រដ្ឋាភិបាលកម្ពុជា បានដាក់បញ្ចូលអង្គការមិនស្វែងរកប្រាក់ចំណេញទាំងអស់ក្នុងការវាយតម្លៃពីការលាងលុយកខ្វក់ក្នុងយុទ្ធសាស្ត្រជាតិស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្មឆ្នាំ២០១៩ ដល់២០២៣។
ក្នុងយុទ្ធសាស្ត្រជាតិស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្មឆ្នាំ២០១៩ ដល់ឆ្នាំ២០២៣ រដ្ឋាភិបាលកម្ពុជាបានដាក់ចូលវិស័យអង្គការមិនស្វែងរកប្រាក់ចំណេញជាវិស័យដែលងាយរងគ្រោះពីការសម្អាតប្រាក់ជាមួយវិស័យមួយចំនួនទៀត ដែលមានដូចជា វិស័យពាណិជ្ជកម្មលោហធាតុ និងត្បូងមានតម្លៃ វិស័យអចលនទ្រព្យ និងវិស័យកាស៊ីណូ។
ក្នុងយុទ្ធសាស្ត្រនោះសរសេរថា៖ « អាជ្ញាធរត្រូវវាយតម្លៃពីកម្រិតហានិភ័យនៃ ស.ប.ហ.ភ (ការសម្អាតប្រាក់ និងហិរញ្ញប្បទានភេរវកម្ម) និងកំណត់យន្តការទម្រង់សមស្របនៃការគ្រប់គ្រងការប្រឆាំង ស.ប.ហ.ភ ដោយមានប្រសិទ្ធភាពនៅផ្នែកនានានៃវិស័យ NPOs នេះ » ។
បើតាមផែនការសកម្មភាពរបស់កម្មវិធីយុទ្ធសាស្ត្រនេះ អង្គការដែលមិនស្វែងរកប្រាក់ចំណេញទាំងអស់នឹងត្រូវរដ្ឋាភិបាលចាប់វាយតម្លៃពីខែកក្កដា ដល់ខែធ្នូ ឆ្នាំ២០១៩ ខាងមុខនេះ។
ក្រមព្រហ្មទណ្ឌកម្ពុជាមាត្រា៤០៩ ចែងថា នីតិបុគ្គលដែលត្រូវរកឃើញថា មានជាប់ពាក់ព័ន្ធទៅនឹងការលាងលុយកខ្វក់ ត្រូវផ្ដន្ទាទោសពិន័យជាប្រាក់ពី១រយលានរៀល ដល់៥រយលានរៀល ហើយលើសពីនោះទៀត ក៏អាចប្រឈមនឹងការរំលាយស្ថាប័នចោល ហាមឃាត់ការធ្វើសកម្មភាព បណ្ដេញចេញពីលទ្ធកម្មសាធារណៈ រឹបអូសឬបំផ្លាញចោលទ្រព្យសម្បត្តិនៃស្ថាប័នទាំងនោះផងដែរ។
នាយកប្រតិបត្តិសម្ព័ន្ធគណនេយ្យភាពសង្គម លោក សន ជ័យ មានប្រសាសន៍ថា អង្គការលោកស្វាគមន៍ចំពោះការវាយតម្លៃ តែលោកស្នើដល់រដ្ឋាភិបាលគួរតែបង្ហាញនីតិវិធីនៃការវាយតម្លៃ និងបើកឱកាសឲ្យអង្គការសង្គមស៊ីវិលចូលរួមក្នុងការវាយតម្លៃនេះផងដែរ ជៀសវាងការវាយតម្លៃតែរដ្ឋាភិបាលតែម្ខាង។
លោកថា៖ « ហើយនីតិវិធីនោះរៀបចំឡើងជាឧបករណ៍ដោយការមិនពេញចិត្ត ឬមានបុរេវិនិច្ឆ័យមុន។ តែដូចខ្ញុំថាអ៊ីចឹង អង្គការខ្ញុំគ្មានអីត្រូវលាក់លៀមព័ត៌មានសាធារណៈអីនោះទេ។ ទាំងម្ចាស់ជំនួយ ទាំងការអនុវត្តការងារ យើងតែងតែមានការសហការគ្នាជាមួយអាជ្ញាធររដ្ឋាភិបាល ហើយម្ចាស់ជំនួយរបស់យើងភាគច្រើនសុទ្ធតែមានមូលដ្ឋាននៅកម្ពុជាផងដែរ » ។
ប្រធានគណៈកម្មាធិការ សហប្រតិបត្តិការដើម្បីកម្ពុជា លោក សឿន សារឿន សោកស្ដាយចំពោះការសម្រេចដោយឯកច្ឆន្ទបែបនេះ ខណៈលោកជំរុញរដ្ឋាភិបាលឲ្យបង្ហាញ និងផ្សព្វផ្សាយឲ្យបានច្បាស់លាស់ដល់សង្គមស៊ីវិលពីនីតិវិធីនៃវាយតម្លៃនេះផងដែរ។
លោកថា៖ « បើសិនមានគណៈកម្មការរៀបចំដោយមានសមភាគីពីសង្គមស៊ីវិល និងអ្នកពាក់ព័ន្ធចូលរួមក្នុងការពិនិត្យមើលចំពោះការអនុវត្តហ្នឹង ជារឿងដែលសំខាន់មែនទែន។ ព្រោះរឿងមួយចំនួនត្រូវការសង្គមស៊ីវិលដែលមានការយល់ដឹងពីជំនាញរបស់ខ្លួនផ្ទាល់ អ៊ីចឹងគឺអាចជួយឲ្យមានសុភវិនិច្ឆ័យឲ្យបានត្រឹមត្រូវ » ។
វិធានការណ៍ថ្មីរបស់រដ្ឋាភិបាលនេះ គឺបន្ទាប់ពីកម្ពុជាអនុម័តច្បាប់អង្គការសង្គមស៊ីវិលនៅឆ្នាំ២០១៥ ដែលក្នុងនោះក៏មានការតម្រូវឲ្យសង្គមស៊ីវិលធ្វើរបាយការណ៍ហិរញ្ញវត្ថុរបស់ខ្លួនទៅឲ្យក្រសួងមហាផ្ទៃ១ឆ្នាំម្ដងផងដែរ។
កាលពីពេលថ្មីនេះ អង្គការអន្តរជាតិមួយបានវាយតម្លៃសេរីភាពនៃអង្គការសង្គមស៊ីវិលនៅកម្ពុជាស្ថិតក្នុងកម្រិតមួយដែលរងការបង្ក្រាបពីរដ្ឋាភិបាល រាប់ចាប់តាំងពីការចោទប្រកាន់ និងការប្រើប្រាស់ច្បាប់ប្រឆាំងសង្គមស៊ីវិលជាដើម។
របាយការណ៍របស់ក្រសួងមហាផ្ទៃឲ្យដឹងថា អង្គការសមាគមដែលបានចុះបញ្ជីនៅក្រសួងមហាផ្ទៃរហូតមកដល់ពេលនេះមានចំនួន ៥ ៣៦៣ អង្គការ នៅក្នុងនោះសមាគមមានចំនួន ២,១៧៩ និងអង្គការមិនមែនរដ្ឋាភិបាលចំនួន ៣ ១៤៩។
កាលពីថ្ងៃទី២២ ខែកុម្ភៈ ឆ្នាំ២០១៩ អង្គការឃ្លាំមើលការលាងលុយកខ្វក់អន្តរជាតិ ឈ្មោះថា ក្រុមការងារសកម្មភាពហិរញ្ញវត្ថុ (Financial Action Task Force) បានដាក់កម្ពុជាក្នុងបញ្ជីពណ៌ប្រផេះរបស់ខ្លួន ដោយនឹងត្រួតពិនិត្យលំហូរហិរញ្ញវត្ថុ វិនិយោគ និងពាណិជ្ជកម្ម ចេញនិងចូលប្រទេសកម្ពុជា។ ការរដាក់កម្ពុជាក្នុងបញ្ជីឃ្លាំមើលរបស់ FATF អាចនឹងបង្កការលំបាកដល់ក្រុមហ៊ុន ក៏ដូចជាបុគ្គលទូទៅ ក្នុងការប្រើប្រាស់ប្រព័ន្ធហិរញ្ញវត្ថុអន្តរជាតិ៕