សមត្ថកិច្ច​ឃាត់​ខ្លួន​បុរស​ម្នាក់​ករណី​លួច​​​គណនី​​ហ្វេសប៊ុក​អ្នកដទៃ​ និង​ប្រើ​​បង្ហោះ​រូប​អាក្រាត​

សមត្ថកិច្ច បានចាប់​ខ្លួនបុរសម្នាក់ពាក់ព័ន្ធករណីលួចកាន់កាប់គណនី​ហ្វេសបុកអ្នកដទៃដោយគ្មានការអនុញ្ញាត និងបង្ហោះរូបភាពអាក្រាតបរិហាកេរ្តិ៍ម្ចាស់គណនីហ្វេសប៊ុកនោះ​។

យោងតាមការចុះផ្សាយរបស់នាយកដ្ឋានប្រឆាំងបទល្មើសបច្ចេកវិទ្យា កម្លាំងសមត្ថកិច្ចខណ្ឌចំការមន បានធ្វើការឃាត់ខ្លួនបុរសម្នាក់ឈ្មោះ លី សុខផេង ពាក់ព័ន្ធនឹងករណីលួចកាន់កាប់គណនេយ្យហ្វេសប៊ុកអ្នកដទៃដោយគ្មានការអនុញ្ញាត និងបានបង្ហោះរូបភាពអាក្រាតបរិហាកេរ្តិ៍ម្ចាស់គណនី​ហ្វេសប៊ុក។

ប្រភពដដែលឲ្យដឹងថា នាយកដ្ឋានប្រឆាំងបទល្មើសបច្ចេកវិទ្យាបានបញ្ជូនសំណុំរឿង និងជនល្មើសទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់។

កាលពីថ្ងៃទី២៦ ខែមីនា ឆ្នាំ២០១៩ យុវជនម្នាក់ត្រូវបានអាជ្ញាធរខេត្តបន្ទាយមានជ័យ​ឃាត់ខ្លួន ក្រោយពីបានបង្ហោះព័ត៌មានមិនពិតនៅក្នុងបណ្តាញ​សង្គម ​You Tube៕