&D ស្ថិតក្នុងភូមិឬស្សី សង្កាត់ស្ទឹងមានជ័យ ត្រូវបានថៅកែបញ្ឈប់ពីការងារ។
ក្នុងលិខិតលើកទី២ចុះថ្ងៃទី១៣ ខែកុម្ភៈ ថៅកែរោងចក្រ W&D ប្រកាសទទួលយកកម្មករមួយចំនួនឲ្យចូលបំពេញការងារវិញ ដោយទុករយៈពេល៣ថ្ងៃ។ ប៉ុន្តែ ភាគីរោងចក្រមិនព្រមទទួលកម្មករ១២៧នាក់នោះទេ ដោយថា ពួកគេទាំងនោះ បានរាំរាង និងញុះញង់ឲ្យកម្មករផ្សេងទៀតតវ៉ាប្រឆាំងរោងចក្រ។
កម្មការិនីម្នាក់ អ្នកស្រី ជា សុខា ដែលមានឈ្មោះត្រូវបញ្ឈប់ពីការងារដែរនោះ បានច្រានចោលការចោទប្រកាន់របស់ភាគីរោងចក្រ។ អ្នកស្រី ថាករណីក្រុមហ៊ុនប្រកាសមិនទទួលយកកម្មករមួយចំនួននោះ គឺជាការរើសអើង និងគេចវេសមិនទទួលខុសត្រូវលើសំណងរបស់កម្មករ។
កម្មការិនីរូបនេះឲ្យដឹងថា កម្មករដែលថៅកែប្រកាសមិនទទួលយកនោះ ភាគច្រើនជាកម្មករធ្វើការងារយូរឆ្នាំ និងមានវ័យចំណាស់ ដែលបានបម្រើការងារនៅរោងចក្រនេះចន្លោះពី៨ទៅ១០ឆ្នាំ។
អ្នកស្រីបន្ថែមថា៖ «ពួកខ្ញុំលូកដៃចូលនៅពេលដែលអ្នកនាំបង្កើតរឿងហ្នឹងឡើង ព្រលែងកម្មករចោល។ ពេលគេហៅប្រជុំ គឺពួកគាត់បានគេចមុខបាត់អស់ហ្មង ដល់ពេលអញ្ចឹងធ្វើឲ្យពួកខ្ញុំជាកម្មករ តែលតោលអត់មានតំណាងចូលប្រជុំ ម្ល៉ោះហើយក៏ពួកខ្ញុំចេញមុខនៅពេលហ្នឹងឯង។ ហើយចេញមុខហ្នឹង ពួកខ្ញុំប្រកាន់គោលការណ៍តែមួយចំណុចទេ គឺខ្ញុំសុំឲ្យខាងរោងចក្រ ប្រសិនបើគាត់មិនគិតលុយឲ្យកម្មករជាកញ្ចប់ក៏ហីទៅចុះ ប៉ុន្តែ ខ្ញុំស្នើសុំ ដោយចាប់ពីថ្ងៃទី១ខែ១នេះតទៅ ប្រសិនបើមានកម្មករណាម្នាក់ចង់ឈប់ឬសម្រាកពីការងារ គឺសុំឲ្យរោងចក្រត្រូវគិតគូរលុយអតីតភាព និងលុយអត្ថប្រយោជន៍ផ្សេងៗជូនកម្មករតាមច្បាប់ផង ព្រោះថា កន្លងមករោងចក្រមួយនេះ កម្មករធ្វើការ១០ឆ្នាំក៏ដោយ តែឈប់ទៅមិនដែលទទួលបានអីទេ»។
បើទោះជាភាគីរោងចក្រប្រកាសទទួលយកកម្មករមួយចំនួនឲ្យចូលធ្វើការងារវិញ និងមួយចំនួនមិនព្រមទទួលយកក៏ដោយ ក្រុមកម្មកររាប់រយនាក់នៅតែបន្តកូដកម្មមុខរោងចក្រដដែល ខណៈមន្រ្តីក្រសួងការងារកោះហៅតំណាងកម្មករឲ្យទៅដោះស្រាយនៅទីស្តីការក្រសួងនៅរសៀលនេះដែរ។
កម្មករម្នាក់ទៀតដែលមានឈ្មោះក្នុងបញ្ជីត្រូវបញ្ឈប់ពីការងារដែរនោះ លោក ផាត់ សាមុត ប្រាប់ វី.អូ.ឌី ថា ក្រសួងការងារបានកោះហៅតំណាងកម្មករឲ្យចូលទៅដោះស្រាយវិវាទការងារនៅទីស្តីការក្រសួងនៅរសៀលថ្ងៃនេះ។ លោកបន្តថា ប្រសិនបើពុំមានដំណោះស្រាយទេ ក្រុមកម្មករអាចហែរញត្តិទៅដាក់តាមស្ថាប័នរដ្ឋផ្សេងៗទៀត។
លោកបន្ថែមថា៖ «តែប្រសិនជាខាងក្រសួងការងារ គេមិនដោះស្រាយឲ្យ គេមិនព្រមចរចាជាមួយកម្មករទេ ក្រុមកម្មករពួកគាត់ប្រហែលជាមានផែនការហែរញត្តិទៅក្រសួងការងារ ទៅខុទ្ទកាល័យសម្តេចនៅមុខវត្តបុទុម និងខុទ្ទកាល័យនៅតាខ្មៅ ព្រោះពួកគាត់អត់មានស្នើសុំអីច្រើនទេ គឺគាត់ស្នើសុំចូលបម្រើការងារដោយពុំមានការរើសអើងអ្នកណាម្នាក់ និងលក្ខខណ្ឌច្បាស់លាស់»។
វិ.អូ.ឌី មិនអាចសុំការឆ្លើយតបពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេជុំវិញវិវាទការងារនៅរោងចក្រមួយនេះ។
លោក តាំង ម៉េង មេធាវីតំណាងឲ្យក្រុមហ៊ុន W&D ធ្លាប់បញ្ជាក់ប្រាប់ វី.អូ.ឌី ថា ករណីក្រុមហ៊ុនបញ្ឈប់កម្មករជាង១០០នាក់នោះ ដោយសារតែកម្មករទាំងនោះបានញុះញង់ទៅឲ្យកម្មករតវ៉ា និងបង្កការរាំងស្ទះដល់ដំណើរការរបស់ក្រុមហ៊ុន ដែលលោកថាសកម្មភាពរារាំងនោះជាទង្វើខុសច្បាប់។
លោកបន្ថែមថា៖ «ថៅកែរោងចក្រ គាត់អនុញ្ញាតឲ្យកម្មករចូលទាំងអស់ហ្នឹង ប៉ុន្ តែគាត់លើកលែងកម្មករមួយចំនួនតូចដែលធ្វើឲ្យប៉ះពាល់ដល់រោងចក្រ។ គាត់បានបិទផ្លូវមិនឲ្យគេចូលធ្វើការហ្នឹង គឺថៅកែមិនអនុញ្ញាតឲ្យចូលទេ។ កម្មករមួយចំនួនតូចហ្នឹង គាត់មានឈ្មោះក្នុងបញ្ជីហើយ។ គាត់បានរារាំងកម្មករផ្សេងទៀតមិនឲ្យចូលធ្វើការងារ»។
មន្រ្តីដោះស្រាយវិវាទនៅសម្ព័ន្ធសហជីពស៊ីខៅឌូ លោក ស៊ាង យ៉ូត មានប្រសាសន៍ថា ករណីក្រុមហ៊ុនប្រកាសមិនព្រមទទួលយកកម្មករមួយចំនួនចូលធ្វើការងារនោះ គឺជាការរំលោភបំពាន។ លោក បន្តថា ក្នុងកិច្ចប្រជុំជាមួយភាគីក្រសួងនៅរសៀលនេះ សហជីពរបស់លោកនឹងរាយការណ៍បញ្ហនេះទៅក្រសួង និងសុំភាគីក្រុមហ៊ុនដកពាក្យបណ្តឹងដែលបានប្តឹងកម្មករជាង២០នាក់ទៅតុលាការផងដែរ។
លោកបន្ថែមថា៖ «សកម្មភាពនេះកាន់តែរំលោភបំពាន និងដាក់សម្ពាធទៅលើបងប្អូនកម្មករ ហើយធ្វើបែបហ្នឹងជាចេតនាមិនចង់ឲ្យបងប្អូនកម្មករចូលធ្វើការ។ គាត់ចង់ចូលៗទាំងអស់គ្នា បើមានការបញ្ឈប់បែបហ្នឹង គាត់មិនសុខចិត្តទេ គាត់នៅតែបន្តតវ៉ាទាមទារទៀត។ ហើយថ្ងៃហ្នឹងម៉ោង២កន្លះ យើងនឹងជួបជាមួយភាគីក្រសួងការងារ យើងនឹងលើកឡើងមកជជែកពីបញ្ហាបញ្ឈប់កម្មករ គឺឲ្យក្រុមហ៊ុនទទួលកម្មករចូលធ្វើការងារវិញទាំងអស់ដោយឥតលក្ខខណ្ឌ និងស្នើឲ្យដកពាក្យបណ្តឹងពីតុលាការវិញ»។
កាលពីចុងឆ្នាំ២០១៨ កម្មករជិត២ពាន់នាក់បម្រើការងារនៅរោងចក្រ W&D បានផ្ទុះការតវ៉ាដើម្បីទាមទារទៅថៅកែឲ្យបើកប្រាក់អតីតភាពការងារជូនពួកគេជាកញ្ចប់មុនឆ្នាំ២០១៩ រហូតថៅកែរោងចក្រសម្រេចបញ្ឈប់កម្មករជាង១ពាន់នាក់ ដោយសារមិនគោរពតាមការសម្រេចរក្សាការពាររបស់តុលាការ។ ប៉ុន្តែ ក្រោយមករោងចក្រនេះ បានប្រកាសទទួលយកកម្មករឲ្យចូលបម្រើការងារវិញ ដោយលើកលែងកម្មករមួយចំនួន៕