ក្រសួងសុខាភិបាល អំពាវនាវទៅប្រជាពលរដ្ឋទាំងអស់ត្រូវថែរក្សាសុខភាពដោយបរិភោគអាហារដោយប្រុងប្រយ័ត្នក្នុងអំឡុងពិធីបុណ្យចូលឆ្នាំខ្មែរខាងមុខនេះ ដើម្បីបង្កាករណីពុលអាហារ និងពុលស្រា។
ក្នុងសេចក្តីប្រកាសព័ត៌មានចុះថ្ងៃទី៥ ខែមេសា ក្រសួងសុខាភិបាល បានប្រាប់ឲ្យប្រជាពលរដ្ឋមានការប្រុងប្រយ័ត្នក្នុងការទទួលទានអាហារ ដោយថា ត្រូវប្រើប្រាស់អាហារស្អាត ទឹកស្អាត បន្លែស្អាត និងកុំប្រើប្រាស់គ្រឿងស្រវឹងក្នុងអំឡុងបុណ្យចូលឆ្នាំ ដើម្បីចៀសសវាងកើតមានបញ្ហាគ្រោះថ្នាក់ផ្សេងៗ។
ក្រសួងសុខាភិបាល បានណែនាំទៀតថា ប្រសិនបើមានការសង្ស័យថា មានការពុលអាហារ ដូចជា ឈឺក្បាល ឈឺពោះ វិលមុខ ស្រវាំងភ្នែក សន្លប់ និងពិបាកដកដង្ហើម ជាដើម ត្រូវស្វែងរកការពិនិត្យ និងព្យាបាលនៅមណ្ឌលសុខភាព ឬមន្ទីរពេទ្យដែលនៅជិតជាបន្ទាន់។
បើតាមសេចក្តីប្រកាសព័ត៌មានរបស់ក្រសួងសុខាភិបាល នៅឆ្នាំ២០១៨ មានករណីពុលអាហារចំនួន១៩លើក ហើយមានមនុស្សពុលសរុប៨៥២នាក់ ក្នុងនោះមានអ្នកស្លាប់១៣នាក់។ ចំណែកករណីពុលស្រាមានចំនួន៥លើក ដែលមានអ្នកពុល២០៦នាក់ ក្នុងនោះមានអ្នកស្លាប់១២នាក់ ខណៈនៅឆ្នាំ២០១៩ គិតត្រឹមខែមីនានេះ មានករណីពុលអាហារសរុបចំនួន៦លើក មានមនុស្សពុល២៤៦នាក់ ក្នុងនោះមានអ្នកស្លាប់២នាក់ផងដែរ៕