លោកនាយករដ្ឋមន្ត្រីហ៊ុន សែន ណែនាំឲ្យមន្ត្រីពាក់ព័ន្ធពង្រឹងការពារធនធានធម្មជាតិ ដើម្បីអាចទាក់ទាញភ្ញៀវទេសចរទាំងជាតិ និងអន្តរជាតិ។
ក្នុងពិធីបុណ្យទន្លេនៅថ្ងៃនេះ លោកនាយករដ្ឋមន្ត្រីបានណែនាំដល់មន្ត្រីឲ្យទប់ស្កាត់ការបូបខ្សាច់ ការកាប់បំផ្លាញព្រៃឈើ និងការចោលកាកសំណល់ចូលក្នុងទន្លេជាដើម។ លោកបន្តថា ការថែរក្សាបរិស្ថាន និងធនធានធម្មជាតិបានល្អអាចទាក់ទាញភ្ញៀវទេសចរ។
លោក ហ៊ុន សែន៖« ទេសចរដែលមកពីប្រទេសក្រៅចូលចិត្តណាស់នៅក្នុងការទៅលេងកំសាន្តជាមួយនិងព្រៃព្រឹក្សា មើលបក្សាបក្សីនៅក្នុងប្រទេសរបស់យើង។ មិនមែនតែភ្ញៀវទេសចរបរទេស៦លាន២សែននាក់ត្រូវការទេ ក៏ប៉ុន្តែសូម្បីតែភ្ញៀវទេសចរនៅក្នុងប្រទេសរបស់យើងជាង១១លាននាក់ក្នុងឆ្នាំកន្លងទៅ ក៏មានតម្រូវការក្នុងការទៅទស្សនាកន្លែងដែលមានព្រៃព្រឹក្សា បក្សាបក្សី ឬកន្លែងដែលមានត្រីនៅទីនោះ។»
ក្នុងឱកាសនោះដើម្បីទាក់ទាញភ្ញៀវទេសចរ លោកនាយករដ្ឋមន្ត្រីក៏បានរំឭកឲ្យអាជីវករទាំងអស់ពង្រឹងជំនាញ ហើយកុំយកថ្លៃសេវាឬ ទំនិញរបស់ខ្លួនពីភ្ញៀវទេសចរខ្ពស់ហួសហេតុពេក។
