អភិបាលខេត្តបាត់ដំបងរំឭកឱ្យមានការប្រុងប្រយ័ត្នចំពោះអ្នកនិយាយថា អាជ្ញាធរច្រកដូង នៅព្រំដែនកម្ពុជា-ថៃ ទារលុយខុសច្បាប់ពីប្រជាពលរដ្ឋខ្មែរដែលធ្វើការងារនៅប្រទេសថៃហើយត្រឡប់មកលេងស្រុកកំណើតវិញនៅក្នុងពិធីបុណ្យចូលឆ្នាំថ្មីប្រពៃណីជាតិខ្មែរ។
រយៈពេលប៉ុន្មានថ្ងៃនេះ បណ្តាញទំនាក់ទំនងសង្គម និងសារព័ត៌មានមួយចំនួនផ្សព្វផ្សាយថា មន្ត្រីកម្ពុជា និងថៃនៅច្រកដូង បានទារលុយក្រៅផ្លូវការពីពលករខ្មែរម្នាក់៣០០បាត ស្មើនឹងប្រមាណ៣៥០០០រៀល។
អភិបាលខេត្តបាត់ដំបង លោក ងួន រតនៈ ថ្លែងប្រាប់ វី.អូ.ឌី តាមទូរសព្ទនៅថ្ងៃនេះថា មន្ត្រីនៅច្រកព្រំដែនដូង និងអាជ្ញាធរពាក់ព័ន្ធផ្សេងទៀត បានជួយសម្របសម្រួលដល់ពលករខ្មែរ ដែលមកពីធ្វើការនៅប្រទេសថៃ ឱ្យធ្វើដំណើរមកកាន់ប្រទេសកម្ពុជា ដោយមិនតម្រូវឱ្យពលករណាម្នាក់បង់ប្រាក់ដូចការចោទប្រកាន់នោះឡើយ។ លោកក៏បានរំឭកឲ្យអ្នកចោទប្រកាន់មានការប្រុងប្រយ័ត្ន។
លោកថា៖ «ដូចមិនមានវាយ [បំពេញឯកសារ] យកលុយម៉េច ៣០០បាត ប្រយ័ត្នតែមានករណីណាមួយ ហើយទៅនិយាយពាក្យហ្នឹង វាប៉ះពាល់ធំណាស់ បុគ្គលខ្លះមានបំណងធ្វើឱ្យល្អក់កករអ៊ីចឹងទៅ ក៏វាអាច អាហ្នឹងខ្ញុំមិនទាន់ថាទេណា ប៉ុន្តែ ប្រើពាក្យគ្រប់គ្នាអ៊ីចឹង ហើយមួយថ្ងៃចំនួន៥ ទៅ៦ពាន់នាក់ ហើយអាហ្នឹងយ៉ាងម៉េចទៅ ឥឡូវខ្ញុំសួរទៅមួយភ្លែតសិន។»
អភិបាលខេត្តរូបនេះ សុំពេលដើម្បីទាក់ទងសួរមន្ត្រីពាក់ព័ន្ធជុំវិញការចោទប្រកាន់នេះ ប៉ុន្តែពេល វី.អូ.ឌី ហៅទូរសព្ទសាកសួរម្តងទៀត លោកប្រាប់ថា ជាប់ប្រជុំ។
វី.អូ.ឌី មិនអាចសុំការបំភ្លឺពីប្រធានច្រកព្រំដែនដូង លោក ហម សំខាន់ បានទេ ដោយទូរសព្ទមិនអាចទំនាក់ទំនងបាន។
មន្ដ្រីកម្មវិធីសិទ្ធិការងារពលករចំណាកស្រុកនៃអង្គការសង់ត្រាល់ លោក ឌី ថេហូយ៉ា ដែលបានចុះទៅដល់ច្រកព្រំដែនដូង មានប្រសាសន៍ថា អាជ្ញាធរខ្មែរ និងថៃ មិនបានជួយសម្របសម្រួលដល់ពលករខ្មែរដែលធ្វើដំណើរមកលេងស្រុកកំណើតក្នុងឱកាសបុណ្យចូលឆ្នាំបានងាយនោះទេ ដោយថា អាជ្ញាធរទាំងពីរបានឃុបឃិតគ្នាយកប្រាក់ពីពលករក្នុងម្នាក់ៗចំនួន ៣០០បាត។
លោកថា៖ «ដូចជាមិនមានថ្លៃស្អីទេ គេយកអ៊ីចឹងតែម្តង បើឱ្យប្រាប់ថា ជាថ្លៃស្អីវាអត់មាន វាអត់មាននៅក្នុងសេចក្ដីប្រកាសអីហ្នឹង វាអត់មាន។ អាហ្នឹង គឺជាការយកឆៅ [យកឥតច្បាប់] អ៊ីចឹងតែម្ដង ព្រោះខាងថៃក៏ប្រកាសមិនឱ្យយក ហើយខាងរដ្ឋាភិបាលកម្ពុជាក៏ប្រកាសមិនឱ្យយកលុយដែរ ហើយវាក៏ដូចជាអត់មានលក្ខខណ្ឌណាត្រូវយកលុយផង បើយើងគិតទៅវាអត់មាន។ និយាយទៅលុយ ៣០០បាតហ្នឹង វាអត់ទាក់ទងនឹងរឿងសេវាកម្មរបស់រដ្ឋអីទេ និយាយដោយខ្លី គ្រាន់តែជារឿងយកក្រៅទេ»។
លោកចាត់ទុកការយកប្រាក់ពីពលករខ្មែរក្នុងអំឡុងពេលបុណ្យចូលឆ្នាំនេះថា ជាការប្រព្រឹត្តអំពើពុករលួយ ដោយសារ ប្រាក់ដែលអាជ្ញាធរបានយកពីពលករនោះមិនបានចូលរដ្ឋ។ លោកស្នើទៅរដ្ឋាភិបាល និងអង្គភាពប្រឆាំងអំពើពុករលួយចុះស៊ើបអង្កេតករណីនេះ។
លោកថា៖ «បើសិនជាយកលុយខុសពីគោលការណ៍របស់រដ្ឋាភិបាលបានប្រកាស ទាំងរដ្ឋាភិបាលថៃ ទាំងរដ្ឋាភិបាលកម្ពុជា គួរតែមានចំណាត់ការក្នុងរឿងនេះឱ្យបានជាបន្ទាន់ បើសិនជាមើលឃើញថា ជាអំពើពុករលួយអីទាំងអស់នេះ។ យើងឃើញហើយថា ស្ថាប័នជាតិយើង ACU គួរតែធ្វើការតួ្រតពិនិត្យអំពីបទល្មើសពុករលួយឱ្យមានប្រសិទ្ធភាព ដូចជាសម្ដេចនាយកលោកបានប្រើអភិក្រមទាំងប្រាំនេះ គួរតែប្រើឱ្យមានប្រសិទ្ធភាពទាំងអស់ កុំប្រើតែចំពោះបុគ្គល អារឿងទាំងអស់នេះធំណាស់ គួរតែតាមដានថាវាយ៉ាងម៉េច។»
កាលពីថ្ងៃទី២២ ខែកុម្ភៈ ឆ្នាំ២០១៩ រដ្ឋាភិបាលកម្ពុជា និងថៃ បានចេញសេចក្ដីប្រកាសព័ត៌មាន ដោយឯកភាពគ្នាជួយសម្រួលដល់ពលករខ្មែរស្របច្បាប់ ដែលកំពុងស្នាក់នៅ និងធ្វើការក្នុងប្រទេសថៃ ឱ្យធ្វើដំណើរមកកាន់ប្រទេសកម្ពុជា ដើម្បីប្រារព្ធពិធីបុណ្យចូលឆ្នាំខ្មែរ ដោយឥតគិតថ្លៃរក្សាសិទ្ធិទិដ្ឋាការ (Re- Entry Visa) ចាប់ពីថ្ងៃទី៥ ដល់ថ្ងៃទី៣០ ខែមេសា ឆ្នាំ២០១៩។
អនុប្រធានអង្គការភាពប្រឆាំងអំពើពុករលួយ លោក ឃាង សេង សុំមិនធ្វើអត្ថាធិប្បាយ ដោយថា ជាប់រវល់ប្រជុំ លោកឱ្យសួរសំណួរទៅប្រធានអង្គភាពប្រឆាំងអំពើពុករលួយ លោក ឱម យិនទៀង ។ ករណីនេះ ប្រធានអង្គការភាពប្រឆាំងអំពើពុករលួយ លោក ឱម យិនទៀង សុំមិនធ្វើអត្ថាធិប្បាយ ដោយលោកទាមទារឱ្យអ្នកសារព័ត៌មានលិខិតទៅ។
លោកថា៖ «សុំទោស ខ្ញុំមិនទទួលតាមទូរសព្ទទេបាទ! សូមសរសេរលិខិតមក ខ្ញុំឆ្លើយតាមលិខិតជូនទៅវិញណា៎!»
ក្នុងសារជូនពរឆ្នាំថ្មី លោកនាយករដ្ឋមន្ត្រី ហ៊ុន សែន បានប្តេជ្ញាចិត្តថា រដ្ឋាភិបាលនឹងបន្តវះកាត់លើយន្តការធ្វើកំណែទម្រង់ដ៏ស៊ីជម្រៅ ក្នុងនោះមានទាំងការប្រយុទ្ធប្រឆាំងអំពើពុករលួយ។
អង្គការតម្លាភាពអន្តរជាតិបានចេញផ្សាយសន្ទស្សន៍វាយតម្លៃកាលពីឆ្នាំ២០១៨ ថា អំពើពុករលួយនៅកម្ពុជានៅតែស្ថិតក្នុងកម្រិតធ្ងន់ធ្ងរជាងប្រទេសជាសមាជិកអាស៊ាន។
អង្គការនេះ ក៏បានរកឃើញទៀតថា ការដែលកម្ពុជាមានចំណាត់ថ្នាក់អំពើពុករលួយខ្ពស់បែបនេះ ដោយសារ ការធ្វើកំណែទម្រង់ជាច្រើនពាក់ព័ន្ធនឹងការប្រឆាំងអំពើពុករលួយ ដែលត្រូវបានលើកឡើងដោយអ្នកជំនាញផ្នែកអភិបាលកិច្ច អ្នកជំនាញប្រយុទ្ធប្រឆាំងអំពើពុករលួយ មិនត្រូវបានយកទៅអនុវត្តប្រកបដោយប្រសិទ្ធភាព។
