យុវជនជំរុញទៅកាន់រដ្ឋាភិបាលឲ្យបង្កើនការផ្សព្វផ្សាយ និងបង្កើតមជ្ឈមណ្ឌលបណ្ដុះបណ្ដាលវិជ្ជាជីវៈឲ្យបានដល់ទីជនបទ ដើម្បីសម្រួល និងដោះស្រាយភាពអត់ការងារធ្វើរបស់យុវជន។
ក្នុងកិច្ចសន្ទនាគោលនយោបាយស្ដីពីយុវជន និងការងារ ដែលរៀបចំដោយវិទ្យាស្ថាន តស៊ូមតិ និងគោលនយោបាយហៅកាត់ថា API យុវតីដែលកំពុងរៀននៅសកលវិទ្យាល័យមួយនៅរាជធានីភ្នំពេញ កញ្ញា ស្រ៊ាង សុរិយា បានលើកឡើងថា បញ្ហាកង្វះព័ត៌មាន និងការងារដែលមានកម្រិតហួសសមត្ថភាពពួកគេ កំពុងចោទជាបញ្ហាសម្រាប់ពួកគេក្នុងការទទួលការងារធ្វើសម្រាប់ចិញ្ចឹមជីវិត។
កញ្ញា សុរិយា ជំរុញដល់រដ្ឋាភិបាលឲ្យបង្កើនការផ្សព្វផ្សាយពីការងារបន្ថែមទៀតដល់យុវជន ជាពិសេសយុវជននៅតាមជនបទឲ្យបានដឹងពីឱកាសការងារនៅកម្ពុជានេះ។
កញ្ញាសុរិយា៖ «យុវជនដែលគាត់នៅរាជធានីភ្នំពេញផ្ទាល់ គឺគាត់អត់សូវពិបាកប៉ុន្មានទេ! មានន័យថា គាត់ដឹងថា អ្វីទៅជាក្រុមហ៊ុន សូម្បី Job agency ក៏គាត់ស្គាល់ សូម្បីតែការតាំងពិព័រណ៍ការងារ ក៏គាត់ស្គាល់ គឺគាត់ដឹងព័ត៌មានច្រើនណាស់។ តែយើងផ្ដោតលើយុវជនដែលនៅតាមជនបទវិញ ដោយសារអី គឺខ្ញុំចង់ឲ្យខាងរាជរដ្ឋាភិបាល គាត់មានបង្កើននូវមន្ត្រីជំនាញដើម្បីផ្សព្វផ្សាយជូនដល់យុវជននៅតាមបណ្ដាខេត្តឲ្យច្រើន ឲ្យទទួលព័ត៌មានបានស្មើគ្នា កុំផ្ដោតតែលើរាជធានីភ្នំពេញច្រើន ព្រោះអីនៅតាមបណ្ដាខេត្ក៏យើងត្រូវការព័ត៌មាននេះដូចគ្នាដែរ»។
យុវជនឈ្មោះ សុវណ្ណារ៉ា ដែលបច្ចុប្បន្នជាបុគ្គលិកក្រុមហ៊ុនឯកជនមួយបានលើកឡើងពីការលំបាកដែលគាត់ធ្លាប់ជួបនៅពេលដែលស្វែងរកការងារធ្វើថា ដោយសារ កង្វះព័ត៌មាន ហើយការងារមួយចំនួនទៀត គឺខុសទៅនឹងជំនាញដែលលោករៀន ដែលធ្វើឲ្យលោកជួបការលំបាកជាខ្លាំង។
លោកថា៖ «ពាក់ព័ន្ធទៅនឹងព័ត៌មានទៅដល់ដៃយុវជន ឬមួយក៏អត់ ដូចជា រូបខ្ញុំផ្ទាល់ ហើយមួយទៀត គឺពាក់ព័ន្ធទៅហ្នឹងជំនាញដែលខ្ញុំត្រូវរកហ្នឹង អត់ទាន់មានតម្រូវការផ្សព្វផ្សាយ មានន័យថា គេរើសដែរ តែខ្ញុំមិនបានទទួលព័ត៌មានហ្នឹងបានគ្រប់គ្រាន់។ [សំណួរ៖ ធ្វើម៉េចបានជាប្អូនទទួលបានការងារដែលធ្វើសព្វថ្ងៃ?] គឺតាមរយៈមិត្តភ័ក្ដិ។»
ក្នុងការស្រាវជ្រាវរបស់វិទ្យាស្ថានតស៊ូមតិ និងគោលនយោបាយ API បានរកឃើញថា បញ្ហាសំខាន់ៗដែលធ្វើឲ្យយុវជនកំពុងប្រឈមនឹងបញ្ហាអត់ការងារធ្វើនោះ បណ្ដាលមកពី បញ្ហាកង្វះព័ត៌មានជាសាធារណៈ ស្ថាប័នបណ្ដុះបណ្ដាលជំនាញបច្ចេកទេសកម្រិតមធ្យម និងខ្ពស់មិនគ្រប់គ្រាន់ និងការចូលរួមពីវិស័យឯកជនក្នុងការបណ្ដុះបណ្ដាលវិជ្ជាជីវៈដល់យុវជននៅមានកម្រិត។
អនុរដ្ឋលេខាធិការក្រសួងការងារ លោក ឡៅ ហ៊ីម មានប្រសាសន៍ក្នុងកិច្ចពិភាក្សានៅព្រឹកនេះ ថារដ្ឋាភិបាលបានបង្កើតរួចហើយនូវវិទ្យាស្ថានបណ្ដុះបណ្ដាលវិជ្ជាជីវៈនៅគ្រប់ខេត្តរាជធានី និងក៏មានទីភ្នាក់ងារជាតិមុខរបរ និងការងារនៅតាមខេត្តទាំងអស់ផងដែរ។ ទោះជាយ៉ាងណា លោកទទួលស្គាល់បញ្ហាដែលយុវជនកំពុងជួបប្រទះនេះ និងសន្យាយកទៅពិភាក្សាជាមួយភាគីពាក់ព័ន្ធ ដើម្បីដោះស្រាយបញ្ហានេះផងដែរ។
លោកថា៖ «ក៏ប៉ុន្តែ ក៏ចង់ជម្រាបជូនថា ស្ថាប័នរដ្ឋមួយមិនអាចធ្វើតែឯងបានទេ។ វាត្រូវរួមចំណែកពីភាគីពាក់ព័ន្ធទាំងអស់ រួមទាំងក្មួយៗដែលជាយុវជនផងដែរ។ ព្រោះបើសិនជាយើងនិយាយថា សម្រាប់តែស្ថាប័នមួយរបស់រាជរដ្ឋាភិបាល អាចថា ក្រសួងការងារ និងបណ្ដុះបណ្ដាលវិជ្ជាជីវៈធ្វើតែឯងនោះ ប្រហែលជាមិនអាចធ្វើតែឯងបានទេ។»
ប្រធានវិទ្យាស្ថាន តស៊ូមតិ និងគោលនយោបាយ លោក ឡាំ សុជាតិ មានប្រសាសន៍ថា យុវជនគឺជាកម្លាំងពលកម្មដែលមានសក្ដានុពលមួយក្នុងការជំរុញដល់ការរីកចំរើនសេដ្ឋកិច្ចជាតិ ហើយការរកការងារដល់យុវជន គឺជាការទទួលខុសត្រូវរបស់ស្ថាប័នពាក់ព័ន្ធទាំងអស់ រួមទាំងវិស័យឯកជនផងដែរ។
លោកថា៖ «ការងាររបស់រដ្ឋមិនអាចផ្ដល់ឲ្យយុវជនអស់ទេ តែវិស័យឯកជន និងអង្គការសង្គមស៊ីវិល ហើយយុវជនខ្លួនឯងត្រូវចេះបង្កើតការងារ អញ្ចឹងយើងត្រូវសហការគ្នាគ្រប់ទាំងអស់។»
បើតាម API បច្ចុប្បន្នយុវជនជាង៤២ភាគរយកំពុងជួបប្រទះបញ្ហាទីផ្សារការងារ និងការអនុវត្តគោលនយោបាយរដ្ឋាភិបាល។
យោងតាមការស្រាវជ្រាវរបស់អង្គការពលកម្មពិភពលោក និងវិទ្យាស្ថានជាតិស្ថិតិកាលពីឆ្នាំ២០១៣ ឲ្យដឹងថា យុវជនកម្ពុជាដែលមានអាយុ១៥ឆ្នាំឡើង មានជាង៤២ម៉ឺននាក់ ឬស្មើនឹង៤ភាគរយប៉ុណ្ណោះនៃប្រជាជនសរុប ដែលទទួលបានការបណ្ដុះបណ្ដាលវិជ្ជាជីវៈ ក្នុងនោះមានជាង១ពាន់នាក់មិនអាចរកការងារធ្វើបាន៕
