ក្រសួងធនធានទឹក និងឧតុនិយមបានឲ្យដឹងថា កម្ពុជានឹងមានភ្លៀងធ្លាក់ក្នុងអំឡុងពេលចូលឆ្នាំដោយសារទទួលរងឥទ្ធិពលនៃសម្ពាធទាបដែលកើតពីសមុទ្រចិនខាងត្បូង។
ក្នុងសេចក្ដីជូនដំណឹងរបស់ក្រសួងធនធានទឹក និងឧតុនិយមផ្សាយនៅថ្ងៃនេះ បានឲ្យដឹងថា កម្ពុជានឹងមានភ្លៀងធ្លាក់ក្នុងកម្រិតខ្សោយទៅបង្គួរស្ទើរទូទាំងប្រទេស ចាប់ពីថ្ងៃទី១២ ដល់ទី១៧ ខែមេសា ដោយសារឥទ្ធិពលពីសមុទ្រចិនខាងត្បូង។
ដោយឡែកថ្ងៃទី១០ និង១១ ខែមេសា ជ្រលងសម្ពាធទាបមានលក្ខណៈចុះខ្សោយដែលបណ្ដាលឲ្យបរិមាណទឹកភ្លៀងអាចមានក្នុងកម្រិតតិចតួច ហើយសីតុណ្ហភាពក៏មានការហក់ឡើងពី ៣៦ ដល់៣៩អង្សា។
ក្រសួងធនធានទឹកក៏បានក្រើនរំលឹកដល់ប្រជាពលរដ្ឋឲ្យមានការប្រុងប្រយ័ត្នចំពោះបាតុភូតផ្គររន្ទះនិងខ្យល់កន្ត្រាក់ ព្រមទាំងរក្សាទឹកទុកព្រោះកម្ដៅ និងរំហួតខ្ពស់។
