អាជ្ញាធរកម្ពុជា អះអាងថា នគរបាលកម្ពុជាកំពុងស្វែងរកចាប់ខ្លួនក្រុមជនជាតិចិនតៃវ៉ាន់ ដែលត្រូវបានកំណត់ថា ជាមេខ្លោងស្ថិតនៅពីក្រោយទីតាំងកែច្នៃ និងផលិតគ្រឿងញៀនមួយកន្លែង នៅរាជធានីភ្នំពេញ។
សមត្ថកិច្ចរាជធានីភ្នំពេញ បានចុះបង្ក្រាបទីតាំងផលិតគ្រឿងញៀនមួយកន្លែង ស្ថិតនៅសង្កាត់អូរបែកក្អម ខណ្ឌសែនសុខ កាលពីថ្ងៃអង្គារកន្លងមកនេះ និងបានរកឃើញម៉ាស៊ីនលាយថ្នាំញៀនចំនួន ៩គ្រឿង។
ក្រៅពីនេះ កម្លាំងសមត្ថកិច្ចក៏បានរកឃើញមេថ្នាំមួយចំនួនទៀត ដែលត្រូវបានសង្ស័យថា ជាគ្រឿងញៀនមានទម្ងន់ដល់ទៅ ១៧៣គីឡូក្រាម។
អគ្គស្នងការរងនគរបាលជាតិទទួលបន្ទុកផ្នែកប្រយុទ្ធប្រឆាំងគ្រឿងញៀន លោក ម៉ក់ ជីតូ ប្រាប់ VOD នៅថ្ងៃនេះថា ក្រុមជនល្មើសនៅពីក្រោយទីតាំងកែច្នៃគ្រឿងញៀនដ៏ធំមួយនេះ គឺជាជនជាតិចិនតៃវ៉ាន់ ហើយលោកថា ពួកគេបានរត់គេចខ្លួនបាត់ នៅមុនពេលសមត្ថកិច្ចចុះឆែកឆេរ និងបង្ក្រាបទីតាំងនោះ។
លោក ម៉ក់ ជីតូ អះអាងថា ជនបរទេសទាំងនោះ បានលួចលាក់បង្កប់ទីតាំងកែច្នៃគ្រឿងញៀននៅក្នុងផ្ទះជួលមួយកន្លែង ហើយសមត្ថកិច្ចបានស្រាវជ្រាវ និងឈានទៅរឹបអូសវត្ថុតាងជាច្រើន បន្ទាប់ពីម្ចាស់ផ្ទះជួលមានការសង្ស័យ និងរាយការណ៍ជូនសមត្ថកិច្ច។ លោកបន្ដថា សមត្ថកិច្ចកំពុងធ្វើការត្រួតពិនិត្យ និងស្រាវជ្រាវ ដើម្បីឈានទៅចាប់ខ្លួនមេខ្លោងគ្រឿងញៀនយកមកផ្តន្ទាទោស។
លោកបន្ដថា៖ «គឺជាជនបរទេស ចិនតៃវ៉ាន់។ ជាទូទៅ ពួកគេឧក្រិដ្ឋជនគ្រឿងញៀនតែងតែចង់បានកម្ពុជាជាកន្លែងផលិត ប៉ុន្ដែ ឧបាយកលនេះ យើងបង្ក្រាបបានរហូត ហើយករណីលើកនេះ អ្នកខ្លះយល់ថា ជាកន្លែងផលិត តាមពិត វាជាការកែច្នៃ។ បើកន្លែងផលិត វាមានសារធាតុគីមីច្រើន ហើយវិធីរបស់វាច្រើន»។
អាជ្ញាធរកម្ពុជាបានបង្ក្រាបបទល្មើសគ្រឿងញៀនធំៗជាបន្តបន្ទាប់នៅក្នុងរយៈពេល ៣ខែដើមឆ្នាំ២០១៩នេះ ខណៈដែលបទល្មើសគ្រឿងញៀន បានរីករាលដាលនៅទូទាំងប្រទេស។
កាលពីខែកុម្ភៈកន្លងទៅ កម្លាំងចម្រុះក្រសួងមហាផ្ទៃបានឆ្មក់បង្ក្រាបក្លឹបកម្សាន្ដរ៉ក់ ហើយចាប់បានគ្រឿងញៀនប្រហែល ៥០គីឡូក្រាម និងបានឈានទៅឃាត់ខ្លួន និងចោទប្រកាន់លោកឧកញ៉ា គិត ធាង ដែលត្រូវជាម្ចាស់ក្លឹបកម្សាន្ដមួយនេះ រួមទាំងអ្នកជាប់ពាក់ព័ន្ធ ៤នាក់ផ្សេងទៀត។
អគ្គស្នងការរងនគរបាលជាតិទទួលបន្ទុកផ្នែកប្រឆាំងបទល្មើសគ្រឿងញៀន លោក ម៉ក់ ជីតូ បានប្រាប់ វី.អូ.ឌី កាលពីថ្ងៃម្សិលមិញ ថា មនុស្សដល់ទៅ ៤,៣៩៩នាក់ ក្នុងនោះមានជនបរទេស ១០៤នាក់ និងស្ត្រី ៣៧២នាក់ ត្រូវបានសមត្ថកិច្ចកម្ពុជាចាប់ខ្លួននៅក្នុងប្រតិបត្តិការបង្ក្រាបគ្រឿងញៀនដល់ទៅ ២,០៣៣ករណី នៅទូទាំងប្រទេស ចាប់ពីថ្ងៃទី១ ខែមករា រហូតដល់ថ្ងៃទី២ ខែមេសានេះ៕