សកម្មជនសិទ្ធិមនុស្ស បានហៅសកម្មភាពអាជ្ញាធរមូលដ្ឋានដែលបានរារាំងក្រុមយុវជនបរិស្ថានមិនឲ្យរៀបចំពិធីបុណ្យសង្ក្រាន្តនៅលើប្រឡាយទឹកស្អុយបឹងត្របែក ថា ជាការរឹតត្បិតសិទ្ធិសេរីភាពលើសង្គមស៊ីវិល ដែលផ្ទុយទៅនឹងច្បាប់ជាតិ និងផ្ទុយទៅនឹងសេចក្ដីណែនាំពីរដ្ឋាភិបាល។
ក្រុមយុវជនសំរាមបាននាំគ្នារៀបចំកម្មវិធីសង្រា្កន្តមួយនៅលើប្រឡាយទឹកស្អុយបឹងត្របែកកាលពីថ្ងៃទី៦ ខែមេសាសប្ដាហ៍មុន ដើម្បីអបអរក្នុងឱកាសបុណ្យចូលឆ្នាំថ្មីប្រពៃណីខ្មែរ និងជាការបំផុសឱ្យប្រជាពលរដ្ឋទាំងអស់ចូលរួមថែរក្សាបរិស្ថាននៅរាជធានីភ្នំពេញផងដែរ។
ប៉ុន្តែ ការរៀបចំពិធីនេះ ត្រូវបានអាជ្ញារខណ្ឌចំការមនរារាំងទៅវិញ ហើយអះអាងថា មិនបានសុំការអនុញ្ញាត ឬជូនដំណឹងទៅអាជ្ញាធរជាមុននោះឡើយ។
អាជ្ញាធរ បានអអះអាងថា ទីតាំងដែលក្រុមយុវជនរៀបចំធ្វើសង្ក្រាន្តមិនមានអនាម័យល្អ ហើយថា ព្រួយបារម្ភខ្លាចអំពីផលប៉ះពាល់ទៅលើសុខភាព និងសុវត្ថិភាពរបស់អ្នកចូលរួមផងដែរ។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី អះអាងថា អាជ្ញាធរចុះហាមឃាត់ក្រុមយុជនមិនឱ្យធ្វើសង្ក្រាន្ត ដោយសារ ពួកគេមិនបានជូនដំណឹងទៅអាជ្ញាធរ។
លោកថា៖ «ប្រទេសយើងមានច្បាប់ ការធ្វើសកម្មភាពសាធារណៈ លោក ប្អូនៗទៅយកសាឡាងដែលគេធ្វើនៅនោះ យកមករៀបចំ ដោយមិនមានការជូនដំណឹង ដោយមិនមានការស្នើសុំអីហ្នឹង។ តើយើងឆ្លុះបញ្ចាំងយ៉ាងម៉េច? អ៊ីចឹងទេ នេះជាមេរៀនដែលយើងចង់ប្រាប់ថា យើងអត់អាចធ្វើអី ទៅយកសាឡាងគេមករៀបចំ ធ្វើពិធីដោយមិនមានការសុំ មិនមានការជូនដំណឹង មិនមានការអនុញ្ញាតពីគេដែរ»។
ទោះជាយ៉ាងណា ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត បានចាត់ទុកសកម្មភាពរារាំងពីសំណាក់អាជ្ញាធរមូលដ្ឋាននេះថា ជាការរំលោភលើសិទ្ធិចូលរួមរបស់ក្រុមយុវជន ហើយលោកជំរុញទៅអាជ្ញាធរឲ្យជ្រើសរើសការលើកទឹកចិត្តដល់យុវជនវិញ។
លោកថា៖ «ខ្ញុំគិតថា អាហ្នឹងវាគ្រាន់តែជាហេតុផលមួយ ដើម្បីបញ្ឈប់មិនឱ្យមានមហាសង្ក្រាន្តយុវជនបរិស្ថាន និងជាការរំលោភសិទ្ធិរបស់យុវជនក្នុងការចូលរួមកិច្ចការការងារសង្គមហ្នឹង ជាពិសេសទាក់ទងនឹងការងារបរិស្ថានហ្នឹង»។
លោក អំ សំអាត មើលឃើញថា សកម្មភាពរារាំងរបស់អាជ្ញាធរខណ្ឌចំការមន បានកើតឡើងផ្ទុយទៅនឹងសេចក្ដីណែនាំរបស់រដ្ឋមន្ត្រីក្រសួងមហាផ្ទៃ លោក ស ខេង កាលពីចុងខែវិច្ឆិកាឆ្នាំមុនផងដែរ ដែលបានជំរុញទៅអាជ្ញាធរមូលដ្ឋានឲ្យបង្កើនកិច្ចសហការជាមួយអង្គការសង្គមស៊ីវិល។
លោក ស ខេង បញ្ជាក់ក្នុងសេចក្ដីណែនាំនោះថា សមាគម និងអង្គការមិនមែនរដ្ឋាភិបាល ដែលបានចុះបញ្ជីត្រឹមត្រូវនៅក្រសួងមហាផ្ទៃ ពួកគេអាចធ្វើសកម្មភាពបាន មិនបាច់ជូនដំណឹងទៅអាជ្ញាធរដូចពេលមុនៗនោះទេ៕