គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ.) បានឲ្យដឹងថា យ៉ាងហោចណាស់មនុស្ស ១៤នាក់ បានស្លាប់ ហើយជាង ៤០នាក់ទៀតបានរងរបួសនៅក្នុងគ្រោះថ្នាក់ចរាចរណ៍កាលពីថ្ងៃម្សិលមិញនេះ ខណៈខែមេសាត្រូវបានមើលឃើញថា តួលេខគ្រោះថ្នាក់ចរាចរណ៍កើនឡើងខ្ពស់លើសខែនានា។
គ.ស.ច.គ. បានឲ្យដឹងបែបនេះនៅក្នុងរបាយការណ៍បច្ចុប្បន្នភាពអំពីគ្រោះថ្នាក់ចរាចរណ៍នៅលើទំព័រហ្វេសប៊ុករបស់ខ្លួននៅថ្ងៃនេះ។
គ.ស.ច.គ. បានឲ្យដឹងថា គ្រោះថ្នាក់ចរាចរណ៍ បានកើតឡើង ២៤លើកនៅទូទាំងប្រទេសកាលពីថ្ងៃទី១៣ ខែមេសា ជាថ្ងៃដែលពលរដ្ឋកម្ពុជាធ្វើដំណើរទៅកាន់បណ្ដាខេត្តនានា ដើម្បីចូលរួមពិធីបុណ្យចូលឆ្នាំថ្មីប្រពៃណីជាតិខ្មែរ។
បើ គ.ស.ច.គ. មនុស្ស ១៤នាក់ ត្រូវបានសម្លាប់ ហើយ ៤៣នាក់ទៀត បានរងរបួសធ្ងន់ស្រាលខខណៈដែលយានយន្តចំនួន ៤៤គ្រឿង បានរងការខូចខាតក្នុងគ្រោះថ្នាក់ចរាចរណ៍សរុបកាលពីថ្ងៃម្សិលមិញនេះ។
ចំណែកឯទិន្នន័យគ្រោះថ្នាក់ចរាចរណ៍របស់នគរបាលជាតិ បានឲ្យដឹងថា មនុស្សដល់ទៅ ៨០នាក់ហើយ បានស្លាប់ ហើយមនុស្ស ២១៤នាក់ទៀត បានរងរបួសធ្ងន់ស្រាលនៅក្នុងគ្រោះថ្នាក់ចរាចរណ៍សរុប ១៥៣លើកនៅទូទាំងប្រទេសចន្លោះពីថ្ងៃទី១ ដល់ថ្ងៃទី១២ ខែមេសានេះ។
ទិន្នន័យនេះបង្ហាញឲ្យឃើញផងដែរថា ចំនួនករណីគ្រោះថ្នាក់ចរាចរណ៍បានកើនឡើងពីចំនួន ១៤៧លើកនៅក្នុងខែមីនា ខណៈចំនួនមនុស្សស្លាប់ក្នុងគ្រោះថ្នាក់ចរាចរណ៍ បានកើនឡើងពីចំនួន ៧៦នាក់នៅខែមីនា។
ទិន្នន័យនគរបាលចរាចរណ៍ បានបញ្ជាក់ថា ការបើកបរលឿនហួសល្បឿនកំណត់ ការបើកបរដោយមិនគោរពសិទ្ធិ ការបើកបរដោយមិនប្រកាន់ស្ដាំ ការបត់ប្រកបដោយគ្រោះថ្នាក់ និងការបើកបរជែងគ្នា សុទ្ធតែជាមូលហេតុចម្បងៗនៃគ្រោះថ្នាក់ចរាចរណ៍។
គ្រោះថ្នាក់ចរាចរណ៍ បានសម្លាប់មនុស្សដល់ទៅ ១,៧៦១នាក់ និងបណ្ដាលឲ្យមនុស្សដល់ទៅ ៤,៧៧០នាក់រងរបួសធ្ងន់ស្រាលកាលពីឆ្នាំ២០១៨កន្លងមក៕