ក្រុមពលរដ្ឋមានជម្លោះដីធ្លីមកពីស្រុកពីរក្នុងខេត្តកោះកុង បានជំរុញទៅក្រសួងបរិស្ថានឲ្យពន្លឿនដំណោះស្រាយបញ្ចប់វិវាទដីធ្លីជូនពួកគេ ខណៈដែលវិវាទនោះ អូសបន្លាយជាង ១០ឆ្នាំមកហើយនោះ។
តំណាងពលរដ្ឋជាង ១០នាក់ ដែលមានជម្លោះដីធ្លីជាមួយក្រុមហ៊ុនចិន UDG ស្ថិតក្នុងស្រុកបុទុមសាគរ និងស្រុកគីរីសាគរ បាននាំគ្នាប្រមូលផ្តុំគ្នាមុខក្រសួងបរិស្ថានជាថ្មីទៀតនៅថ្ងៃនេះ ដើម្បីតាមដានដំណោះស្រាយដីធ្លីរបស់ពួកគេ។
អ្នកស្រី សាំង ពុយ ដែលអះអាងថា ជាតំណាងពលរដ្ឋនៅឃុំកោះស្តេច ប្រាប់ វី.អូ.ឌី ថា អ្នកភូមិប្រមាណ ៧៧គ្រួសារ ស្ថិតក្នុងឃុំចំនួន ៥ នៃស្រុកទាំង ២ បានធ្លាក់ក្នុងជម្លោះដីធ្លីជាមួយក្រុមហ៊ុន ញូញៀន របស់ចិនតាំងឆ្នាំ២០០៩ និងធ្លាប់ស្វែងរកអន្តរាគមន៍ពីអាជ្ញាធរពាក់ព័ន្ធជាច្រើនលើកមកហើយដែរ ប៉ុន្តែ ពុំទាន់ទទួលបានដំណោះស្រាយឡើយ។
អ្នកស្រីបន្ថែមថា៖ «ពួកយើងមានកង្វល់ មិនដឹងថា ថ្ងៃណាឆ្នាំណា ក្រុមហ៊ុនបន្តមកយកកន្លែងយើងទៀត ព្រោះតំបន់ខ្លះមានការ ឈូសឆាយ មានការសាងសង់ មានការលក់បន្តទៅឲ្យក្រុមហ៊ុនមួយទៅក្រុមហ៊ុនមួយទៀតហើយ។ អញ្ចឹង ពួកយើងបារម្ភខ្លាច មិនទាន់បានដោះស្រាយផង មកឈូសឆាយសាងសង់លក់ទៅក្រុមហ៊ុនផ្សេងទៀត ឲ្យពួកយើងទៅយកសំណងនៅណា?»។
អ្នកស្រី សាំង ពុយ ដែលអះអាងថា គ្រួសារគាត់បានប៉ះពាល់ដីធ្លីទំហំ ២៤ហិកតានោះ ឲ្យដឹងថា ដីធ្លីអ្នកភូមិដែលក្រុមហ៊ុនរំលោភយកនោះ គឺមានឯកសារកាន់កាប់ និងទទួលស្គាល់ដោយអាជ្ញាធរមូលដ្ឋានគ្រប់គ្រាន់។
អ្នកស្រី ឆៃ គឹមឌុច ដែលអះអាងថា ជាតំណាងពលរដ្ឋនៅឃុំភ្ញីមាស និយាយថា ក្រុមហ៊ុនបានឈូសឆាយផលដំណាំពួកគាត់ចោល មានដូចជា ស្វាយ ដូង ខ្នុរ និងដំណាំផ្សេងៗទៀត ដោយថា រយៈពេលជាង ១០ឆ្នាំហើយ មិនទាន់ទទួលបានសំណងនៅឡើយទេ។
អ្នកស្រី ឆៃ គឹមឌុច ដែលអះអាងថា គ្រួសារគាត់មានដីទំហំ២៦ហិកតា ត្រូវបានក្រុមហ៊ុនរំលោភយកដែរនោះឲ្យដឹងថា ជុំវិញវិវាទដីធ្លីជាមួយក្រុមហ៊ុនចិន ញូញៀន នេះ គឺមានការចាប់ខ្លួនពលរដ្ឋម្នាក់ដាក់ពន្ធធនាគាររហូតមកដល់បច្ចុប្បន្នផងដែរ។
អ្នកស្រីបន្ថែមថា៖ «ពួកយើងមានការលំបាកច្រើនណាស់ ពីព្រោះពួកយើងបានទៅទិញដីនោះ ដើម្បីធ្វើការបង្ករបង្កើនផលសម្រាប់ចិញ្ចឹមគ្រួសារ ដល់ពេលក្រុមហ៊ុនរំលោភយកមិនឲ្យចូល ធ្វើឲ្យខាតបង់លុយច្រើន គ្មានបង់ធនាគារ និងធ្វើឲ្យពួកយើងធ្លាក់ខ្លួនក្រ កូនមិនបានរៀនសូត្រជាដើម»។
ខណៈពលរដ្ឋឈរលើកបដាមុខទីស្ដីការក្រសួងបរិស្ថាននោះ អ្នកនាំពាក្យក្រសួងបរិស្ថាន លោក នេត្រ ភ័ក្រ្តា បានចេញទៅជួបជាមួយតំណាងពលរដ្ឋ ហើយបានស្នើទៅពលរដ្ឋឲ្យត្រឡប់ទៅផ្ទះសម្បែងវិញ និងរង់ចាំការសម្រេចពីថ្នាក់លើដែលលោកសន្យាផ្តល់ចម្លើយនៅដើមខែមេសាខាងមុខនេះ។
លោក នេត្រ ភ័ក្ត្រា បញ្ជាក់ប្រាប់តំណាងពលរដ្ឋថា ដីអ្នកភូមិដែលកំពុងមានជម្លោះជាមួយក្រុមហ៊ុននោះ គឺរដ្ឋាភិបាលសម្រេចប្តូរពីការកាត់ឆ្វៀលទៅជាផ្តល់សំណងទៅតាមតម្លៃទីផ្សារវិញ។
លោកបន្ថែមថា៖ «តាមដែលខ្ញុំទទួលបានព័ត៌មានចុងក្រោយនេះ គឺអ្វីដែលពីមុនមកហ្នឹងនារាករចោលហើយ គឺដោះស្រាយជាសំណង។ អញ្ចឹងហើយ បានជាក្រុមការងារដែលត្រូវដោះស្រាយហ្នឹង គេថា បើឥលូវលុបអាហ្នឹងហើយ ថាតើគណៈកម្មការរបស់ក្រសួងបរិស្ថានត្រូវបន្តដោះស្រាយ ឬរុញទៅឲ្យគណៈកម្មការដោះស្រាយជម្លោះដីធ្លីសម្រាប់ប្រទេសកម្ពុជារួមតែម្តង ដែលមានលោក ជា សុផារ៉ា ជាប្រធាន។ អញ្ចឹង យើងរង់ចាំចំលើយហ្នឹងសិន។ អញ្ចឹង ដើមខែបួន បងតេឡេហ្វូនមកសួរខ្ញុំចុះថា តើយើងទទួលបានចំលើយហើយនៅពីបញ្ហាហ្នឹង»។
វីអូឌី មិនសុំការឆ្លើយតបពីតំណាងក្រុមហ៊ុន UDG ជុំវិញវិវាទដីធ្លីនេះបានទេនៅថ្ងៃនេះ។
ក្រុមអ្នកភូមិព្រមទទួលយកដំណោះស្រាយរបស់រដ្ឋាភិបាលដែលសម្រេចផ្តល់ជាសំណង ប៉ុន្តែពលរដ្ឋសុំឲ្យការផ្តល់សំណងនោះសមរម្យអាចទទួលបានទាំងអស់គ្នា ដោយពុំមានការបង្ខំ និងបណ្តេញចេញ។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន បានជំរុញទៅរដ្ឋាភិបាលឲ្យពន្លឿនការដោះស្រាយជូនពលរដ្ឋឲ្យបានឆាប់ ដើម្បីបញ្ចប់វិវាទដីធ្លីមួយនេះ ដែលលោកថា កើតឡើងដោយសារតែរដ្ឋាភិបាលផ្តល់ដីឲ្យក្រុមហ៊ុនធ្វើការអភិវឌ្ឍ។
លោកបន្ថែមថា៖ «អាជ្ញាធរគួរតែបង្ហាញឆន្ទៈក្នុងការដោះស្រាយជម្លោះជូនប្រជាពលរដ្ឋបានចប់ទៅ ព្រោះថា ជម្លោះនេះកើតឡើងដោយសាររដ្ឋាភិបាលផ្តល់ដីទៅឲ្យក្រុមហ៊ុន ហើយនៅពេលជម្លោះកើតឡើងហើយ យើងជាអាជ្ញាធរមានសមត្ថកិច្ចជាពិសេស ក្រសួងបរិស្ថានហ្នឹង មិនមានការខិតខំប្រឹងប្រែងដោះស្រាយទេ ដោយបណ្តោយឲ្យប្រជាពលរដ្ឋរងគ្រោះបែបហ្នឹង»។
កាលពីឆ្នាំ២០០៨ រដ្ឋាភិបាលបានសម្រេចផ្តល់ដីសម្បទានសេដ្ឋកិច្ចទំហំ ៣ម៉ឺន ៦ពាន់ហិកតា ស្ថិតនៅក្នុងស្រុកបុទុមសាគរ និងស្រុកគីរីសាគរ ខេត្តកោះកុង ទៅដល់ក្រុមហ៊ុនចិន ញូញៀន ដើម្បីធ្វើការអភិវឌ្ឍពាណិជ្ជកម្ម និងរមណីយដ្ឋានទេសចរណ៍ស្របតាមស្តង់ដារអន្តរជាតិ។
អ្នកភូមិអះអាងថា ដំបូងឡើយគម្រោងនេះ បានធ្វើឲ្យប៉ះពាល់ដីធ្លីទំហំជាង ៦ពាន់ហិកតារបស់ប្រជាពលរដ្ឋជាង ២០០គ្រួសារនៅក្នុងស្រុកទាំងពីរនោះ ប៉ុន្តែ ក្រោយមក ក្រុមហ៊ុន និងរដ្ឋាភិបាលបានសម្របសម្រួលដោះស្រាយជូនពលរដ្ឋបានមួយភាគធំ។
ទោះជាយ៉ាងណា ប្រជាពលរដ្ឋប្រមាណជិត ១០០គ្រួសារទៀត ស្ថិតក្នុងឃុំតានូន ឃុំកោះស្តេច ឃុំភ្ញីមាស ឃុំព្រែកខ្សាច់ និងឃុំថ្មស ដែលមានដីទំហំជិត ១ពាន់ហិកតាទៀតនោះ នៅមិនទាន់ទទួលបានដំណោះស្រាយនៅឡើយទេ។
របាយការណ៍សង្ខេបមួយរបស់ក្រសួងរៀបចំដែនដី នគររូបនីយកម្ម និងសំណង់ ចេញផ្សាយឆ្នាំ២០១៨កន្លងមកនេះ ឲ្យដឹងថា បញ្ហាវិវាទដីធ្លីទូទាំងប្រទេសនៅសល់ជិត ១៥០០ករណីទៀត នៅមិនទាន់ត្រូវបានដោះស្រាយចប់នៅឡើយទេ គិតត្រឹមចុងឆ្នាំកន្លងមកនេះ៕
