ស្ថាបនិកសារព័ត៌មាន ឌឹ ខេមបូឌា ដេលី លោក Bernard Krisher បានទទួលមរណភាពនៅដើមខែមីនានេះ។ នេះបើតាមការចុះផ្សាយរបស់សារព័ត៌មាន ឌឹ ខេមបូឌា ដេលី ផ្ទាល់តែម្ដង។
ក្នុងអត្ថបទអនឡាញរបស់ខ្លួនចុះផ្សាយនៅថ្ងៃនេះ សារព័ត៌មាន ឌឹ ខេមបូឌា ដេលី បានរៀបរាប់ថា លោក Bernard Krisher ដែលមានតួនាទីជាប្រធានអង្គការជំនួយពិភពលោកសម្រាប់កម្ពុជា (World Assistance for Cambodia)ផងនោះ បានទទួលមរណភាពដោយសារជំងឺគាំងបេះដូង កាលពីថ្ងៃទី៥ ខែមីនា ក្នុងវ័យ ៨៧ឆ្នាំ នៅឯមន្ទីរពេទ្យមួយកន្លែងក្នុងទីក្រុងតូក្យូ ប្រទេសជប៉ុន។
សារពត័ត៌មានដដែលនេះ បានចុះផ្សាយបន្តថា មរណភាពរបស់ស្ថាប័នសារព័ត៌មានមួយនេះ ត្រូវបានក្រុមគ្រួសារទម្លាយឲ្យដឹងជាសាធារណៈ ក្រោយពីការរៀបចំពិធីបញ្ចុះសពលក្ខណៈឯកជនមួយធ្វើឡើងនៅទីក្រុងញូវយ៉ក។
មានដើមកំណើតជាជនជាតិជ្វីហ្វនៅប្រទេសអាល្លឺម៉ង់ មុននឹងភៀសខ្លួនទៅនៅអាមេរិកនៅវ័យកុមារនៅឡើយនៅក្នុងឆ្នាំ១៩៣៧នោះ លោក Bernard Krisher ក៏ជាអតីតនាយកការិយាល័យព័ត៌មាន Newsweek ប្រចាំនៅទីក្រុងតូក្យូ ព្រមទាំងសារព័ត៌មានអន្តរជាតិដទៃទៀតផងដែរមុននឹងលោកបង្កើតកាសែត ឌឺ ខេមបូឌា ដេលី។
លោក Bernard Krisher ដែលមានដើមកំណើតជាជនជាតិជ្វីហ្វនៅប្រទេសអាល្លឺម៉ង់មុននឹងភៀសខ្លួនទៅនៅអាមេរិកនៅវ័យកុមារនៅឡើយនៅក្នុងឆ្នាំ១៩៣៧នោះ បានបង្កើតកាសែតភាសាអង់គ្លេស The Cambodia Daily នៅក្នុងឆ្នាំ១៩៩៣ ជាការបើកផ្លូវសម្រាប់សេរីភាពសារព័ត៌មានវិជ្ជាជីវៈនៅក្នុងប្រទេសមួយនេះ ដែលចាប់ផ្ដើមកសាងប្រទេសឡើងវិញនោះ។
ដោយចាត់ទុកលោក Bernard Krisher ថាបានធ្វើឲ្យប្រជាជនកម្ពុជារាប់លាននាក់ទទួលបានព័ត៌មាន និងទទួលជំនួយមនុស្សធម៌ផងនោះ ស្ថានទូតអាមេរិកប្រចាំនៅកម្ពុជា បានបង្ហោះសារនៅលើទំព័រហ្វេសប៊ុកផ្លូវការរបស់ខ្លួនថា ស្ថានទូតបានរៀបចំបន្ទប់មួយដាក់ឈ្មោះលោក Bernard Krisher សម្រាប់កិត្តិយសរបស់លោកផ្ទាល់តែម្ដង។
កាសែតភាសាអង់គ្លេសមួយនេះ បានបិទការបោះពុម្ពផ្សាយរបស់ខ្លួនទាំងស្រុងកាលពីដើមខែកញ្ញាក្នុងឆ្នាំ២០១៧ ក្រោយពីត្រូវរដ្ឋាភិបាលចោទថា បានជំពាក់ពន្ធជាង ៦លានដុល្លារអាមេរិកនៅក្នុងរយៈប្រហែល ១០ឆ្នាំ៕
