សាលារាជធានីភ្នំពេញ បានអំពាវនាវទៅពលរដ្ឋឲ្យទុកដាក់សំរាមឲ្យមានសណ្តាប់ធ្នាប់អំឡុងពិធីបុណ្យចូលឆ្នាំថ្មីខាងមុខនេះ ជាពេលដែលកម្មករប្រមូលសំរាមក៏ឈប់សម្រាកផងដែរ។
ក្នុងសេចក្តីជូនដំណឹងកាលពីថ្ងៃម្សិលមិញនេះ សាលារាជធានីភ្នំពេញ បានលើកឡើងថា ការផ្តល់សេវាសម្អាត ការប្រមូល និងការដឹកជញ្ជូនសំរាមក្នុងរាជធានីភ្នំពេញ នឹងមិនត្រូវបានអនុវត្តពេញលេញឡើយ ដោយសារកម្មករប្រមូលសំរាមរបស់ក្រុមហ៊ុនស៊ីនទ្រីឈប់សម្រាកចូលឆ្នាំថ្មីប្រពៃណីជាតិរយៈពេល ៤ថ្ងៃ ចាប់ពីថ្ងៃទី១៤ ដល់ថ្ងៃទី១៧ ខែមេសាខាងមុខនេះ។
សាលារាជធានីភ្នំពេញបានអំពាវនាវទៅប្រជាពលរដ្ឋឲ្យកុំបញ្ចេញសំរាមដាក់តាមដងផ្លូវសាធារណៈ ក្នុងអំឡុងពេលដែលការផ្តល់សេវាមិនបានពេញលេញនោះ ហើយណែនាំឲ្យរក្សាទុកសំរាមរបស់ខ្លួនឲ្យបានត្រឹមត្រូវក្នុងទីតាំងរៀងៗខ្លួនជាបណ្ណោះអាសន្នសិន ដោយថា ដើម្បីសោភ័ណភាព និងអនាម័យបរិស្ថានទីក្រុង។
បើតាមក្រុមហ៊ុន ស៊ិនទ្រី កាកសំណល់ និងសំរាមយ៉ាងហោចណាស់ ១៨០០តោនក្នុងមួយថ្ងៃៗ ត្រូវបានប្រមូលពីតាមលំនៅឋាន អគារ និងដងវិថីនានានៅក្នុងរាជធានីភ្នំពេញ៕
