អគ្គនាយកដ្ឋានពន្ធនាគារនៃក្រសួងមហាផ្ទៃបានច្រានចោលព័ត៌មានដែលផ្សព្វផ្សាយថា ប្រធានពន្ធនាគារព្រៃសធ្វើអាជីវកម្មលក់ដូរទំនិញឲ្យអ្នកជាប់ឃុំនៅក្នុងពន្ធនាគារយកតម្លៃខ្ពស់ជាងនៅខាងក្រៅ៣ទៅ៤ដង។
ក្នុងលិខិតរបស់អគ្គនាយកដ្ឋានពន្ធនាគារកាលពីម្សិលមិញបានជំរុញឲ្យអ្នកផ្សព្វផ្សាយទាំងនោះ ប្រៀបធៀបតម្លៃទំនិញឲ្យច្បាស់លាស់មុនសន្និដ្ឋាន។ លិខិតនេះក៏បានច្រានចោល ការចោទប្រកាន់ថា អ្នកលក់ដូរក្នុងពន្ធនាគារនោះជាសាច់ញាតិរបស់ប្រធាន និងមន្ត្រីពន្ធនាគារ។
មន្ត្រីជាន់ខ្ពស់អង្គការលីកាដូ លោក អំ សំអាត ជំរុញឲ្យស្ថាប័នពាក់ព័ន្ធរួមទាំងអគ្គនាយកដ្ឋានពន្ធនាគារ និងអង្គភាពប្រឆាំងអំពើពុករលួយបើកការស៊ើបអង្កេតករណីនេះឲ្យបានច្បាស់លាស់។ លោកថា បើមានករណីនេះដូចការចោទប្រកាន់មែនគឺប៉ះពាល់ធ្ងន់ធ្ងរដល់អ្នកជាប់ឃុំ ពិសេសអ្នកមានជីវិភាពក្រីក្រ។
ក្នុងលិខិតបំភ្លឺនេះក៏បានជំរុញឲ្យហ្វេសប៊ុកឈ្មោះPN ASIA ពិនិត្យខ្លឹមសារនៃការចុះផ្សាយឡើងវិញ ដែលមានលក្ខណៈញុះញង់។ ទោះយ៉ាងណាក្រសួងមិនបានបញ្ជាក់ថា មានវិធានការផ្លូវច្បាប់ណាមួយនោះទេ។