អតីតមេឃុំមួយរូបមកពីគណបក្សសង្រ្គោះជាតិនៅខេត្តកំពង់ចាម បានទទូចទៅអាជ្ញាធរមូលដ្ឋាន ឲ្យបញ្ឈប់ការធ្វើទុក្ខបុកម្នេញ និងប្រើរូបភាពគំរាមកំហែងដល់អតីតមន្ត្រី និងសកម្មជនបក្សប្រឆាំងបន្តទៀត។
អតីតមេឃុំមេព្រីង ស្ថិតក្នុងស្រុកបាធាយ លោក ស៊ន រដ្ឋា ឱ្យដឹងថា លោកបានទៅចូលបំភ្លឺនៅប៉ុស្តិ៍រដ្ឋបាលឃុំនៅព្រឹកនេះ តាមការកោះហៅរបស់នគរបាល ដោយមន្ត្រីនគរបាលសាកសួរលោកអំពីករណីបំផ្លាញលូបង្ហូរទឹកដាក់ស្រែនៅចំណុចគោអើត ប៉ុន្តែ លោកថា លោកមិនបានប្រព្រឹត្តដូចការចោទប្រកាន់ទេ។
លោកបញ្ជាក់ថា ក្រោយពេលទៅពិនិត្យដល់ទីតាំង សមត្ថកិច្ច និងមន្ត្រីជំនាញស្រុក ក៏បានទទួលស្គាល់ថា ស្នាមបែកបាក់នោះ បានកើតឡើងយូរមកហើយ ប៉ុន្តែ លោកហៅការហៅទៅបំភ្លឺនេះថា ជាការគំរាមកំហែងផ្នែកនយោបាយច្រើនជាង។
លោកបន្ថែមថា៖ «សម្រាប់ខ្ញុំ គឺជាមុខសញ្ញាគេតែម្តង។ ខ្ញុំគិតថា អីចឹង។ ជាមុខសញ្ញាគេចង់បំភិតបំភ័យ ចង់ឱ្យយើងបាក់ស្មារតីអីចឹង។ ខ្ញុំគិតថា អីចឹងច្រើនជាង ព្រោះ វាអត់មានហេតុផលអីត្រូវហៅខ្ញុំទៅផង ហើយក្នុងហ្នឹង វាជាមុខសញ្ញាផុយស្រួយជាងគេ គឺខ្ញុំតែម្តងនៅក្នុងឃុំមេព្រីងហ្នឹង»។
នាយនគរបាលប៉ុស្តិ៍ឃុំមេព្រីង លោក ប៉ែត សុផុន បានទទួលស្គាល់ថា លោកពិតជាបានហៅអតីតមេឃុំរូបនេះឲ្យចូលបំភ្លឺនៅព្រឹកថ្ងៃនេះមែន ដោយថា ធ្វើឡើងតាមបណ្តឹងរបស់អ្នកភូមិ ជុំវិញករណីបំផ្លាញទ្វារលូបង្ហូរទឹកមួយកន្លែងនៅក្នុងឃុំ។
ប៉ុន្តែ លោកបដិសេធថា ករណីនេះមិនពាក់ព័ន្ធរឿងនយោបាយ ឬជាការគំរាមកំហែងនោះឡើយ ហើយថា ជាការបំពេញភារកិច្ចឆ្លើយតបនឹងពលរដ្ឋប៉ុណ្ណោះ។
លោក ប៉ែត សុផុន បន្ថែមថា៖ «ខ្ញុំគ្រាន់តែថា រកខុសរកត្រូវ ចង់ដឹងថា នរណាគេដែលបានបំផ្លិចបំផ្លាញហ្នុង។ ខ្ញុំគ្រាន់តែចង់ដឹងតែប៉ុណ្ណឹងទេ ហើយមិនពាក់ព័ន្ធរឿងនយោបាយអីទេ»។
អតីតមេឃុំរូបនេះ ត្រូវបានសមត្ថកិច្ចមូលដ្ឋានហៅទៅបំភ្លឺបែបនេះមួយសប្ដាហ៍ក្រោយការបែកធ្លាយសំឡេងមួយ ដែលត្រូវបានគេគិតថា ជាសំឡេងលោកនាយករដ្ឋមន្ត្រី ហ៊ុន សែន ដែលបាននិយាយអំពីគម្រោងទប់ទល់នឹងការវិលត្រឡប់ចូលស្រុករបស់លោក សម រង្ស៊ី និងទប់ទល់ទៅនឹងបញ្ហាដកប្រព័ន្ធអនុគ្រោះពន្ធ EBA ពីសំណាក់សហភាពអឺរ៉ុប។
សំឡេងដដែលនេះ បានបញ្ជាឱ្យមន្ត្រីទាំងអស់ប្រើប្រាស់បញ្ហាការដកប្រព័ន្ធអនុគ្រោះពន្ធ EBA ជាឱកាសដើម្បីពង្រឹងខ្លួនឯង និងដើម្បីកម្ចេចចោលក្រុមបក្សប្រឆាំងដែលនៅសេសសល់ក្នុងប្រទេសកម្ពុជាឱ្យបានឆាប់រហ័ស ដោយមិនអនុញ្ញាតឱ្យពួកនេះមានជីវិតទៀតឡើយ។
សំឡេងបែកធ្លាយ៖ «គឺរឹតពួកអាប្រឆាំងដែលនៅសេសសល់ឱ្យវារលំរលាយ ព្រោះគ្មាននរណាដែលនឹងត្រូវមកប្រដៅយើងបានទៀតទេ ព្រោះអ្នកឯងបានធ្វើដាក់ខ្ញុំដូច្នេះហើយ។ ដូច្នេះ ជាឱកាសដែលយើងលត់ពួកអានៅខាងក្នុង ផ្តាច់ខ្សែចង្វាក់របស់វាឱ្យអស់។ ឥលូវ វាកំពុងដើរប្រជុំនៅតាមហាង តាមស្អីនានាដែលខ្ញុំសុំយកឱកាសនេះ ខ្ញុំនឹងបញ្ជូនបញ្ហានេះសម្រាប់អភិបាលខេត្ត សម្រាប់ការណែនាំនានាទៅគ្រប់កន្លែងផងដែរ ព្រោះយើងមិនអាចឱ្យអាក្រុមនេះរស់ទេ»។
មន្ត្រីអង្កេតជាន់ខ្ពស់របស់សមាគមការពារសិទ្ធិមនុស្សអាដហុក លោក ស៊ឹង សែនករុណា មើលឃើញថា ការកោះហៅអតីតមេឃុំចូលបំភ្លឺ ជារឿងធម្មតានៅពេលមានការចោទប្រកាន់អ្វីមួយ ប៉ុន្តែ លោកថា វិធានការបែបនេះ គឺផ្តោតទៅលើក្រុមអតីតបក្សប្រឆាំងប៉ុណ្ណោះ។
សកម្មជនសិទ្ធិមនុស្សរូបនេះ ហៅការអនុវត្តច្បាប់បែបនេះ និងមានការព្រមានកម្ចេចក្រុមបក្សប្រឆាំងផងថា ជាការដើរផ្ទុយទៅនឹងច្បាប់ជាតិនិងអន្តរជាតិ ព្រមទាំងរំលោភសិទ្ធិមនុស្សធ្ងន់ធ្ងរផងដែរ។
លោក ស៊ឹង សែនករុណា មានប្រសាសន៍ថា៖ «យើងយល់ថា វាជារឿងមួយដែលធ្វើឱ្យមានការប៉ះពាល់ដល់សិទ្ធិសេរីភាពរបស់ប្រជាពលរដ្ឋកម្ពុជាយ៉ាងធ្ងន់ធ្ងរ ព្រោះសិទ្ធិទាំងអស់នេះ គឺត្រូវបានមានចែងនៅក្នុងច្បាប់កំពូលរបស់ប្រទេសយើងផង ក៏ដូចជាច្បាប់អន្តរជាតិដែល ប្រទេសយើងជាភាគីហត្ថលេខា នៅក្នុងអនុសញ្ញាទាំងអស់ហ្នឹងផង»។
ក្រុមសកម្មជន និងអ្នកគាំទ្របក្សប្រឆាំង ត្រូវបានសមត្ថកិច្ចកោះហៅឲ្យឆ្លើយបំភ្លឺជាបន្តបន្ទាប់ចាប់តាំងពីចុងឆ្នាំមុន ជុំវិញសកម្មភាពរបស់ពួកគេគាំទ្រអតីតមេដឹកនាំបក្សមួយនេះ។
កាលពីចុងឆ្នាំមុន សមត្ថកិច្ចខេត្តកណ្ដាល បានកោះហៅអតីតមន្ត្រីជាប់ឆ្នោត និងសកម្មជនគណបក្សសង្គ្រោះជាតិចំនួនជិត១០ នាក់ ទៅសាកសួរ ជុំវិញការបង្ហាញជំហររបស់ពួកគេគាំទ្រលោក សម រង្ស៊ី ជាប្រធានស្តីទីគណបក្សសង្គ្រោះជាតិ។
អតីតមន្ត្រីជាប់ឆ្នោត និងសកម្មជនបក្សសង្រ្គោះជាតិចំនួន ១០នាក់ទៀត ត្រូវបានសមត្ថកិច្ចខេត្តបន្ទាយមានជ័យ កោះហៅកាលពីខែមុន ដើម្បីសាកសួរជុំវិញការបង្ហោះសារនយោបាយលើបណ្តាញសង្គមគាំទ្រជំហររួមគ្នារបស់អតីតមេបក្សប្រឆាំង និងការវិលត្រឡប់របស់លោក សម រង្ស៊ី ផង។
អតីតសកម្មជនបក្សប្រឆាំងនៅខេត្តស្វាយរៀង លោក គង់ ម៉ាស់ ត្រូវបានសមត្ថកិច្ចចាប់ខ្លួននៅក្នុងហាងកាហ្វេមួយនៅរាជធានីភ្នំពេញកាលពីខែមករា ជុំវិញការបង្ហោះសារនៅបណ្តាញសង្គមជាដើម៕