សាលាដំបូងខេត្តកំពង់ចាម បានសម្រេចឃុំខ្លួនមន្ត្រីអាវុធហត្ថម្នាក់នៅពន្ធនាគារបណ្ដោះអាសន្នក្រោយពីមន្រ្តីរូបនេះដកកាំភ្លើងគំរាមពលរដ្ឋកាលពីថ្ងៃកាលពីថ្ងៃទី១៩ ខែមីនា ឆ្នាំ២០១៩កន្លងមក។
ដីកាបង្គាប់ឲ្យឃុំខ្លួនចេញដោយចៅក្រមស៊ើបសួរសាលាដំបូងខេត្តកំពង់ចាមនៅថ្ងៃនេះ ឲ្យដឹងថា តុលាការ បានសម្រេចឲ្យឃុំខ្លួនមន្ដ្រីអាវុធហត្ថ ឈ្មោះ សាន្ដ សុខុម នៅពន្ធនាគារបណ្ដោះអាសន្ននៅថ្ងៃនេះ ដោយចោទប្រកាន់ពីបទ «ហិង្សាដោយចេតនា មានស្ថានទម្ងន់ទោស ដោយគំរាមកំហែងនឹងអាវុធ»។
លោក សាន្ត សុខុម ដែលជាមន្ត្រីអាវុធហត្ថខេត្តកំពង់ចាមឋានន្តរស័ក្តិវរសេនីយ៍ត្រី និងជាកូនប្រុសបង្កើតរបស់លោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះនោះ ត្រូវបានតុលាការខេត្តកំពង់ចាមកោះហៅឲ្យចូលទៅបំភ្លឺ ក្រោយពីត្រូវបានប្រជាពលរដ្ឋនៅខេត្តកំពង់ចាមប្ដឹងថា បានប្រើអំពើហិង្សាដោយចេតនា និងគំរាមកំហែងបាញ់សម្លាប់នៅក្នុងជម្លោះមួយកាលពីសប្ដាហ៍មុន។
វីដេអូកាមេរ៉ាសុវត្ថិភាពមួយ បានបង្ហាញបុរសម្នាក់ស្ថិតក្នុងសម្លៀកបំពាក់ស៊ីវិល បានដកកាំភ្លើងភ្ជង់ និងវាយទៅលើបុរសម្នាក់ទៀត នៅឯហាងអ៊ីនធឺណិតមួយកន្លែង ស្ថិតក្នុងខេត្តកំពង់ចាម។
ក្រោយមានហេតុការណ៍ លោកនាយករដ្ឋមន្ត្រី ហ៊ុន សែន បានព្រមានដកតំណែងមេប៉េអឹមខេត្តក្រចេះ បើសិនជាមិនបញ្ចុះបញ្ចូលកូនប្រុសដែលដកកាំភ្លើងគំរាមពលរដ្ឋនៅខេត្តកំពង់ចាម ចូលមកដោះស្រាយនៅតុលាការ ៕