ជប៉ុនផ្ដល់ជំនួយបន្ថែមដល់កម្ពុជា ក្នុងនោះមានជំនួយឥណទាន និងហរិញ្ញប្បទានឥតសំណងសរុបទឹកប្រាក់ជាង៤០លានដុល្លារ ដើម្បីអនុវត្តគម្រោងពីរ គឺការពង្រឹងប្រព័ន្ធផ្គត់ផ្គង់ទឹក និងអគ្គសនី។
យោងតាមសេចក្ដីប្រកាសព័ត៌មានរបស់ក្រសួងការបរទេសចុះកាលពីម្សិលមិញបានឲ្យដឹងថា ជប៉ុនបានផ្ដល់ជំនួយបន្ថែមជាង៤០លានដុល្លារដល់កម្ពុជា ដើម្បីអនុវត្តគម្រោងពីរ ក្នុងនោះមានឥណទានសម្បទានដែលមានទឹកប្រាក់សរុប ៣,៥៩៩យ៉េន ប្រមាណជា ៣១,៥៦លានដុល្លារ សម្រាប់អនុវត្តគម្រោងកែលម្អ ស្ដារប្រព័ន្ធស្រោចស្រព និងប្រព័ន្ធដោះទឹកខាងលិចបឹងទន្លេសាប ជំហានទី២។
គម្រោងមួយទៀត គឺហិរញ្ញប្បទានឥតសំណងដែលមានទឹកប្រាក់សរុប ១៣៤០លានយ៉េន ប្រមាណជា១១,៨លានដុល្លារ សម្រាប់អនុវត្តគម្រោងអភិវឌ្ឍប្រព័ន្ធផ្លាស់ប្ដូរទិន្នន័យអគ្គសនីនៅកំពង់ផែ ដើម្បីធ្វើទំនើបកម្មកំពង់ផែ។
កាលពីខែតុលា ឆ្នាំ២០១៨កន្លងទៅ ជប៉ុនក៏បានផ្ដល់ជំនួយឥតសំណងជាង៣០លានដុល្លារ ដើម្បីអនុវត្តគម្រោងស្ដារប្រព័ន្ធលូនៅរាជធានីភ្នំពេញ។