មន្ត្រីក្រសួងបរិស្ថាននៅតែចាត់ទុកព្រៃឡង់ជាតំបន់មានសក្តានុពល និងមានអត្ថប្រយោជន៍ ដែលត្រូវរួមគ្នាការពារ ហើយខាងក្រសួងក្នុងអាណត្តិទី៦នេះ ក៏ប្តេជ្ញាថែរក្សា និងការពារព្រៃដែនជម្រកសត្វព្រៃមួយនេះ ឱ្យកាន់តែមានប្រសិទ្ធភាពបន្ថែមទៀត។
ថ្លែងក្នុងពិធីប្រកាសចាប់ផ្តើមគម្រោង USAID ព្រៃឡង់បៃតង នាព្រឹកនេះ រដ្ឋលេខាធិការក្រសួងបរិស្ថាន លោក សៅ សុភាព មានប្រសាសន៍ថា គម្រោងនេះ គឺជាផ្នែកមួយបង្កើន និងពង្រឹងប្រសិទ្ធភាពថែរក្សា និងការពារធនធានធម្មជាតិនៅតំបន់ទេសភាពព្រៃឡង់។
ជាមួយគ្នានេះ លោកអះអាងថា ខាងក្រសួងមានយន្តការពង្រឹងការអនុវត្តច្បាប់ ដោះស្រាយបញ្ហានៅសេសសល់ ពិសេសទប់ស្កាត់ និងការពារតំបន់ព្រៃឡង់ឱ្យកាន់តែមានប្រសិទ្ធភាពផងដែរ។
លោកមានប្រសាសន៍ថា៖ «ពាក់ព័ន្ធនឹងការការពារ និងអភិរក្ស ដែលរាជរដ្ឋាភិបាលកម្ពុជាបានយកចិត្តទុកដាក់។ ហើយនៅអាណត្តិនេះ ក៏បន្តយកចិត្តទុកដាក់បន្ថែមទៀតលើការងារការពារ និងអភិរក្សនៅក្នុងតំបន់ព្រៃឡង់ទាំងមូល»។
បណ្តាញស្នូលការពារព្រៃឡង់មកពីខេត្តព្រះវិហារ លោក ស្រី ថី យល់ថា ការប្តេជ្ញារបស់ក្រសួងបរិស្ថានក៏មិនខុសពីការប្តេជ្ញាមុនៗនោះដែរ ដោយថា ខាងប្រជាសហគមន៍មានសង្ឃឹមតិចតួចណាស់។
លោកបន្តថា បច្ចុប្បន្នស្ថានភាពបទល្មើសព្រៃឈើនៅតំបន់ព្រៃឡង់នៅតែកើតមានឥតឈប់ឈរ ហើយការទប់ស្កាត់ និងបង្ក្រាបពីសំណាក់អាជ្ញាធរពុំមានប្រសិទ្ធភាពនោះឡើយ។
លោកបន្តថា៖ «ទោះបីជាគាត់អះអាងយ៉ាងណា ក៏ដូចជាមិនទាន់មានប្រសិទ្ធភាពទេ នៅឡើយទេ។ ខ្ញុំមើលទៅឃើញមិនសមហេតុសមផលច្រើន ព្រោះនៅក្នុងតំបន់នោះវាមានមន្ត្រីមួយចំនួនច្រើនតែឃុបឃិតជាមួយ បទល្មើសទៅ! វាត្រូវគ្នា ដឹកឈើបានហូរហែរ ជាប្រចាំទាំងយប់ទាំងថ្ងៃ ឥតមានស្រាកស្រាន្តទេ»។
ព្រឹត្តិបត្រព័ត៌មានរបស់ USAID ឱ្យដឹងថា គម្រោង USAID ព្រៃឡង់បៃតង គឺជាគម្រោងមួយធ្វើឱ្យប្រសើរឡើងលើការគ្រប់គ្រងព្រៃឈើនៅក្នុងនិងជុំវិញដែនជម្រកសត្វព្រៃ ព្រៃឡង់ ដោយផ្តោតសំខាន់ទៅលើការអភិរក្សធម្មជាតិ សហគមន៍ និងអភិបាលកិច្ចផងដែរ។
ប្រភពដដែលបញ្ជាក់ថា តំបន់ទេសភាពព្រៃឡង់ និងតំបន់ជុំវិញលាតសន្ធឹងលើផ្ទៃដីជាង៣លានហិកតា។
គម្រោងនេះ អាមេរិកបានផ្តល់ជំនួយជាង២០លានដុល្លារ សម្រាប់រយៈពេល៥ឆ្នាំ ដោយចាប់ផ្តើមពីឆ្នាំ២០១៩ ដល់ឆ្នាំ២០២៣ ដែលអនុវត្តដោយ Tetra Tech សហការជាមួយអង្គការសមាគមអភិរក្សសត្វព្រៃ និងអង្គការអភិរក្សអន្តរជាតិ ព្រមទាំងដៃគូសហការសំខាន់ គឺក្រសួងបរិស្ថាន។
អ្នកសម្របសម្រួលបណ្តាញសន្តិភាពសហគមន៍ លោក សេង សុខហេង សាទរចំពោះការប្តេជ្ញាចិត្តរបស់មន្ត្រីក្រសួងបរិស្ថានក្នុងការអនុវត្តច្បាប់ និងដោះស្រាយបញ្ហាបទល្មើស ប៉ុន្តែ លោកមើលឃើញថា នឹងមិនមានប្រសិទ្ធភាពទេ។
លោកថា ដើម្បីឱ្យការទប់ស្កាត់បទល្មើសព្រៃឈើ ពិសេសនៅតំបន់ព្រៃឡង់ ម្យ៉ាងដើម្បីឱ្យគម្រោង USAID បៃតងនេះ ទទួលបានជោគជ័យ រដ្ឋាភិបាលត្រូវមានឆន្ទៈពិតប្រាកដ ដោយអនុវត្តច្បាប់គ្មានការរើសអើង និងបោសសំអាតអំពើពុករលួយជាដើម។
លោកមានប្រសាសន៍ថា៖ «ព្រោះអ្វីដែលយើងធ្វើការស៊ើបអង្កេត ធ្វើការឃ្លាំមើល ធ្វើការតាមដាន ស្ថានភាពជាក់ស្តែងនៅតាមមូលដ្ឋាន គឺពិតជាមានការលំបាក។ អ៊ីចឹង ការប្តេជ្ញាចិត្តខ្ញុំមើលឃើញថា នឹងមិនអាចទៅរួច ហើយបើទៅរួច គឺតិចតួចបំផុត»។
រាជរដ្ឋាភិបាល បានចេញអនុក្រឹត្យកាលពីថ្ងៃទី៩ ខែឧសភា ឆ្នាំ២០១៦ បង្កើតតំបន់ព្រៃឡង់ ជាតំបន់ដែនជម្រកសត្វព្រៃ មានផ្ទៃដីជាង៤៣ម៉ឺនហិកតា (៤៣១.៦៨៣) គ្របដណ្ដប់លើខេត្តចំនួន ៤ រួមមាន ខេត្តព្រះវិហារ ខេត្តកំពង់ធំ ខេត្តក្រចេះ និងខេត្តស្ទឹងត្រែង។
តំបន់នេះស្ថិតក្រោមការគ្រប់គ្រងផ្ទាល់របស់ក្រសួងបរិស្ថាន ដោយមានការសហការជាមួយអាជ្ញាធរពាក់ព័ន្ធផ្សេងទៀត៕
