លោកនាយករដ្ឋមន្ត្រី ហ៊ុន សែន បញ្ជាផ្ទាល់មាត់ទៅអាជ្ញាធរឱ្យផ្អាកការផ្គត់ផ្គង់អគ្គិសនីជាបណ្តោះអាសន្នដល់អ្នកដែលបាននិយាយថា ការដាច់ភ្លើងជាផែនការរៀបចំទុករបស់រដ្ឋាភិបាល ដើម្បីបានលេសធ្វើវារីអគ្គិសនីបន្ថែម។
ក្នុងពិធីសម្ពោធឱ្យដំណើរការប្រព័ន្ធផ្គត់ផ្គង់ទឹកស្អាតនៅខេត្តកំពត នាថ្ងៃទី២ ខែមេសានេះ លោក ហ៊ុន សែន ថ្លែងថា ប៉ុន្មានថ្ងៃនេះ មានអ្នកវិភាគមួយចំនួនបានលើកឡើងថា បញ្ហាកង្វះភ្លើងប្រើប្រាស់ជាការរៀបចំទុករបស់រដ្ឋាភិបាល ដើម្បីយកលេសសាងសង់ទំនប់វារីអគ្គិសនីបន្ថែម។
មេដឹកនាំរូបនេះ បានប្រតិកម្មថា ការវិភាគបែបនេះបានទម្លាក់កំហុសមកលើរដ្ឋាភិបាល និងបានបញ្ជាទៅអាជ្ញាធរឱ្យស្វែងរកផ្ទះ រួចផ្តាច់ការផ្តត់ផ្គង់ចរន្តអគ្គិសនីនៅផ្ទះរបស់អ្នកវិភាគទាំងនោះ។
លោកថា៖ «ខ្ញុំសង្ឃឹមថា អ្វីដែលខ្ញុំនិយាយនេះ ប្រជាពលរដ្ឋនឹងយល់ ប៉ុន្តែ ពួកអាអ្នកមិនយល់ សុំឱ្យហ្អែងមិនយល់ទៀតចុះ។ ឱ្យហ្អែងចេញមកវិភាគ ដើម្បីឱ្យអញកាត់ភ្លើងហ្អែង។កាត់ភ្លើងហ្មង នរណាថាអីថាទៅ។ ឱ្យវាអត់ភ្លើងក្នុងពេលចូលឆ្នាំ។ វាថាយើងផ្តាច់ភ្លើងនេះដើម្បីយើងមានលេសធ្វើវារីអគ្គិសនីថែម។ សួរថា ទៅធ្វើនៅកន្លែងណាឥឡូវនេះ អារ៉ែងអត់ឱ្យធ្វើទេ ប្រាប់ឱ្យហើយ អារ៉ែង។
៣សប្តាហ៍មកនេះ ការផ្គត់ផ្គង់អគ្គិសនីនៅតាមបណ្តារាជធានីខេត្ត មួយចំនួន រួមទាំងរាជធានីភ្នំពេញផងដែរត្រូវបានកាត់ផ្តាច់នៅពេលថ្ងៃ ធ្វើឱ្យអ្នកប្រកបមុខរបមួយចំនួនដែលពឹងផ្អែកលើថាមពលអគ្គិសនីពីរដ្ឋត្អូញត្អែរពីការខាតប់ងប្រាក់ចំណូលប្រចាំថ្ងៃរបស់ពួកគេ។
ប៉ុន្តែ រដ្ឋាភិបាលបានប្រកាសសុំការយោគយល់ពីបញ្ហានេះ ដោយឱ្យរងចាំការទិញថាមពលអគ្គិសនីពីប្រទេសតួកគីមកផ្គត់ផ្គង់បន្ថែម។
ទោះជាយ៉ាងណា ការថ្លែងរបស់នាយករដ្ឋមន្ត្រីនៅក្នុងពិធីនោះ មិនបានបញ្ចេញឈ្មោះទេ ប៉ុន្តែកាលពីថ្ងៃទី៣០ ខែមីនា វិទ្យុអាស៊ីសេរីបានសម្ភាសពលរដ្ឋមួយចំនួននៅរាជធានីភ្នំពេញ រួមទាំងស្ថាបនិកមាតាធម្មជាតិ លោក អាឡិច ផងដែរ ដោយដាក់ចំណងជើងថា «ពលរដ្ឋ និងអ្នកបរិស្ថានសង្ស័យថា ការដាច់ភ្លើងជាលេសដើម្បីសង់វារីអគ្គិសនីបន្ថែម»៕
អតីតសកម្មជនបរិស្ថាន លោក អា ឡិច ហៅការប្តេជ្ញាចិត្តរបស់រដ្ឋាភិបាលដែលថាមិនឲ្យតំបន់អារ៉ែងធ្លាក់ទៅក្នុងដៃក្រុមហ៊ុនណាមួយ សម្រាប់ធ្វើជាវារីអគ្គិសនីទៅថ្ងៃអនាគតនោះជារឿងគួរឲ្យស្វាគមន៍ ហើយថា លោកក៏មិនបានចោទប្រកាន់រដ្ឋាភិបាល ដូចការអះអាងរបស់នាយករដ្ឋមន្ត្រីនេះដែរ។
ប៉ុន្តែ សកម្មជនបរិស្ថានរូបនេះ បង្ហាញការខកចិត្តទៅនឹងចំណាត់ការនេះ ដោយលោកថារដ្ឋាភិបាលដែលអនុវត្តលទ្ធិប្រជាធិបតេយ្យនៅកម្ពុជាជាង៣០ឆ្នាំនេះ មិនចេះទទួលយកមតិរិះគន់ទៅពិចារណាដោះស្រាយ តែបែរជាមានវិធានការលើអ្នកបង្ហាញពីក្តីកង្វល់ទៅវិញ។
លោក ថា៖ «ការផ្តាច់ភ្លើងរាល់ថ្ងៃហ្នឹង ជាកំហុសធ្ងន់ធ្ងរបំផុតរបស់រដ្ឋាភិបាល ដែលបានសាងសង់ទំនប់វារីអគ្គិសនីជាង៥កន្លែង។ ហើយបំផ្លាញធនធានធម្មជាតិធ្ងន់ធ្ងរ ហើយជម្លៀសប្រជាជនរាប់រយគ្រួសារ។ ហើយទីបំផុត ដល់ពេលត្រូវការអគ្គិសនី គឺខ្វះភ្លើងបណ្តោយ។ អាហ្នឹងជាកំហុសធ្ងន់ធ្ងរ។ ហើយកំហុសមួយទៀត គឺអត់មាននរណាសុំទោស អត់មាននរណាលាលែងពីរដ្ឋាភិបាលរបស់លោក ហ៊ុន សែន ទេ អាហ្នឹងជាកំហុសធ្ងន់ធ្ងរមែនទែន»។
អ្នកនាំពាក្យសមាគមអាដហុក លោក ស៊ឹង សែនករុណា ហៅការប្រើវិធានការនេះថា បានគំរាមកំហែងដល់សេរីភាពបញ្ចេញមតិដែលធានាដោយរដ្ឋធម្មនុញ្ញ ដោយថា មេដឹកនាំប្រជាធិបតេយ្យ ត្រូវបកស្រាយពន្យល់ មិនត្រូវប្រើវិធានការ ជាការឆ្លើយតបទៅលើសេរីភាពបញ្ចេញមតិបែបនេះទេ។
លោកថា៖ «នៅពេលដែលការបញ្ចេញមតិមួយត្រូវបានឆ្លើយតបដោយមធ្យោបាយបែបនេះ រដ្ឋាភិបាលពិតជាអត់បានដឹងថា បញ្ហារបស់ប្រជាពលរដ្ឋ បញ្ហារបស់សង្គមជាតិ របស់ខ្លួនហ្នឹង មានរឿងរ៉ាវអ្វីខ្លះដែលរដ្ឋាភិបាលត្រូវដឹងត្រូវឮ ត្រូវធ្វើការឆ្លើយតបរកដំណោះស្រាយ និងគ្មាននរណាហ៊ានលើកយកមកនិយាយទៀតទេ។ អញ្ចឹង ការដឹកនាំហ្នឹង វាមិនបានឆ្លើយតបទៅនឹងតម្រូវការរបស់ប្រជាពលរដ្ឋទេ។ ដល់អញ្ចឹងទៅ ការអភិវឌ្ឍហ្នឹង វាមិនមានភាពប្រសើរឡើយ»។
អគ្គិសនីកម្ពុជាកាលពីថ្ងៃទី១៨ ខែមីនា បានជូនដំណឹងថា ការផ្គត់ផ្គង់ភ្លើងមិនគ្រប់គ្រាន់ ដោយសារអាកាសធាតុក្តៅខ្លាំង បង្កឲ្យខ្វះខាតទឹកខុសប្រក្រតីនៅទំនប់វារីអគ្គិសនីមួយចំនួនដែលកំពុងផលិតថាមពលអគ្គីសនី ធ្វើឱ្យការផ្គត់ផ្គង់ ថយចុះ៕