សមត្ថកិច្ចរកឃើញសារធាតុញៀននៅក្នុងខ្លួនមនុស្ស ៣១នាក់ ក្នុងចំណោមអ្នកដែលត្រូវឃាត់ខ្លួនចំនួន ៥០នាក់ អំឡុងពេលចុះបង្រា្កបនៅក្លឹបកម្សាន្ត ម៉ៃ អាមី ។
ស្នងការនគរបាលរាជធានីភ្នំពេញ លោក ស ថេត ប្រាប់ វី.អូ.ឌី នៅថ្ងៃនេះថា សមត្ថកិច្ចរកឃើញអ្នកដែលប្រើប្រាស់គ្រឿងញៀន ចំនួន ៣១នាក់ ហើយអ្នកទាំងនោះស្ម័គ្រចិត្តទៅព្យាបាលនៅមណ្ឌលសុខភាព និងមណ្ឌលកែប្រែដោយខ្លួនឯង។ ចំណែកឯអ្នកជាប់ពាក់ព័ន្ធនឹងការជួញដូរ និងជួយសម្របសម្រួល សមត្ថកិច្ចនឹងចាត់ការតាមនីតិវិធីច្បាប់។
លោកថា៖ «រីឯអ្នកដែលមានតម្រុយសម្រួល ប្រើប្រាស់ចែកចាយនៅក្នុងអាហ្នឹង យើងអនុវត្តទៅតាមច្បាប់។ នៅស្នងការមិនទាន់បានបញ្ជូនទៅទេ។ ចំណែក [ម្ចាស់ក្លឹបមានតែម្នាក់ទេ] ជនជាតិខ្មែរ ឈ្មោះ ស្រិន វីរៈ ឬហៅ អាល័ក្ខ។»
បើតាមលោក ស ថេត ឱ្យដឹងថា ការចុះបង្រា្កបរបស់សមត្ថកិច្ចកាលពីម្សិលមិញ គឺបានរឹបអូសគ្រឿងញៀនមួយចំនួន និងឧបករណ៍កែច្នៃគ្រឿងញៀនផងដែរ។
ម៉ៃ អាមី គឺជាក្លឹបកម្សាន្តទី២ នៅក្នុងរាជធានីភ្នំពេញ ដែលត្រូវបានសមត្ថកិច្ចបង្ក្រាប ចាប់ខ្លួនមនុស្ស និងរឹបអូសបានគ្រឿងញៀន បន្ទាប់ពីមជ្ឈមណ្ឌលកម្សាន្ត រ៉ក់ របស់ឧកញ៉ា គិត ធាង កាលពីខែកុម្ភៈកន្លងមក។
កាលពីថ្ងៃទី២៨ ខែកុម្ភៈ នគរបាលរាជធានីភ្នំពេញ បានបង្ហាញរបាយការណ៍មួយ ដោយបានរកឃើញក្លឹបកម្សាន្ត និងបារបារាំងជិត ១៣០០កន្លែង ងាយរងគ្រោះនឹងការប្រើប្រាស់គ្រឿងញៀន ក្នុងនោះក្លឹបជាង ១ពាន់កន្លែង បានធ្វើកិច្ចសន្យាមិនឲ្យមានការប្រើប្រាស់ និងចែកចាយគ្រឿងញៀនរួចហើយ។
កាលពីថ្ងៃទី១២ ខែមីនា រដ្ឋមន្ត្រីក្រសួងមហាផ្ទៃ លោក ស ខេង រំឭកមន្ត្រីក្រោមឱវាទបន្តពង្រឹងប្រសិទ្ធភាពបង្ក្រាបគ្រឿងញៀន ដោយថា មិនត្រូវមានការយោគយល់ណាមួយនោះឡើយ។ បើតាមលោក ស ខេង យុទ្ធនាការបង្ក្រាបគ្រឿងញៀនជិត ២ឆ្នាំមកនេះ សមត្ថកិច្ចរឹបអូសបានគ្រឿងញៀនជិត ៥០០គីឡូក្រាម៕