មន្ត្រីមកពីស្ថាប័នចម្រុះ នៅតែពុំទាន់អាចស្វែងរកមូលហេតុនៃឃាតកម្មលើស្ត្រីម្នាក់ និងចៅស្រីរបស់គាត់ ដែលត្រូវបានសម្លាប់ និងកាត់ក្បាល នៅឯស្រុកព្រៃឈរ ខេត្តកំពង់ចាម កាលពីពីរថ្ងៃមុននៅឡើយទេរហូតមកដល់ថ្ងៃនេះ ខណៈពួកគេថា កំពុងតែបន្តស៊ើបអង្កេតទៅលើឃាតកម្មនេះនៅឡើយ។
ស្ត្រីឈ្មោះ ពូ អូន វ័យ ៦៥ឆ្នាំ និងចៅស្រីរបស់គាត់ឈ្មោះ ខេង សាវឿន ដែលទើបតែមានវ័យ ៦ឆ្នាំ ត្រូវបានប្រទះឃើញស្លាប់ដោយគ្មានក្បាលទាំងពីរ នៅចម្ងាយជាង ៣០០ម៉ែត្រពីខាងក្រោយផ្ទះរបស់គាត់ ស្ថិតក្នុងភូមិក្នុងទួលថ្ម ស្ថិតក្នុងឃុំថ្មពូន កាលពីថ្ងៃទី៣ ខែមេសា។
ស្នងការរងទទួលបន្ទុកផែនព្រហ្មទណ្ឌនៃស្នងការដ្ឋាននគរបាលខេត្តកំពង់ចាម លោក ហេង វុទ្ធី ប្រាប់ វី.អូ.ឌី ថា សមត្ថកិច្ចកំពុងស៊ើបអង្កេតករណីនេះយ៉ាងយកចិត្តទុកដាក់ ប៉ុន្តែ លោកមិនបានប្រាប់ព័ត៌មានលម្អិតទេ។
លោកមានប្រសាសន៍ថា៖ «កំពុងបន្តកិច្ច។ អារឿងការស្រាវជ្រាវ បងត្រូវដឹងថា ការងារវាមានកម្រិតណាស់ មិនអាចមានព័ត៌មានណា ឬបញ្ចេញទៅខាងក្រៅណាបានទេ។ យើងកំពុងធ្វើការងារដុតដៃដុតជើងដល់ហើយនេះ»។
ឃាតកម្មមួយនេះ ក៏ស្ថិតក្រោមការចូលរួមស៊ើបអង្កេតពីសំណាក់អង្គភាពការពារកុមារ ហៅកាត់ថា CPU ដែលជាផ្នែកមួយនៃអង្គការមូលនិធិកុមារកម្ពុជារបស់លោក Scott Neeson ផងដែរ។
អង្គភាព CPU បានបង្ហោះសារលើទំព័រហ្វេសប៊ុករបស់ខ្លួននៅថ្ងៃនេះថា ពួកគេកំពុងចូលរួមស៊ើបអង្កេតជាមួយអាជ្ញាធកម្ពុជា ដើម្បីស្វែងរកយុត្តិធម៌ជូនជនរងគ្រោះ និងក្រុមគ្រួសារជុំវិញករណីឃាតកម្មដ៏សាហាវនេះ។
មន្ត្រីអង្កេតសមាគមការពារសិទ្ធិមនុស្សអាដហុកប្រចាំខេត្តកំពង់ចាម លោក ឡេង សេងហាន លើកឡើងថា ករណីនេះ ខាងលោកគ្រោងនឹងចុះស៊ើបអង្កេតក្នុងពេលឆាប់ៗនេះ។
មន្ត្រីសង្គមស៊ីវិលរូបនេះ បង្ហាញក្តីបារម្ភចំពោះរូបភាពឃាតកម្មដែលមានលក្ខណៈកាន់តែសាហាវបែបនេះ ហើយលោកក៏ជំរុញឱ្យមានស៊ើបអង្កេតឱ្យបានម៉ឹងម៉ាត់ ដើម្បីឈានទៅចាប់ខ្លួនជនល្មើសយកមកផ្តន្ទាទោសតាមផ្លូវច្បាប់ផងដែរ។
លោក ឡេង សេងហាន បន្តថា៖ «យើងមានការបារម្ភៗទាំងសុវត្ថិភាពរបស់ប្រជាពលរដ្ឋនៅតំបន់ហ្នឹង បារម្ភទាំងសុវត្ថិភាពធ្វើដំណើរចេញចូលរបស់ពលរដ្ឋនៅក្នុងតំបន់ហ្នឹង និងតំបន់ផ្សេងទៀត។ យើងមិនដឹងថា ថ្ងៃក្រោយទៅ ករណីហ្នឹងវាកើតឡើងទៅលើបុគ្គលណាផ្សេងទៀត យើងអត់ដឹង»។
កាលពីចុងឆ្នាំ២០១៣ អំពើឃាតកម្មសាហាវមួយក៏ធ្លាប់បានកើតឡើងនៅឃុំថ្មពួននេះដែរ ដោយកាលណោះ បុរសជាប្តីម្នាក់ បានកាំបិតកាប់ទៅលើប្រពន្ធ និងកូនស្រីរបស់ខ្លួន បណ្ដាលឱ្យស្លាប់ភ្លាមៗ ហើយជនល្មើសក៏ត្រូវបានប្រជាពលរដ្ឋនៅក្នុងភូមិ ផ្ទុះកំហឹងនាំគ្នាឡោមព័ទ្ធគប់ដុំថ្ម និងព្រួតវាយរហូតស្លាប់នៅហ្នឹងកន្លែងទាំងកណ្តាលថ្ងៃផងដែរ៕