វិស័យឯកជនមួយចំនួន ស្នើរដ្ឋាភិបាលឲ្យពង្រឹងសមត្ថភាពក្នុងការផ្តត់ផ្គង់អគ្គិសនី ទប់ស្កាត់អំពើពុករលួយ និងពង្រីកទីផ្សារអឺរ៉ុប ដើម្បីជំរុញការវិនិយោគឲ្យកាន់តែមានប្រសិទ្ធិភាព។
លោកនាយករដ្ឋមន្ត្រី ហ៊ុន សែន ក្នុងវេទិការរដ្ឋាភិបាលនិងវិស័យឯកជន នៅរាជធានីភ្នំពេញ នាថ្ងៃសុក្រនេះ បានបញ្ជាក់ជំហរថ្មីទៀតថា កម្ពុជានឹងសម្រេចគោលដៅ ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ខាងមុខ ទោះគ្មានប្រព័ន្ធអនុគ្រោះពន្ធរបស់សហភាពអឺរ៉ុបក៏ដោយ ។
លោកថា៖ «បើទោះបីជាត្រូវរឹតក្រមានឹងចង្កេះ ដើម្បីស៊ីឲ្យតិចក៏ត្រូវតែធ្វើដែរ ក៏ត្រូវតែរឹតដែរ ដើម្បីការពារឯករាជ្យរបស់ប្រទេស។ បើនរណាមួយហើយឱនក្បាលលិតជើងគេ ដើម្បីទទួលបានភាពអនុគ្រោះ មិនបាច់ធ្វើមេដឹកនាំគេទេ»។
ប្រធានសភាធុរកិច្ចអន្តរជាតិ លោក ប្រេតុន ការនី មានប្រសាសន៍បើទោះបីជាកម្ពុជាពេលនេះ មានវឌ្ឍនភាពនៃកំណែទម្រង់ជាច្រើន ក៏ប៉ុន្តែលោកថា កម្ពុជាត្រូវមានច្បាប់ និងបទបញ្ញតិបន្ថែមទៀតដើម្បីជំរុញទំនើបកម្មវិស័យធុរកិច្ច ខណៈបទបញ្ញត្តិបច្ចុប្បន្នមិនទាន់អនុវត្តឲ្យមានប្រសិទ្ធិភាពនៅឡើយ។
មន្ត្រីរូបនេះបញ្ចាក់ថា បើការអនុវត្តច្បាប់នៅទន់ខ្សោយ វានឹងជំរុញឲ្យការប្រកួតប្រជែងមិនស្មើភាពគ្នា។ លោកបន្តថា ការផ្គត់ផ្គង់អគ្គិសនីប្រកបដោយស្ថិរភាព និងតម្លៃសមរម្យ ជាកត្តាដែលរដ្ឋាភិបាលត្រូវឆ្លើយតបលើកកម្ពស់អ្នកវិនិយោគ។ លោក បន្ថែមថា ប្រសិទ្ធិភាពនៃការទប់ស្កាត់អំពើពុករលួយក៏ជារឿងសំខាន់ដែរ។
លោកថា៖ «តាមពិតខ្ញុំមានការភ្ញាក់ផ្អើល ដោយសារប្រទេសកម្ពុជានៅតែពុំអាចកែលម្អសន្ទស្សន៍នៃការយល់ឃើញអំពីអំពើពុករលួយបាន»។
ប្រធានសមាគមរោងចក្រកាត់ដេរកម្ពុជា GMAC លោក វ៉ាន់ សូអៀង មានប្រសាសន៍ថា វិធានការធ្វើកំណែទម្រង់របស់ដ្ឋាភិបាល ពិតជាបានចូលរួមចំណែកឲ្យវិស័យកាត់ដេរមានលទ្ធភាពប្រកួតប្រជែងជាមួយប្រទេសក្នុងតំបន់។ ប៉ុន្តែ លោកថា វិធានការរបស់សហភាពអឺរ៉ុបពីដំណើរការព្យួរពាក់ព័ន្ធនឹង EBA ក៏តម្រូវឲ្យកម្ពុជាឆ្លើយតបដោយក្លាហានផងដែរ។
លោកថា៖ «ទោះជាយ៉ាងណាក្តី យើងកំពុងស្ថិតនៅក្នុងពិភពលោកមួយ ដែលមានការផ្លាស់ប្តូរជាប់ជានិច្ចនៃដំណើរវិវឌ្ឍន៍ជាប់ជានិច្ច ដូចជា ការដកខ្លួនចេញពីសហភាពអឺរ៉ុបរបស់ចក្រភពអង់គ្លេស សង្គ្រាមពាណិជ្ជកម្មរវាងអាមេរិកនិងចិន និងការព្យូរ EBA ដោយសហភាពអឺរ៉ុប តម្រូវឲ្យមានការឆ្លើយតបភ្លាមៗ និងក្លាហានពីកម្ពុជា»។
ប្រធានសភាពាណិជ្ជកម្មកម្ពុជា លោក គិត ម៉េង ក្រៅពីប្រកាសគាំទ្រកំណែទម្រង់របស់ដ្ឋាភិបាល លោកស្នើសុំរដ្ឋាភិបាលឲ្យពិចារណាពង្រីកទីផ្សារនៅប្លុកលោកសេរីបន្ថែមទៀត។
លោកថា៖ «គោរពស្នើសុំ និងបើកទីផ្សារនៅសហភាពសេដ្ឋកិច្ចសហភាពអឺរ៉ុប អាស៊ីមជ្ឈឹមបូព៌ា អាហ្វ្រីក ជប៉ុននិងកូរ៉េ។ ទី៣ គោរពស្នើសុំបើកវេទិការរវាងវិស័យឯកជន និងរដ្ឋាភិបាលជារៀលរាល់ឆ្នាំ»។
ជាការឆ្លើយតបនាយករដ្ឋមន្ត្រីកម្ពុជា អះអាងថា វិធានការធ្វើកំណែទម្រង់ជាកញ្ចប់ ដូចជា ការលុបកាំសាប ដកចេញកាំកុងត្រូល និងបញ្ចុះតម្លៃតាមកំពង់ផែ ជាដើម អាចជាការកាត់បន្ថយការចំណាយថ្លៃដើមនៅក្នុងស្រុក។ មេដឹកនាំរូបនេះបញ្ជាក់ថា វិធានការវះកាត់ជាការទប់ស្កាត់អំពើពុករលួយ។ ចំណែកការផ្គត់ផ្គង់ភ្លើង លោកក៏សុំការយោគយល់ពីក្រុមអ្នកវិនិយោគទាំងនោះផងដែរ ដោយថា រដ្ឋាភិបាលទិញថាមពលអគ្គិសនីពីប្រទេសតួគីមកផ្គត់ផ្គង់បន្ថែម។
អ្នកវិភាគនយោបាយ លោក ឯម សុវណ្ណារ៉ា បង្ហាញការព្រួយបារម្ភថា កម្ពុជានឹងជួបវិបត្តិធ្ងន់ធ្ងរបើបាត់បង់ប្រព័ន្ធអនុគ្រោះពន្ធ EBA របស់សហភាពអឺរ៉ុប។
សហភាពអឺរ៉ុបកំពុងដំណើរនីតីវិធីក្នុងការព្យួរ EBA ជាបណ្ដោះអាសន្នពីកម្ពុជា ក្រោយពីរកឃើញថា រដ្ឋាភិបាលបានបរាជ័យក្នុងការបំពេញកាតព្វកិច្ចក្រោមកិច្ចព្រៀមព្រៀង។
ករណីនេះអង្គការសមាគមជិត៧០ កាលពីសប្តាហ៍មុន ក៏បានចេញសេចក្តីថ្លែងការណ៍រួម បង្ហាញការព្រួយបារម្ភពីវិធានការរបស់សហភាពអឺរ៉ុបនេះ ។ សេចក្តីថ្លែងការណ៍រួមបានលើកឡើងថា បាត់បង់ EBA នឹងជះឥទ្ធិពលជាអវិជ្ជមានដោយផ្ទាល់ និងប្រយោលដល់ជីវភាពរស់នៅ និងសុខមាលភាពរបស់ពលរដ្ឋ រួមទាំងការអភិវឌ្ឍនៅកម្ពុជាទាំងមូល។
ក្រុមអង្គការសង្គមស៊ីវិលផ្តល់យោបល់ថា កម្ពុជាអាចគេចផុតពីស្ថានភាពដ៏អាក្រក់នេះបាន ប្រសិនបើរដ្ឋាភិបាលប្រឹងប្រែងបំពេញកតាព្វកិច្ច អនុវត្តរដ្ឋធម្មនុញ្ញរបស់ខ្លួនឲ្យបានត្រឹមត្រូវ ប្រកបដោយមានប្រសិទ្ធិភាព ជាពិសេសមាត្រា៣១។ គោរពធម្មនុញ្ញអង្គការសហប្រជាជាតិ សេចក្តីប្រកាសជាសកលស្តីពីសិទ្ធិមនុស្ស សន្ធិសញ្ញា និងអនុសញ្ញានានា ដែលកម្ពុជាបានផ្តល់សច្ចាប័នជាមួយអង្គការសហប្រជាជាតិ៕