នាយករដ្ឋមន្ត្រីកម្ពុជាអះអាងថា សាធារណរដ្ឋកូរ៉េ បានផ្តល់កម្ចីសរុប ៧០០លានដុល្លារ ផ្តោតលើហេដ្ឋារចនាសម្ព័ន្ធ ធនធានមនុស្ស និងសុខមាលភាពសាធារណៈជាដើម សម្រាប់ឆ្នាំ២០១៩ ដល់ឆ្នាំ២០២៣។
លោកនាយករដ្ឋមន្ត្រី ហ៊ុន សែន បានប្រកាសនៅលើហ្វេសប៊ុករបស់លោកថា ទឹកប្រាក់៧០០លានដុល្លារនេះ «ផ្ដោតលើហេដ្ឋារចនាសម្ព័ន្ធវិស័យធនធានទឹក និងសុខមាលភាពសាធារណៈ វិស័យអប់រំនិងបណ្ដុះបណ្ដាលធនធានមនុស្ស និងវិស័យអភិវឌ្ឍន៍ជនបទមានជាអាទិ៍ គម្រោងបង្កើតមជ្ឈមណ្ឌលបណ្តុះបណ្តាលអាកាសចរស៊ីវិល គម្រោងស្ដារផ្លូវជាតិលេខ២ និងផ្លូវជាតិលេខ២២»។
លោក ហ៊ុន សែន ឲ្យដឹងទៀតថា គិតពីឆ្នាំ១៩៩៦ មកដល់ឆ្នាំ២០១៨ រដ្ឋាភិបាលប្រទេសកូរ៉េបានផ្ដល់ហិរញ្ញប្បទានប្រមាណ ៦៣២ លានដុល្លារសហរដ្ឋអាមេរិក ក្នុងនោះហិរញ្ញប្បទានឥតសំណងមានប្រមាណជា៣០០ លានដុល្លារអាមេរិក។
កិច្ចព្រមព្រៀងផ្តល់ឥណទានសប្បទានដែលមានទឹកប្រាក់៧០០លានដុល្លារ បានធ្វើឡើងនៅថ្ងៃម្សិលមិញ ធ្វើឡើងក្នុងដំណើរទស្សនកិច្ចរបស់ប្រធានាធិបតីសាធារណរដ្ឋកូរ៉េ លោក មូន ចេអ៊ីន (Moon Jae-in) មកកាន់កម្ពុជា។