សកម្មជនបរិស្ថាន លើកឡើងថា ការស្នើឱ្យពលរដ្ឋទិញម៉ាស៊ីនភ្លើង សម្រាប់ប្រើប្រាស់ពីសំណាក់រដ្ឋាភិបាលជាដំណោះស្រាយបែបប្រជាភិថុ និងមិនមែនជាដំណោះស្រាយយូរអង្វែង ដោយលោកជំរុញឱ្យរដ្ឋាភិបាលវិនិយោគលើការផលិតថាមពលពីពន្លឺព្រះអាទិត្យវិញ។
ស្ថាបនិកអង្គការមាតាធម្មជាតិជនជាតិអេស្ប៉ាញ លោក អាឡិច ហ្គន់ហ្សាឡេសដេវិសិន មានប្រសាសន៍ថា ការទិញទឹក ទិញភ្លើងអគ្គិសនីពីប្រទេសជិតខាង ដើម្បីយកមកផ្គត់ផ្គង់តម្រូវការពលរដ្ឋក្នុងប្រទេសគឺ ជារឿងមួយដែលតែងកើតមានចំពោះប្រទេសជាច្រើន រួមទាំងប្រទេសមហាអំណាច មិនមែនតែកម្ពុជាទេ។
លោកថា អ្វីដែលគេមើលឃើញពេលនេះ គឺ ភាពបរាជ័យក្នុងការដឹកនាំរបស់រដ្ឋាភិបាលជាច្រើនទស្សវត្សមកនេះ ប៉ុន្តែ មិនអាចដោះស្រាយបញ្ហាទាំងនេះជាយូរអង្វែងបាន។ លោកថា ដើម្បីដោះស្រាយបញ្ហាភ្លើងជាយូរអង្វែង រដ្ឋាភិបាលអាចវិនិយោគការផលិតថាមពលអគ្គិសនីពីពន្លឺព្រះអាទិត្យ ហើយក៏អាចសហការជាមួយពលរដ្ឋផងដែរ។
លោកបន្តថា ៖ «យន្តការផ្សេងៗហ្នឹង ដើម្បីឱ្យប្រជាជនជាម្ចាស់ថាមពលដោយខ្លួនឯង។ អីចឹងមានន័យថា ចាប់ផ្តើមយន្តការ វិមជ្ឈការ មិនមែនទាល់តែចំណាយលុយរាប់រយលានដុល្លារនៅក្នុងគម្រោងមួយ ហើយបន្ទាប់មក ចែកតទៅប្រជាជនទេ។ ប្រជាជនក៏ជាប្រភពនៃដំណោះស្រាយតាមរយៈការវិនិយោគលក្ខណៈតូច នៅលើដំបូលផ្ទះខ្លួនឯងជាដើម»។
កាលពីថ្ងៃម្សិលមិញ លោកនាយរដ្ឋមន្ត្រី ហ៊ុន សែន បានថ្លែងជាថ្មីទៀត ដោយស្នើឱ្យពលរដ្ឋមានការយោគយល់ចំពោះបញ្ហាកង្វះទឹក និង កង្វះភ្លើងប្រើប្រាស់នៅតំបន់មួយចំនួនក្នុងប្រទេសកម្ពុជា ពិសេសធ្វើឱ្យកម្ពុជាខ្វះភ្លើងអគ្គិសនីប្រើប្រាស់ប្រមាណ៤រយមេហ្គាវ៉ាត់ ដែលត្រូវទិញពីប្រទេសជិតខាងបន្ថែមទៀត។
លោក ហ៊ុន សែន បានជំរុញទៅអាជ្ញាធរពាក់ព័ន្ធ និងសប្បុរសជនផង ត្រូវនាំគ្នាជីកអណ្តូងជូនពលរដ្ឋនៅតំបន់មានបញ្ហាប្រឈម ជាជាងដើរចែកទឹក និងប្រើប្រាស់ទឹកភ្លើងដោយការសន្សំសំចៃ។
លោកបន្ថែមថា៖ «ហើយអ្វីដែលយើងបន្តដោះស្រាយ គឺអាចមានលទ្ធភាពនៃការដោះស្រាយតាមរយៈ ប្រើធុងអាគុយ តាមរយៈការប្រើម៉ាស៊ីនភ្លើង ដែលយើងមានខ្លួនឯង ដែលកាលពីមុនយើងធ្លាប់ប្រើតែអាហ្នឹងនោះ»។
កាលពីថ្ងៃម្សិលមិញដែរ អគ្គិសនីកម្ពុជា បានចេញសេចក្តីប្រកាសព័ត៌មានមួយ ដោយថា កត្តាធ្វើឱ្យខ្វះភ្លើងអគ្គិសនីប្រើប្រាស់ រួមមាន កំណើនវិនិយោគទុនក្នុងនិងក្រៅស្រុក ការបញ្ចុះតម្លៃអគ្គិសនីកាលពីខែមករា។ អាកាសធាតុក្តៅខ្លាំង និងកង្វះទឹកខុសប្រក្រតី ធ្វើឱ្យតំបន់វារីអគ្គិសនីមួយចំនួនផ្គត់ផ្គង់ថាមពលអគ្គិសនីមិនបានពេញលេញ។
ជាការដោះស្រាយបញ្ហានេះ អគ្គិសនីកម្ពុជាបានស្នើទិញអគ្គិសនីបន្ថែមទៀតពីប្រទេសថៃ បង្កើន៨០មេហ្គាវ៉ាត់ និងឡាវ បង្កើន១០មេហ្គាវ៉ាត់ ហើយវៀតណាមនៅរក្សាការផ្គត់ផ្គង់មកកម្ពុជាដដែល ប៉ុន្តែ កម្ពុជានៅតែប្រឈមកង្វះថាមពលអគ្គិសនីប្រមាណ១៣ភាគរយបន្ថែមទៀត។
ប្រភពដដែលអះអាងថា ក្នុងទិសដៅអភិវឌ្ឍន៍វិស័យអគ្គិសនីដល់ឆ្នាំ២០៣០ កម្ពុជាបានរៀបចំផែនការមួយចំនួន ដូចជា វារីអគ្គិសនី បង្កើតរោងចក្រអគ្គិសនីដើរដោយធ្យូងថ្ម និងប្រភពផ្សេងទៀត។
លោក អាឡិច យល់ថា ការបង្កើតរោងចក្រអគ្គិសនីដើរដោយធ្យូងថ្ម មានប្រយោជន៍ក្នុងការផ្តល់អគ្គិសនីច្រើនតាមតម្រូវការក៏ពិតមែន ប៉ុន្តែ វាបណ្តាលឱ្យប៉ះពាល់ធ្ងន់ធ្ងរដល់បរិស្ថានក្នុងតំបន់និងសលកលោកផងដែរ។
សកម្មជនបរិស្ថានដដែលនេះ យល់ថា បញ្ហាប្រឈមទាំងនេះនឹងប្រឈមកាន់តែធ្ងន់ធ្ងរ ប្រសិនបើរដ្ឋាភិបាលគ្មានផែនការយូរអង្វែង និងនៅតែធ្វើទុក្ខបុកម្នេញក្រុមអ្នកដែលហ៊ានរិះគន់នោះ។
លោកមានប្រសាសន៍ថា៖ «សំខាន់បំផុតហ្នឹង ប្រសិនបើរដ្ឋាភិបាលលោក ហ៊ុន សែន នៅតែមិនដូរចរិត។ នៅតែធ្វើបែបលួចលាក់ នៅតែមិនស្តាប់ប្រជាពលរដ្ឋ នៅតែគាបសង្កត់គណបក្សប្រឆាំង សង្គមស៊ីវិល អាបញ្ហាខ្វះទឹកផង ខ្វះភ្លើងផង ខ្ញុំធានាថា បើឆ្នាំនេះធ្ងន់ធ្ងរ ចាំមើល២ឆ្នាំ ៣ឆ្នាំ ៥ឆ្នាំទៅមុខទៀត រឹតតែធ្ងន់ធ្ងរ រឹតតែខ្វះខាត »។
យោងតាមរបាយការណ៍ទិន្នន័យអភិវឌ្ឍន៍កម្ពុជា ឆ្នាំ២០១៦ បានឱ្យដឹងថា នៅកម្ពុជាមានតំបន់វារីអគ្គិសនីកំពុងដំណើរការផលិតអគ្គិសនីចំនួន៨កន្លែង។ ដោយឡែកមួយកន្លែងកំពុងសាងសង់ និងមាន៣១កន្លែងទៀតកំពុងស្ថិតនៅក្នុងគម្រោងសិក្សានៅឡើយ។
កាលពីខែមករា រដ្ឋាភិបាល បានចេញសារាចរណែនាំឲ្យប្រជាពលរដ្ឋរក្សាទឹកសម្រាប់ប្រើប្រាស់នារដូវប្រាំង ដោយកម្ពុជានឹងទទួលឥទ្ធិពលបាតុភូត អែល នីណូ (El Nino) ដែលធ្វើឲ្យអាកាសធាតុក្តៅហួតហែង។ រដ្ឋាភិបាលក៏បានអំពាវនាវកសិករមិនឲ្យធ្វើស្រូវប្រាំងលើកទីពីរផងដែរ៕