រដ្ឋមន្ត្រីក្រសួងមហាផ្ទៃ បញ្ជាទៅរដ្ឋបាលរាជធានី-ខេត្ត ឲ្យពង្រឹងប្រសិទ្ធិភាព តាមការណែនាំរបស់ខ្លួនកន្លងទៅ ដែលតម្រូវឲ្យបើកវេទិកាសាធារណៈ ស្តាប់កង្វល់សង្គមស៊ីវិល និងស្វែងរកដំណោះស្រាយ។
កាលពីថ្ងៃទី៣១ ខែតុលា ឆ្នាំ២០១៨ លោក ស ខេង បានចេញលិខិតណែនាំមួយ តម្រូវឲ្យរដ្ឋបាលរាជធានី-ខេត្ត ឲ្យរៀបចំវេទិកាពិគ្រោះយោបល់ជាមួយសមាគម អង្គការមិនមែនរដ្ឋាភិបាល និងសហគមន៍នានានៅមូលដ្ឋាន ឲ្យបានទៀងទាត់រាល់ឆមាស ឬតាមការចាំបាច់ ដើម្បីស្វែងរកដោះស្រាយ ។
លិខិតថ្មីមួយទៀត ចុះថ្ងៃទី១៤ ខែមីនាម្សិលមិញនេះ លោក ស ខេង បញ្ជាឲ្យរដ្ឋបាលរាជធានី ខេត្ត ធ្វើកិច្ចការនេះឲ្យមានប្រសិទ្ធិភាព ដោយតម្រូវឲ្យមន្ត្រីក្រោមឱវាទ៖
«ធ្វើការកំណត់ឲ្យបានជាក់លាក់ នូវកាលបរិច្ឆេទនៃការរៀបចំវេទិកាពិគ្រោះយោបល់សម្រាប់ឆ្នាំ២០១៩ ដោយមានការចូលរួមពីមន្ទីរជំនាញនានា អាជ្ញាធរមានសមត្ថកិច្ចពាក់ព័ន្ធ រដ្ឋបាលក្រុង ស្រុក ខណ្ឌ ឃុំ សង្កាត់ ព្រមទាំងសមាគម អង្គការមិនមែនរដ្ឋាភិបាលនិងសហគមន៍នៅមូលដ្ឋាន រួចហើយត្រូវផ្ញើជូនកាលបរិច្ឆេទនៃការរៀបចំវេទិការនោះមកក្រសួងមហាផ្ទៃ»។
លោក ស ខេង បញ្ជាក់ក្នុងលិខិតនោះថា បន្ទាប់ពីបញ្ចប់អង្គវេទិកា រដ្ឋបាលរាជធានី-ខេត្ត ត្រូវធ្វើរបាយការណ៍ជាលាយលក្ខណ៍អក្សរពីលទ្ធផល សំណើ សំណូមពរៗសំខាន់ រួមទាំងបញ្ហានានាដែលមិនអាចដោះស្រាយបាននៅក្នុងសមត្ថកិច្ចរបស់ខ្លួនផ្ញើមកក្រសួងមហាផ្ទៃ ដើម្បីស្នើសុំការសម្របសម្រួល និងជួយគាំទ្រក្នុងការដោះស្រាយ។
អ្នកនាំពាក្យខេត្តព្រះសីហនុលោក ឱ សារឿន មានប្រសាសន៍ថា អាជ្ញាធរខេត្តបានដោះស្រាយបញ្ហាមួយចំនួន ឆ្លើយតបទៅនឹងកង្វល់របស់ប្រជាសហគមន៍ និងបញ្ហាមួយចំនួនទៀតបានបញ្ជូនបន្តទៅថ្នាក់ជាតិឲ្យជួយដោះស្រាយដូចជាបញ្ហាហេដ្ឋារចនាសម្ព័ន្ធជាដើម។
លោកថា៖ «អាជ្ញាធរបានធ្វើជារបាយការណ៍ លើកស្នើឡើងទៅរដ្ឋាភិបាលដើម្បីឲ្យលោកសម្រេច ក្នុងហ្នឹងដូចជាពាក់ព័ន្ធនឹងហេដ្ឋារចនាសម្ព័ន្ធអីហ្នឹង ក៏បានដោះស្រាយមួយចំនួនហើយដែរ»។
អភិបាលខេត្តព្រះវិហារ លោក អ៊ុន ចាន់ដា មានប្រសាសន៍ថា ខេត្តកំពុងពង្រឹងប្រសិទ្ធិភាពតាមគោលការណ៍ណែនាំ របស់ក្រសួងមហាផ្ទៃនេះ។
លោកថា៖ «ក្នុងខេត្តព្រះវិហារដើមឆ្នាំ២០១៩នេះ យើងបានធ្វើវេទិកានេះចំនួនពីរដងហើយ ។ ហើយបញ្ហាច្រើនយើងបានដោះស្រាយហើយ»។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត មានប្រសាសន៍ថា សិទ្ធិអង្គការសង្គមស៊ីវិល និងសហគមន៍នៅថ្នាក់មូលដ្ឋាន ដែលធានាដោយច្បាប់ មិនទាន់ប្រសើរឡើងវិញទេ បើទោះបីក្រសួងមហាផ្ទៃធ្លាប់ ណែនាំដល់អាជ្ញាធរឲ្យសម្របសម្រួលក៏ដោយ។
អ្នកឃ្លាំមើលសិទ្ធិមនុស្សរូបនេះ សំអាងថា អ្នកចូលរួមប្រារព្វទិវានារីអន្តរជាតិ៨មីនា កាលសប្តាហ៍មុននេះ អាជ្ញាធររាជធានី-ខេត្តខ្លះ នៅបន្តរារាំងពួកគេនៅឡើយ។
លោក អំ សំអាត ផ្តល់ជាយោបល់ថា ការអន្តរាគមន៍របស់លោក ស ខេង ថ្មីទៀតនេះ ជាសញ្ញាវិជ្ជមានមួយ ប៉ុន្តែ លោកថា ប្រសិទ្ធិភាពជាងនេះ ក្រសួងមត្រូវមានវិធានការជាក់ស្តែងទៅលើមន្ត្រីណាដែលបំពានច្បាប់ បិទសិទ្ធិសកម្មភាពសង្គមស៊ីវិល។
លោកថា៖ «កាលណាបើសិនជាមានមន្ត្រីណា ឬក្រុមមន្ត្រីណាដែលគាត់រំខានយាយីមិនគោរពបទបញ្ជាហ្នឹង ត្រូវតែវិន័យផ្នែករដ្ឋបាល ឬក៏វិន័យផ្សេងៗ អាហ្នឹងទើបអាចអនុវត្តទៅបាន»។
តំណាងក្រុមអង្គការសង្គមស៊ីវិល អំឡុងកិច្ចប្រជុំជាមួយក្រសួងមហាផ្ទៃ កាលពីចុងខែមករាឆ្នាំ២០១៩នេះ បានលើកឡើងចំៗនៅចំពោះមុខរដ្ឋមន្ត្រីក្រសួងមហាផ្ទៃ លោក ស ខេង ដោយអំពាវនាវទៅរដ្ឋាភិបាលឲ្យឈប់ចោទប្រកាន់ ពួកគេថា ជាក្រុមបដិវត្តពណ៌ប្រឆាំងរដ្ឋាភិបាល ។
កាលពីខែកុម្ភៈ ឆ្នាំ២០១៨ រដ្ឋាភិបាលបានចេញផ្សាយសៀវភៅ «ស» ដែលអះអាងថា កម្ពុជាកំពុងកើតមាននូវបដិវត្ដន៍ពណ៌មួយដែលរៀបចំឡើងអតីតគណបក្សប្រឆាំង ដើម្បីផ្ដួលរំលំរដ្ឋាភិបាលស្របច្បាប់។ ក្នុងសៀវភៅនោះ រដ្ឋាភិបាលក៏បានចោទប្រកាន់អង្គការជាង ៣០០ ថា បានចូលរួមក្នុងបដិវត្តន៍នោះផងដែរ៕