លោកនាយករដ្ឋមន្ត្រី ហ៊ុន សែន បានព្រមានទៅអតីតមេដឹកនាំបក្សប្រឆាំង លោក សម រង្ស៊ី នៅថ្ងៃនេះ កុំឲ្យវិលត្រឡប់មកកម្ពុជាវិញតាមច្រកព្រំដែន និងគណៈកម្មការចំពោះកិច្ចនៃបក្សប្រឆាំង ដែលត្រូវបានចាត់តាំងឲ្យគៀងគរក្រុមអ្នកគាំទ្រទៅទទួលមេដឹកនាំបក្សប្រឆាំងនោះ ឲ្យបញ្ឈប់សកម្មភាពផងដែរ។
ក្នុងពិធីចែកសញ្ញាបត្រដល់ក្រុមនិស្សិតនៅរាជធានីភ្នំពេញនៅថ្ងៃនេះ លោក ហ៊ុន សែន បានថ្លែងថា៖ «ហើយបើមកតាមទល់ដែន អាហ្នឹងល្អមើលតើ! អញអត់ដឹងទេ! អញអត់ដឹងទេតាមទល់ដែន! ឯងត្រូវដឹង ទល់ដែនគេធ្វើម៉េច? គេដាក់ត្រង់សេ[លេនដ្ឋាន] ហើយគេមានកំាំភ្លើងយន្តនៅហ្នឹង គ្រាន់តែបច្ចុប្បន្នយើងហាមប្រើមីនប្រឆាំងមនុស្សតែប៉ុណ្ណឹងហេ។ ប៉ុន្តែ អ្ហែងត្រូវដឹង បើមកតាមទល់ដែន រឿងធំហើយ»។
លោក ហ៊ុន សែន បានព្រមានបែបនេះ ចំពេលដែលលោក សម រង្ស៊ី ដែលប្រកាសខ្លួនជាប្រធានស្ដីទីគណបក្សសង្គ្រោះជាតិនៅឯក្រៅប្រទេសនោះ បានប្រកាសឲ្យដឹងអំពីការព្យាយាមវិលត្រឡប់ចូលមកប្រទេសកម្ពុជាវិញនៅក្នុងឆ្នាំនេះ។
ក្រៅពីព្រមានទៅដល់លោក សម រង្ស៊ី ហើយនោះ លោកនាយករដ្ឋមន្ត្រី ហ៊ុន សែន ក៏បានព្រមានទៅគណៈកម្មការចំពោះកិច្ចរបស់បក្សប្រឆាំង ឲ្យបញ្ឈប់សកម្មភាពដើរគៀងគរសមាជិក ទៅគាំទ្រដំណើរវិលត្រឡប់មកវិញរបស់មេដឹកនាំបក្សប្រឆាំង។
លោក ហ៊ុន សែន ថ្លែងបន្តថា៖ «ប៉ុន្តែ សម្រាប់អ្នកដែលមិនទាន់បានទទួលសិទ្ធិ កុំទាន់ធ្វើសកម្មភាព ហើយកុំលួចលាក់ និងកុំចាត់តាំងកម្លាំង។ ខ្ញុំនៅតែនិយាយដដែលថា អ្នកឯងត្រៀមចាត់តាំងកម្លាំងដើម្បីធ្វើអ្វី? អាគណៈកម្មការចំពោះកិច្ចគ្រប់ទីកន្លែងទាំងអស់ ត្រូវតែប្រញាប់[បញ្ឈប់សកម្មភាព] បើមិនអញ្ចឹងទេប្រយ័ត្ន»។
លោក សម រង្ស៊ី បានប្រកាសកាលពីពេលថ្មីៗថា លោកនឹងវិលត្រឡប់មកកាន់ប្រទេសកម្ពុជាវិញ បន្ទាប់ពីរស់នៅនិរទេសខ្លួននៅឯក្រៅប្រទេស ដើម្បីគេចចេញពីបណ្ដឹងនានាពីសំណាក់មេដឹកនាំគណបក្សប្រជាជនកម្ពុជា ជាពិសេសបណ្ដឹងរបស់លោកនាយករដ្ឋមន្ត្រី ហ៊ុន សែន៕
