មន្ត្រីជាន់ខ្ពស់រដ្ឋាភិបាលចិនបានអះអាងថា ការផ្តល់ជំនួយ និងការវិនិយោគនៅកម្ពុជាមិនមែនជាអន្ទាក់ដូចការចោទប្រកាន់នោះទេ គឺជាការជួយគ្នាដោយស្មោះត្រង់ប្រៀបបានដូចជាបងប្អូនបង្កើត។
ក្នុងពិធីបើកការដ្ឋានផ្លូវល្បឿនលឿនភ្នំពេញ-ព្រះសីហនុកាលពីម្សិលមិញ លោក ខុង សៀនយ៉ូវ (KONG XUANYOU) អនុរដ្ឋមន្ត្រីក្រសួងការបរទេសចិន លើកឡើងពីការរីកចម្រើននៃទំនាក់ទំនងរវាងចិន និងកម្ពុជា។ លោកក៏បានច្រានចោលការផ្សព្វផ្សាយថា ជំនួយនិងការវិនិយោគរបស់ចិនគឺជាអន្ទ្រាក់។
លោក ខុង សៀនយ៉ូវ ថ្លែងតាមរយៈអ្នកបកប្រែថា៖«វិនិយោគរបស់ចិនមិនមែនជាអន្ទាក់ទេ វារឹតតែមិនមែនជាការគំរាមកំហែង តែវាជាការជួយដោយស្មោះពីបងប្អូនបង្កើត ជាកម្លាំងជំរុញដល់សមត្ថភាពអភិវឌ្ឍន៍របស់កម្ពុជា និងជាទង្វើនាំមកនូវផលប្រយោជន៍ដល់ប្រជាជនកម្ពុជា។»
ក្នុងឱកាសនោះលោកនាយករដ្ឋមន្ត្រីហ៊ុន សែន ក៏បានបញ្ជាក់ដែរថា តាមរយៈគម្រោងផ្លូវមួយខ្សែក្រវ៉ាត់មួយចិនកំពុងជួយដល់កម្ពុជា ក៏ដូចជាប្រទេសកំពុងអភិវឌ្ឍន៍ផ្សេងៗទៀត។
