រដ្ឋាភិបាលបានសម្រេចផ្ដល់សិទ្ធិឲ្យក្រុមហ៊ុនឧកញ៉ា គិត ម៉េង បន្ដប្រតិបត្តិការផ្លូវដែកភាគខាងត្បូងដដែល តែប៉ុន្មានថ្ងៃប៉ុណ្ណោះក្រោយពីមានបញ្ជាផ្ទាល់មាត់ពីនាយករដ្ឋមន្ដ្រី ហ៊ុន សែន ឲ្យដកសិទ្ធិវិនិយោគរបស់ក្រុមហ៊ុនមួយនេះ។
ក្នុងសេចក្ដីជូនដំណឹងនៅថ្ងៃទី៣១ ខែមីនា ឆ្នាំ២០១៩នេះ ក្រសួងសាធារណៈការ និងដឹកជញ្ជូន បានប្រកាសថា ខ្លួនសម្រេចអនុញ្ញាតឲ្យក្រុមហ៊ុន Royal Railway របស់ឧកញ៉ា គិត ម៉េង បន្ដប្រតិបត្ដិការដឹកជញ្ជូនទំនិញ និងអ្នកធ្វើដំណើរតាមផ្លូវដែកភាគខាងត្បូងដដែល ដែលខ្សែភ្លើងនេះមានគោលដៅពីរាជធានីភ្នំពេញទៅកាន់ក្រុងព្រះសីហនុ។
ក្រសួងសាធារណៈការ និងដឹកជញ្ជូន លើកហេតុផលថា ក្រសួងត្រូវការពេលវេលា ដើម្បីត្រួតពិនិត្យទៅលើលក្ខខណ្ឌ និងបច្ចេកទេសពាក់ព័ន្ធនឹងការគ្រប់គ្រងដំណើរការផ្លូវដែកនេះ។
ម្យ៉ាងទៀត ក្រសួងអះអាងថា នឹងរៀបចំនីតិវិធីជ្រើសរើសក្រុមហ៊ុនជំនាញ និងការចូលរួមពីក្រុមហ៊ុនឧកញ៉ា គិត ម៉េង ផង ដើម្បីកែលម្អផ្លូវដែកភាគខាងជើង និងខាងត្បូងសមស្របតាមតម្រូវការរបស់អ្នកប្រើប្រាស់។
ក្រសួងសាធារណការ និងដឹកជញ្ជូន បានសម្រេចបែបនេះ តែ២ថ្ងៃប៉ុណ្ណោះក្រោយពីលោកនាយករដ្ឋមន្ដ្រី ហ៊ុន សែន បានប្រកាសដកសិទ្ធិវិនិយោគផ្លូវរថភ្លើងពីក្រុមហ៊ុន Royal Railway របស់លោក គិត ម៉េង មកឲ្យក្រសួងគ្រប់គ្រងបណ្ដោះអាសន្នវិញ មុននឹងដាក់ដេញថ្លៃជាសាធារណៈ។
លោក ហ៊ុន សែន បានលើកឡើងថា ការបញ្ចប់ការធ្វើអាជីវកម្មនេះ បន្ទាប់ពីមើលឃើញថា ក្នុងរយៈពេលជាង ១០ឆ្នាំមកនេះ វិស័យដឹកជញ្ជូនតាមផ្លូវដែកហាក់មិនបានទទួលជោគជ័យ ហើយក្រុមហ៊ុនក៏មិនបានពង្រីកសក្ដានុពលរបស់ខ្លួន និងមិនបានបំពេញតាមតម្រូវការរបស់អតិថិជនបានគ្រប់គ្រាន់៕
