អាជ្ញាធរខេត្តព្រះសីហនុបានព្រមានចាត់វិធានការផ្លូវច្បាប់ចំពោះមេខ្យល់ និងក្រុមពលរដ្ឋ ដែលកំពុងដើរចាប់យកដីធ្លី «អនាធិបតេយ្យ» នៅក្នុងខេត្តជាប់សមុទ្រមួយនេះ។
រដ្ឋបាលខេត្តព្រះសីហនុបានចុះផ្សាយលើទំព័រហ្វេសប៊ុករបស់ខ្លួនកាលពីដើមសប្តាហ៍នេះថា មួយរយៈចុងក្រោយនេះ មានពលរដ្ឋមកពីតំបន់ និងខេត្តផ្សេង បានទៅទន្ទ្រានយកដីកម្មសិទ្ធិរបស់អ្នកដទៃ និងដីរដ្ឋស្ថិតក្នុងភូមិគគីរ ឃុំបិទត្រាំង ធ្វើជាកម្មកសិទ្ធិខ្លួនយ៉ាងអនាធិបតេយ្យ។
អាជ្ញាធរខេត្តព្រះសីហនុ បញ្ជាក់ថា តាមការស្រាវជ្រាវ ក្រុមពលរដ្ឋដែលចូលទៅទន្ទ្រានយកដីខុសច្បាប់នោះ គឺមានមេខ្យល់នៅពីក្រោយ ហើយជាអ្នកអូសទាញឲ្យពលរដ្ឋធ្វើបែបនេះ ដើម្បីបង្កបញ្ហាដល់អាជ្ញាធរ។
អាជ្ញាធរខេត្តទេសចរណ៍មួយនេះ ឲ្យដឹងទៀតថា ខ្លួនបានបញ្ជាទៅសមត្ថកិច្ចពាក់ព័ន្ធធ្វើការស្រាវជ្រាវស៊ើបអង្កេតរកមុខសញ្ញាមេខ្លោងទាំងនោះហើយ ដើម្បីចាត់ការទៅតាមផ្លូវច្បាប់ដោយខានតែបាន។
អ្នកនាំពាក្យសាលាខេត្តព្រះសីហនុ លោក ឱក សារឿន បញ្ជាក់បន្ថែមថា យន្តការដំបូងនេះ គឺអាជ្ញាធរបានចុះផ្សាយឲ្យពលរដ្ឋទាំងនោះបញ្ឈប់សកម្មភាព និងពន្យល់ពលរដ្ឋឲ្យយល់ពីអំពីផ្លូវច្បាប់។
លោកបន្ថែមថា៖ «អាជ្ញាធរខេត្តបានដាក់ចេញគោលការណ៍ឲ្យខាងគណៈបញ្ជាការឯកភាពក្រុងស្រុកទាំងអស់ ដើម្បីចុះធ្វើការពន្យល់អប់រំណែនាំ ក៏ដូចជាជូនដំណឹងផ្សព្វផ្សាយដល់ពួកគាត់ ដោយពួកគាត់មិនអាចដើរធ្វើអនាធិបតេយ្យបែបហ្នឹងបានទេ។ ការផ្សព្វផ្សាយហ្នឹង គឺជំរុញឲ្យពួកគាត់អនុវត្តដោយយកច្បាប់ជាគោល។ ក្នុងករណីមិនគោរពច្បាប់ យើងមានតែយកវិធានការច្បាប់មកអនុវត្តហើយ»។
មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះសីហនុ លោកស្រី ជាប សុធារី មានប្រសាសន៍ថា ប្រសិនមានករណីពលរដ្ឋចូលទៅទន្ទ្រានយកដីខុសច្បាប់មែន អាជ្ញាធរគួរតែប្រញាប់ទប់ស្កាត់ភ្លាមៗ ដើម្បីជៀសវាងបណ្តោយឲ្យពលរដ្ឋទាំងនោះចូលទៅកាន់កាប់រយៈពេលយូរ ហើយបង្កបង្កើនផលដែលធ្វើឲ្យពិបាកក្នុងការដោះស្រាយ។
មន្រ្តីការពារសិទ្ធិមនុស្សរូបនេះ ឲ្យដឹងថា ពលរដ្ឋកាន់តែច្រើនបានចូលទៅចាប់យកដីនៅក្នុងខេត្តព្រះសីហនុ និងបង្កឲ្យមានជម្លោះដីធ្លីជាហូរហែរ បន្ទាប់ពីតម្លៃដីធ្លីនៅក្នុងខេត្តជាប់មាត់ឆ្នេរសមុទ្រមួយនេះបានហក់ឡើងខ្ពស់។
លោកស្រីបន្ថែមថា៖ «បើសិនជារឿងហ្នឹងជាការពិត មានប្រជាពលរដ្ឋមកពីតំបន់ផ្សេងខេត្តផ្សេងចូលមកចាប់ដី ឬធ្វើការវាស់វែង ឬលក់ដីទៅឲ្យពលរដ្ឋផ្សេងទៀតហ្នឹង អាជ្ញាធរគួរតែមានវិធានការទៅលើបុគ្គលដែលបានប្រព្រឹត្តបទល្មើសនោះ។ ហើយខ្ញុំក៏សូមអំពាវនាវទៅប្រជាពលរដ្ឋទាំងអស់នៅខេត្តព្រះសីហនុ ឬអ្នកមកខេត្តផ្សេងៗ បើបងប្អូនចង់ទិញដីធ្លីក្នុងខេត្តព្រះសីហនុមេត្តាទំនាក់ទំនងជាមួយអាជា្ញធរមូលដ្ឋានឲ្យបានច្បាស់លាស់ បើពុំមានការទំនាក់ទំនងទេបងប្អូនប្រាកដជាចាញ់បោកជនខិលខូចទាំងអស់ហ្នឹងហើយ»។
ក្នុងសេចក្តីជូនដំណឹងចុះថ្ងៃទី១ ខែមីនា រដ្ឋបាលខេត្តព្រះសីហនុបានប្រាប់ទៅប្រជាពលរដ្ឋដែលចូលទន្ទ្រានយកដីខុសច្បាប់ត្រូវបញ្ឈប់សកម្មភាពចូលទៅរំលោភបំពានលើដីកម្មសិទ្ធិអ្នកដទៃ ហើយរដ្ឋបាលខេត្តមួយនេះ បានព្រមានចាត់វិធានការផ្លូវច្បាប់ចំពោះមេក្លោង និងអ្នកនៅពីក្រោយនៃការចូលកាន់កាប់ដីខុសច្បាប់នោះផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍តាមតេឡេក្រាមថា បញ្ហាទំនាស់ដីធ្លីនៅតែបន្តរ៉ាំរ៉ៃ និងរីករាលដាលកាន់តែធំដោះស្រាយមិនចេះចប់ ដោយសារមានមេខ្យល់នៅពីក្រោយ ចេះតែដើរបំផុសបំផុល និងញុះញង់ឲ្យពលរដ្ឋក្រីក្រទៅចាប់យកដីដោយសំអាងថា ឈ្នះបានដីចាញ់បានលុយ។
លោក សុខ ឥសាន បញ្ជាក់ថា ដើម្បីដោះស្រាយបញ្ចប់បញ្ហានេះ រដ្ឋាភិបាលត្រូវតែហ៊ានវះកាត់កម្ចាត់មេខ្យល់នោះចោល ហើយថា ការវះកាត់មេខ្យល់ដែលនាំពលរដ្ឋទន្រ្ទានយកដីរដ្ឋ និងដីឯកជននានានោះ មិនជាប់ពាក់ព័ន្ធសីលធម៌ និងសិទ្ធិមនុស្សឡើយ។
កាលពីថ្ងៃទី២៤ ខែមករាកន្លងមក ពលរដ្ឋ២នាក់ បានរងរបួស ក្នុងនោះបុរសម្នាក់បានរងរបួសធ្ងន់ បន្ទាប់ពីរងគ្រាប់កាំភ្លើងបាញ់ចំឆ្អឹងខ្នង ខណៈពលរដ្ឋ ៤នាក់ទៀត ត្រូវបានសមត្ថកិច្ចចាប់ខ្លួន នៅក្នុងហេតុការណ៍បង្ក្រាបដ៏ហិង្សាទៅលើអ្នកភូមិប្រហែល ៣០០នាក់ ដែលតវ៉ាជំទាស់ទៅនឹងសមត្ថកិច្ចចម្រុះចុះទៅអនុវត្តសាលដីការរបស់តុលាការកំពូល។
ក្រោយកិច្ចប្រជុំ និងស្ដាប់យោបល់ពីឧត្តមក្រុមប្រឹក្សាពិគ្រោះ និងផ្ដល់យោបល់ កាលពីថ្ងៃទី២៨ ខែកុម្ភៈ លោក ហ៊ុន សែន បានសម្រេចដកអភិបាលរងខេត្តព្រះសីហនុពីររូប លោក ស្រ៊ុន ស្រ៊ន់ និងលោក ផៃ ប៊ុនវណ្ណៈ បន្ទាប់ពីកម្លាំងសមត្ថកិច្ចបើកការបង្ក្រាបយ៉ាងហិង្សាលើពលរដ្ឋមានជម្លោះដីធ្លីទាំងនោះ៕
