មន្ត្រីនគរបាលខេត្តកំពង់ស្ពឺ បានឲ្យដឹងថា កម្មការិនី ៥នាក់ បានរងរបួសដាច់ដៃម្ខាង បន្ទាប់ពីរថយន្តមួយគ្រឿងដែលដឹកពួកគេបានបុកគ្នាជាមួយរថយន្តមួយគ្រឿងទៀត នៅឯស្រុកឧដុង្គ នៅព្រឹកថ្ងៃនេះ។
ស្នងការរងនគរបាលខេត្តកំពង់ស្ពឺ លោក តាប់ លន បានប្រាប់ វីអូឌី ថា រថយន្តមួយគ្រឿងដែលដឹកកម្មករកម្មការិនីជាច្រើននាក់ បានបុកគ្នាជាមួយរថយន្តមួយគ្រឿងទៀតម៉ាក Hino នៅព្រឹកថ្ងៃនេះ ដោយបណ្ដាលឲ្យកម្មករកម្មការិនី ១២នាក់រងរបួស ក្នុងនោះកម្មករិនី ៨នាក់រងរបួសធ្ងន់ ហើយកម្មការិនី ៥នាក់ បានរងរបួសដាច់ដៃមួយចំហៀង។
មន្ត្រីនគរបាលរូបនេះ បានឲ្យដឹងទៀតថា កម្មការិនីរងគ្រោះទាំងនោះ ត្រូវបានបញ្ជូនទៅសង្គ្រោះនៅតាមមន្ទីរពេទ្យនានា ស្ថិតក្នុងស្រុកឧត្ដុង ហើយលោកថា សមត្ថកិច្ចបានឃាត់ខ្លួនអ្នកបើកបររថយន្តដឹកកម្មកររួចហើយ។
លោក តាប់ លន បន្ថែមថា៖ «អ្នកបើកបរដឹកកម្មករដែលជាអ្នកបង្កហ្នឹង ខ្ញុំបានឃាត់ខ្លួន និងកំពុងកសាងសុំណុំរឿងបញ្ជូនទៅតុលាការ ដើម្បីចាត់ការតាមនីតិវិធី»។
មន្ត្រីជាន់ខ្ពស់ផ្នែកចរាចរណ៍ លោក រុន រ័ត្នវាសនា ឲ្យដឹងកាលពីដើមសប្ដាហ៍នេះថា មនុស្សដល់ទៅ ២០៣នាក់ បានស្លាប់ ហើយ៥១៥នាក់ទៀត បានរងរបួស នៅក្នុងគ្រោះថ្នាក់ចរាចរណ៍ ៣៨៣ករណី នៅទូទាំងប្រទេស នៅក្នុងខែមីនាកន្លងមកនេះ ដែលលោកថា តួលេខនេះខ្ពស់ជាងតួលេខអ្នកស្លាប់ក្នុងគ្រោះថ្នាក់ចរាចរណ៍នៅក្នុងខែកុម្ភៈ និងខែមករាកន្លងមកទៅទៀត៕