លោក កឹម សុខា បូងសួងសុំឱ្យទេវតាឆ្នាំថ្មី សម្អាតចិត្តមនុស្សពិសេសអ្នកនយោបាយឱ្យឈប់ជេរប្រមាថ គំរាមកំហែង និងមួលបង្កាច់ជាដើម។
សារសរសេរលើហ្វេសប៊ុកលោក កឹម សុខា នៅថ្ងៃនេះ បួងសួងឱ្យខ្មែររួមរស់ជាមួយគ្នាឱ្យបានសុខ និងសម្អាតចិត្តមនុស្ស។
លោក កឹម សុខា៖ «សូមឲ្យកំចាត់ចេញពីកាយ វាចា ចិត្តរបស់មនុស្ស ជាពិសេសអ្នកនយោបាយខ្មែរ នូវអកុសលធម៌ទាំងឡាយ(លោភៈ ទោសៈ មោហៈ)ដូចជា ការលោភលន់គ្មានព្រំដែន ការរំលោភបំពាន ការគំរាមកំហែង អំពើហិង្សា ការមួលបង្កាច់ចោទប្រកាន់ ការលាបពណ៌ ការជេរប្រមាថ ការគំគួនសងសឹកគ្នា ដែលជាមូលហេតុនាំឲ្យមានការឈឺចាប់ ការបែកបាក់ក្នុងសង្គមជាតិ និងនាំឲ្យអាប់ឱននូវតម្លៃពូជសាសន៍ តម្លៃនៃអ្នកដឹកនាំ ជាពិសេសកិត្យានុភាពជាតិ។»
លោក កឹម សុខា ក៏បានបួងសួងឱ្យឆ្នាំនេះក្លាយជាឆ្នាំសិរីសួស្តី ដែលខ្មែរទាំងអស់ងាកមករកដំណោះស្រាយរួមគ្នាវិញ។
លោក កឹម សុខាអតីតប្រធានគណបក្សសង្គ្រោះជាតិ ត្រូវលោក ហ៊ុន សែន បញ្ជាឱ្យចាប់ខ្លួនទាំងយប់កាលពីដើមខែកញ្ញាឆ្នាំ២០១៧ ដោយចោទថា ក្បត់ជាតិ។ បច្ចុប្បន្នលោក កឹម សុខា នៅស្ថិតនៅក្នុងការឃុំខ្លួនក្នុងផ្ទះ។