អភិបាលរាជធានីភ្នំពេញ អំពាវនាវទៅមន្រ្តីក្រោមឱវាទទាំងអស់ត្រូវជួយសម្របសម្រួលដល់សមាគម និងអង្គការមិនមែនរដ្ឋាភិបាលក្នុងការធ្វើសកម្មភាពដោយសេរី គ្មានការគំរាមកំហែង ដើម្បីឱ្យស្របទៅតាមច្បាប់ និងសេចក្ដីណែនាំរបស់ក្រសួងមហាផ្ទៃ។
ក្នុងវេទិកាភាពជាដៃគូរវាងអាជ្ញាធររាជធានីភ្នំពេញជាមួយសមាគម-អង្គការមិនមែនរដ្ឋាភិបាល នៅថ្ងៃនេះ អភិបាលរាជធានីភ្នំពេញ លោក ឃួង ស្រេង បានអំពាវនាវដល់ស្នងការដ្ឋាននគរបាល កងរាជអាវុធហត្ថ រដ្ឋបាលខណ្ឌទាំង១២ មន្ទីរអង្គភាពជុំវិញរដ្ឋបាលរាជធានីភ្នំពេញ រួមទាំងស្ថាប័នពាក់ព័ន្ធផ្សេងទៀត ត្រូវជួយសម្របសម្រួល និងបង្កលក្ខណៈងាយស្រួលដល់សង្គមស៊ីវិលក្នុងការធ្វើសកម្មភាពដោយសេរី និងគ្មានការគំរាមកំហែង។
លោក លើកឡើងថា៖ «សូមជួយសម្របសម្រួល និងបង្កលក្ខណៈងាយស្រួលដល់សមាគមនិងអង្គការមិនមែនរដ្ឋាភិបាលក្នុងស្រុក ដែលបានចុះបញ្ជីត្រឹមត្រូវនៅក្រសួងមហាផ្ទៃ ក៏ដូចជា សមាគម អង្គការមិនមែនរដ្ឋាភិបាលបរទេស ដែលបានចុះអនុស្សនៈក្រសួងការបរទេស និងកិច្ចសហប្រតិបត្តិការអន្តរជាតិក្នុងការធ្វើសកម្មភាពដោយសេរី គ្មានការគំរាមកំហែង និងមិនលំអៀង ស្របទៅតាមច្បាប់ស្ដីពី សមាគម និងអង្គការមិនមែនរដ្ឋាភិបាល គោលការណ៍ណែនាំ បទបញ្ជា និងលិខិតបទដ្ឋានគតិយុត្តិជាធរមាន»។
អនុប្រធានក្រុមប្រឹក្សា អង្គការជំនួយនៃក្ដីសង្ឃឹមសម្រាប់សហគមន៍ លោក ដេត ប៊ុនថុន គាំទ្រចំពោះការអំពាវនាវនេះ ដោយថា កន្លងមក អជ្ញាធរមូលដ្ឋានតែងតែបដិសេធមិនឱ្យពួកគាត់រៀបចំវេទិកាផ្សេងៗនៅតាមមូលដ្ឋាន ទោះបីជាពួកគាត់បានដាក់លិខិតស្នើសុំការអនុញ្ញាតពីអាជ្ញាធរក៏ដោយ។
លោក ថា៖ «អ៊ីចឹង ខ្ញុំគិតថា បើតាមរយៈថ្ងៃនេះ ដោយសារតែមានការចូលរួមពីអភិបាលខណ្ឌផងដែរ ខ្ញុំគិតថា ពេលត្រឡប់ទៅវិញ គាត់អាចផ្ដល់ព័ត៌មានហ្នឹងទៅដល់អាជ្ញាធរដែនដី។ ហើយអាជ្ញាធរដែនដីអាចនឹងសហការជាមួយយើង»។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត ស្វាគមន៍ចំពោះការអំពាវនាវរបស់សាលារាជធានីភ្នំពេញ ដោយចាត់ទុកថា វាជាសញ្ញាវិជ្ជមានមួយឈានទៅស្តារទំនាក់ទំនងជាមួយសង្គមស៊ីវិលឡើងវិញ។
លោកថា៖ «ខ្ញុំគិតថា វាជាការល្អ ហើយវាក៏ជាការបង្ហាញអំពីការចូលរួមចំណែកក្នុងការអភិវឌ្ឍទាំងអស់គ្នាដែរ ប៉ុន្តែ អ្វីដែលសំខាន់ ដោយសារយើងមានបទពិសោធន៍ និងមេរៀនកន្លងមក ជាពិសេសរាជធានីភ្នំពេញដែលមានបញ្ហាមួយចំនួនរវាងអង្គការសង្គមស៊ីវិលជាមួយនឹងអាជ្ញាធរ។ យើងរង់ចាំមើល ថាតើអាជ្ញាធរទាំងអស់ហ្នឹង គាត់ផ្ដល់កិច្ចសហការជាមួយអង្គការសង្គមស៊ីវិល ដើម្បីបើកលំហរសេរីភាពការងាររបស់អង្គការសង្គមស៊ីវិលដល់កម្រិតណា យើងនឹងធ្វើការតាមដានមើលបន្តទៅទៀត»។
ក្នុងវេទិកាភាពជាដៃគូរវាងអាជ្ញាធររាជធានីភ្នំពេញ និងអង្គការសង្គមស៊ីវិល នាព្រឹកមិញនេះ គឺមានតំណាងសង្គមស៊ីវិលចូលរួមចំនួន ៧០០នាក់ ។
កាលពីថ្ងៃទី៣១ ខែតុលា ឆ្នាំ២០១៨ លោក ស ខេង បានចេញលិខិតណែនាំមួយ តម្រូវឲ្យរដ្ឋបាលរាជធានី-ខេត្ត ឲ្យរៀបចំវេទិកាពិគ្រោះយោបល់ជាមួយសមាគម អង្គការមិនមែនរដ្ឋាភិបាល និងសហគមន៍នានានៅមូលដ្ឋាន ឲ្យបានទៀងទាត់រាល់ឆមាស ដើម្បីបន្តពង្រឹងកិច្ចសហប្រតិបត្តិការជាដៃគូទៀត។
លោក ស ខេង បញ្ជាក់ក្នុងសេចក្ដីណែនាំនោះថា សមាគម និងអង្គការមិនមែនរដ្ឋាភិបាល ដែលបានចុះបញ្ជីត្រឹមត្រូវនៅក្រសួងមហាផ្ទៃ ពួកគេអាចធ្វើសកម្មភាពបាន មិនបាច់ជូនដំណឹងទៅអាជ្ញាធរដូចពេលមុនៗនោះទេ។