ក្រសួងការពារជាតិ អំពាវនាវទៅពលរដ្ឋ «ត្រូវមានទំនុកចិត្តលើកងយោធពលខេមរភូមិន្ទ កុំចាញ់ឧបាយកល ក្រុមទុច្ចរិត» ដើម្បីរួមគ្នាការពាររដ្ឋាភិបាល។
សេចក្តីប្រកាសព័ត៌មានចុះថ្ងៃព្រហស្បតិ៍ម្សិលមិញ ក្រសួងការពារជាតិ អះអាងថា ថ្មីៗនេះមានជនទុច្ចរិតមួយចំនួនបានបង្កើត Facebook បន្លំយករូបនាយទាហានទៅវាយប្រហាររដ្ឋាភិបាល។ក្រសួងចាត់ទុកថា ទង្វើនេះថា «ខុសច្បាប់ ត្រូវចាត់វិធានការយ៉ាងម៉ឺងម៉ាត់បំផុត»។
លិខិតដដែលបញ្ជាក់ថា កងយោធពលខេមរភូមិន្ទ រក្សាជំហរស្មោះត្រង់ការពាររដ្ឋាភិបាល ប្រឆាំងដាច់ខាតចំពោះការប៉ុនប៉ងបង្កភាពវឹកវរដល់សង្គម និងអំពាវនាវទៅប្រជាពលរដ្ឋទាំងអស់ឲ្យមាន«ទំនុកចិត្តលើកងយោធពលខេមរភូមិន្ទ កុំចាញ់ឧបាយកលក្រុមទុច្ចរិតទាំងអស់នោះ»។
សេចក្តីប្រកាសព័ត៌មានរបស់ក្រសួងការពារជាតិនេះ ធ្វើឡើងក្រោយមួយថ្ងៃដែលអតីតមេដឹកនាំបក្សប្រឆាំង លោក សមរង្ស៊ី បង្ហោះវីដេអូលើបណ្តាញសង្គមរបស់ខ្លួន ពីរូបភាពពលរដ្ ឋនិងកងទ័ពនៅអាល់សេរី ធ្វើបាតុកម្មទម្លាក់មេដឹកនាំរបស់ខ្លួនបានសម្រេច និងអំពាវទៅពលរដ្ឋខ្មែរឲ្យយកគំរូនេះ។
លោកថា៖ «កងកម្លាំងប្រដាប់អាវុធនៅប្រទេសកម្ពុជា ត្រូវតែយកគំរូតាមកងកម្លាំងប្រដាប់អាវុធនៅប្រទេស Algérie គឺឈប់គាំទ្រជនផ្តាច់ការ ហ៊ុន សែន ទៀតទៅ តែបែរមកគាំទ្រប្រជារាស្ត្រខ្មែរវិញ ដែលចង់បំបាត់អំណាចផ្តាច់ការដូចនៅប្រទេស Algérie អញ្ចឹងដែរ។»
អ្នកវិភាគវ័យក្មេង កញ្ញា លី ស្រីស្រស់ បង្ហាញការព្រួយបារម្ភថា បើអ្នកនយោបាយនៅតែសាចទឹកដាក់គ្នា កម្ពុជាអាចនឹងជួបវិបត្តិធ្ងន់ធ្ងរ ពីវិធានការរបស់សហគមន៍អន្តរជាតិដែលជំរុញឲ្យស្តារប្រជាធិបតេយ្យ។
អ្នកវិភាគវ័យក្មេងរូបនេះ ផ្តល់ជាយោបល់ថា អ្នកនយោបាយគួរចាប់ដៃគ្នាស្វែងរកដំណោះស្រាយតម្កល់ប្រយោជន៍ជាតិជាធំ ជាជាងគិតតែប្រយោជន៍បក្ខពួក ហើយបណ្តោយឲ្យប្រជាពលរដ្ឋជាម្ចាស់ប្រទេស ក្លាយជាជនរងគ្រោះដោយសារតែជម្លោះនយោបាយនេះ។
កញ្ញាថា៖ «រឿងអ្វីក៏ដោយ បើសិនជាយើងឲ្យតម្លៃជាតិជាធំ ខ្ញុំជឿថា វាគ្មានអ្វីដែលមិនអាចធ្វើបានទេ តែផ្ទុយទៅវិញ បើរដ្ឋាភិបាលគាត់អាចអនុវត្តទៅលើការស្នើសុំរបស់សហភាពអឺរ៉ុបបាន រដ្ឋាភិបាលក៏ទទួលបានការសាទរពីប្រជាពលរដ្ឋជុំវិញការថាចេះបន្ទន់ខ្លួនក្នុងការដោះស្រាយនៅពេលដែលប្រទេសជាតិកំពុងតែជួបបញ្ហា»។
សហភាពអឺរ៉ុបកំពុងដំណើរការនីតិវិធីក្នុងការព្យួរ EBA ជាបណ្ដោះអាសន្នពីកម្ពុជា ក្រោយពីរកឃើញថា រដ្ឋាភិបាលមួយនេះ បានបរាជ័យក្នុងការបំពេញកាតព្វកិច្ចក្រោមកិច្ចព្រមព្រៀង។
អង្គការសមាគមជិត៧០ កាលពីដើមខែនេះ អះអាងការបាត់បង់ EBA នឹងជះឥទ្ធិពលជាអវិជ្ជមានដោយផ្ទាល់ និងដោយប្រយោលដល់ជីវភាពរស់នៅ និងសុខមាលភាពរបស់ពលរដ្ឋ រួមទាំងការអភិវឌ្ឍនៅកម្ពុជាទាំងមូល ។
ប៉ុន្តែ ពួកគេផ្តល់ជាយោបល់ថា កម្ពុជាអាចគេចផុតពីស្ថានភាពដ៏អាក្រក់នេះបាន ប្រសិនបើរដ្ឋាភិបាលប្រឹងប្រែងបំពេញកតាព្វកិច្ចអនុវត្តរដ្ឋធម្មនុញ្ញរបស់ខ្លួនឲ្យបានត្រឹមត្រូវ ប្រកបដោយមានប្រសិទ្ធិភាព។ គោរពធម្មនុញ្ញអង្គការសហប្រជាជាតិ សេចក្តីប្រកាសជាសកលស្តីពីសិទ្ធិមនុស្ស និងអនុសញ្ញានានាដែលកម្ពុជាបានផ្តល់សច្ចាប័នជាមួយអង្គការសហប្រជាជាតិ។
